༄༅། །ཕྱི་ལོ་ ༢༠༢༦ ཟླ་བ་ ༤ ཚེས་ ༡༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་ཟློས་གར་ཚོགས་པའི་སློབ་གཉེར་བའི་སྡོད་ཁང་དང་ལས་ཤག་གསར་པ་ཐང་སྟོང་ཁང་གསར་དབུ་འབྱེད་གནང་ཡོད།  དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༤༥ ཐོག་བོད་ཀྱི་ཟློས་གར་དུ་དཔལ་ལྡན་སྲིད་སྐྱོང་མཆོག་གིས་གཙོས་པའི་ཇན་མན་རོགས་ཚོགས་ཀྱི་ཚོགས་གཙོ་ཟུར་པ་ལྕམ་ཧེ་ཊི་མེ་ཡར་ (Heide Meyer) ལགས་དང་། ཕ་རན་ཛི་སི་ཀ་ཤ་ལར་མན་ (Franziska Schlarmann) ལགས། ཨ་ནཱ་ཝཱི་ཡེན་སེཀ་ (Anna Wiencek) ལགས་བཅས་བོད་ཀྱི་ཟློས་གར་དུ་ཕེབས་འབྱོར་སྐབས་བོད་ཀྱི་ཟློས་གར་ཚོགས་པས་ཕེབས་བསུའི་སྣེ་ལེན་གཟབ་རྒྱས་ཞུས་རྗེས་རྒྱུད་སྟོད་གྲྭ་ཚང་གི་དགེ་འདུན་པ་རྣམས་ནས་སྨོན་ལམ་གསུང་འདོན་དང་རབ་གནས་གནང་སྟེ་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཟློས་གར་ཚོགས་པའི་བུའི་སྡོད་ཁང་དང་ལས་ཤག་གསར་པ་ཐང་སྟོང་ཁང་གསར་ཞེས་པ་དབུ་འབྱེད་ཀྱིས་གཟིགས་ཞིབ་གནང་ཡོད། དེ་རྗེས་བོད་ཀྱི་ཟློས་གར་ཚོགས་པའི་ཚོགས་ཁང་དུ་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་གཙོས་པའི་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་དང་། དཔལ་འབྱོར་དྲུང་ཆེ་གྱང་གསར་ཚེ་རིང་དོན་གྲུབ་ལགས། དྷ་སྟེང་བོད་ཁྱིམ་སྤྱི་ཁྱབ་འགན་འཛིན་བསོད་ནམས་སྲིད་གཅོད་ལགས། བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་ཟུར་པ་ཤོ་ཟུར་བསོད་ནམས་ཆོས་འཕེལ་ལགས། ནང་སྲིད་དྲུང་ཆེ་ཟུར་པ་ཚེ་དབང་སྒྲོལ་མ་ལགས། ཇར་མན་རོགས་ཚོགས་ཀྱི་སྐུ་ཚབ་ཚོགས་ཆུང་བཅས་དང་། བོད་ཀྱི་ཟློས་གར་ཚོགས་པའི་དགེ་ལས་སློབ་ཕྲུག་ཡོངས་ལྷན་འཛོམས་ཀྱི་ཐོག་མར་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱིས་ཐང་སྟོང་ཁང་གསར་གྱི་འགྲོ་གྲོན་རྩིས་ཁྲ་དང་ལས་བསྡོམས་སྙིང་བསྡུས་ཤིག་ངོ་སྤྲོད་གནང་བ་དང་འབྲེལ། དེ་སྔོན་གྱི་སློབ་མའི་སྡོད་ཁང་དང་ལས་ཤག་དེ་དག་ཕྱི་ལོ་ ༡༩༧༠ ནང་བརྒྱབ་ཏེ་མི་ལོ་ལྔ་བཅུ་ལྷག་སོང་བར་བརྟེན་ཁང་པའི་ཐོག་རྩེགས་དང་གྱང་རྩིག་གང་ས་ནས་ཆར་ཆུའི་ཐིག་པ་བརྒྱབ་པའི་གནས་སྟངས་འོག་གཞའ་ཚན་ཕོགས་པར་བརྟེན་དཀའ་ངལ་རིམ་འཕྲད་ལ་གཞིགས་ཏེ། ཁང་པ་གསར་རྒྱག་ཞུ་རྒྱུའི་གནས་སྟངས་ཇི་ལེགས་ཁང་བཟོ་འཆར་འགོད་པས་ཞིབ་འཇུག་གནང་འབྲས་སུ་གསར་རྒྱག་དང་ཉམས་བཟོའི་ལས་གཞིར་འགྲོ་གྲོན་ཁྱད་པར་དེ་ཙམ་མེད་པར་སོང་། འཕྲལ་ཕུགས་རྒྱང་གསུམ་གྱི་གནས་སྟངས་དང་སློབ་གཉེར་ཁང་སྲ་བརྟན་དང་དགེ་ལས་སློབ་ཕྲུག་རྣམས་ལ་འཐུན་འགྱུར་ཇི་བཟང་ཡོང་བར་དམིགས་ཏེ་ཁང་པ་གསར་རྒྱག་ཞུ་རྒྱུའི་འཆར་གཞི་གཏན་འཁེལ་གྱིས་ཐེངས་འདིར་ལེགས་གྲུབ་ཟིན་པའི་གནས་སྟངས་འགྲེལ་བརྗོད་གནང་བ་དང་། དེ་བཞིན་ལས་གཞིའི་འདིའི་ཐོག་འབྲེལ་ཡོད་འཐུན་འགྱུར་རོགས་རམ་གནང་མཁན་དང་། ལྷག་པར་བོད་མིའི་སྒྲིག་འཛུགས་དང་ཇར་མན་རོགས་ཚོགས་གཉིས་ནས་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་གནང་ཡོད། སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་དྲན་རྟེན་ཕྱག་རྟགས་ཕུལ་རྗེས། སྲིད་སྐྱོང་མཆོག་ནས་འཇར་མན་རོགས་ཚོགས་ཀྱི་ཚོགས་གཙོ་ཟུར་པ་གཙོས་པའི་སྐུ་ཚབ་དང་འབྲེལ་ཡོད་ཁང་བཟོ་འཆར་འགོད་པ་རྣམས་ལ་དྲན་རྟེན་ཕྱག་རྟགས་གནང་ཡོད། དེ་རྗེས་འཇར་མན་རོགས་ཚོགས་ཀྱི་ཚོགས་གཙོ་ཟུར་པ་ལྕམ་ཧེ་ཊི་མེ་ཡར་ལགས་ཀྱིས་འཚམས་འདྲི་དང་སྦྲགས་ལས་འཆར་འདི་ཁོང་ལ་ངོ་སྤྲོད་བྱུང་ཚུལ་དང་ ཁོང་ཉིད་ནས་ཁང་མིག་རེ་ལ་ཆུ་ཚ་པོ་བཟོས་ས་ཞིག་དང་ཇ་ཕོར་བཅས་ཞལ་འདེབས་སུ་གནང་ཡོད་པ་མ་ཟད། སླད་མ་འོངས་པར་ཁང་པ་དེ་ཉིད་རྒྱུན་གནས་ཐུབ་ཐབས་སུ་བདག་གཅེས་གང་གཟབ་གནང་དགོས་པའི་འབོད་སྐུལ་གནང་བ་མ་ཟད། ཁང་པ་གསར་རྒྱག་གི་ལས་གཞིའི་ཐོག་དངོས་ཤུགས་བརྒྱུད་གསུམ་ནས་རོགས་རམ་དང་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུས་གནང་ཡོད།  དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཇར་མན་རོགས་ཚོགས་ནས་བཙན་བྱོལ་བོད་མིའི་སྤྱི་ཚོགས་བདེ་དོན་སླད་ལོ་ངོ་བཅུ་ཕྲག་མང་པོའི་རིང་མཐུན་རྐྱེན་རོགས་རམ་གནང་དང་གནང་མུས་ཡིན་པའི་སྐོར་ནན་བརྗོད་གནང་བ་དང་སྦྲགས། ཐེངས་འདིའི་ཁང་པ་གསར་རྒྱག་གི་ལས་གཞི་ཐོག་བོད་མིའི་སྒྲིག་འཛུགས་ནས་བརྒྱ་ཆ་ ༥༠ ལྷག་རོགས་སྐྱོར་གནང་བ་དང་འཕྲོད་ལྷག་རྣམས་འཇར་མན་རོགས་ཚོགས་ནས་མཐུན་འགྱུར་གནང་ཡོད་པ་འགྲེལ་བརྗོད་གནང་ཡོད། དེ་བཞིན་མ་འོངས་ཁང་པ་དེ་ཉིད་སྲ་བརྟན་དང་རྒྱུན་གནས་ཐུབ་སླད་ཁང་པ་གསར་པའི་སྤུས་ཚད་དང་བཀོད་རིས་སོགས་ལ་ཞིབ་ནན་གྱིས་ཁང་བཟོ་འཆར་འགོད་པ་མང་པོའི་བསམ་ཚུལ་བསྡུ་ལེན་དང་དྷ་སའི་གནམ་གཤིས་ཀྱི་འགྱུར་གྲོས་སོགས་གནས་སྟངས་མང་པོར་ཞིབ་འཇུག་གིས་འཛུགས་བསྐྲུན་གནང་བ་ཞིག་ཆགས་ཀྱི་ཡོད་པ་དང་། དེ་བཞིན་ཉི་འོད་རྩོལ་ཤུགས་ཀྱི་མཐུན་རྐྱེན་སོགས་སྦྱར་ཡོད་པས། དགེ་ལས་སློབ་མ་རྣམས་ནས་ཁང་པར་བདག་གཅེས་ཡག་པོ་གནང་དགོས་པའི་འབོད་སྐུལ་གནང་ཡོད། ...

༄༅། །ཕྱི་ལོ་ ༢༠༢༦ ཟླ་བ་ ༠༤ ཚེས་ ༡༧ ཉིན་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་དྷ་ས་མེག་གྷན་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་རྣམས་ལ་སྦྱོང་བརྡར་སྤྲོད་ཕྱོགས་ཀྱི་སྲིད་བྱུས་ངོ་སྤྲོད་ཟབ་སྦྱོང་ཞིག་བསྐོང་ཚོགས་གནང་ཡོད། སྐབས་དེར་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་ཀརྨ་ཡེ་ཤེས་མཆོག་དང་། ལས་བྱེད་འདེམས་ལྷན་གྱི་དྲུང་ཆེ་བསྟན་འཛིན་ལེགས་གྲུབ་ལགས། ཟབ་ཁྲིད་པ་སྐུ་ཞབས་ཝི་ཝེག་ཤར་མ་ལགས་གཙོས་པའི་ལྷན་ཁང་ཁག་གི་དྲུང་ཆེ་དང་ལྷན་ཁང་སོ་སོའི་སྦྱོང་བརྡར་འབྲེལ་མཐུད་པ་བཅས་ཁྱོན་ཚོགས་བཅར་བ་གྲངས་ ༢༥ ཙམ་ཚོགས་ཞུགས་གནང་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༤༥ ཙམ་ལ་ཟབ་སྦྱོང་དབུ་འཛུགས་ཀྱིས་ཐོག་མར་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག་གིས་ཟབ་སྦྱོང་གི་དགོས་དམིགས་དང་འབྲེལ་ནས་གསུང་བཤད་གནང་སྐབས་སྤྱིར་བོད་མིའི་སྒྲིག་འཛུགས་ཀྱི་ལས་བྱེད་རྣམས་ཁྲིམས་ཀྱི་འོག་གནས་བཞིན་ཡོད་སྟབས། བོད་མིའི་སྒྲིག་འཛུགས་ཀྱི་བཅའ་ཁྲིམས་དང་རྩ་འཛིན་ལམ་སྟོན་ལ་བརྩི་བཀུར་དགོས་གལ་ཡིན་ཞིང་། ལྷག་པར་སྲི་ཞུའི་ལས་བྱེད་ཡིན་པའི་ཆ་ནས་གང་ཟག་སུ་ཡིན་མིན་ལ་མ་ལྟོས་པར་ཁྲིམས་ཀྱི་རྭ་བའི་ནང་ནས་ཕྱག་ལས་གནང་རྒྱུ་གནད་འགག་ཆགས་ཡོད་ཅེས་དང་། དེ་ནས་ཁོང་གིས་བཅའ་ཁྲིམས་ཀྱི་དོན་ཚན་བཞི་པ་སྟེ། བོད་མིའི་སྒྲིག་འཛུགས་ཀྱི་རྩ་དོན་ཞེས་པའི་ནང་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་འགྲོ་བ་མིའི་ཐོབ་ཐང་དང༌། དཔལ་འབྱོར། སྤྱི་ཚོགས། རིག་གཞུང་གི་ཐོབ་ཐང༌། ཡུལ་མི། སྲིད་དོན་གྱི་ཐོབ་ཐང་བཅས་ལ་བརྩི་སྲུང་བྱེད་པ་དང༌། འཛམ་གླིང་ཡུལ་ལུང་གཞན་ཁག་ནས་ཀྱང་བརྩི་སྲུང་ཡོང་ཐབས། ལྷག་པར་བོད་དོན་བདེན་མཐའ་གསལ་ཐབས་དང༌། བོད་མི་ཡོངས་ཀྱི་བསམ་སྤྱོད་དང་དངོས་པོའི་ཁེ་ཕན་ཡར་རྒྱས་གཏོང་བའི་ལས་འགན་བསྒྲུབ་རྒྱུ་ཞེས་ཡིན་པས་རྩ་དོན་དེའི་ཐོག་ནས་ཕྱག་ལས་གནང་དགོས་ཀྱི་ཡོད་ཅེས་གསུངས།དེ་བཞིན་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་མཆོག་གིས་བཅའ་ཁྲིམས་ལེའུ་གསུམ་པ་བོད་མིའི་སྒྲིག་འཛུགས་ཀྱི་བྱེད་སྒོ་ལམ་སྟོན་གྱི་དོན་ཚན་ ༡༥ དང་། ༡༦། ༡༧། ༡༨ བཅས་དོན་ཚན་ཁག་བཞི་ངོ་སྤྲོད་དང་། དེ་དག་སྲི་ཞུའི་ལས་བྱེད་ཅིག་ཡིན་པའི་ཆ་ནས་ཡིད་ལ་འཇོག་དགོས་རྒྱུའི་གལ་གནད་ཐོག་ནན་བརྗོད་དང་། ད་བར་ལྷན་ཁང་ཁག་དང་སྒྲིག་འཛུགས་ཁག་ནས་ལས་བྱེད་རྣམས་ལ་སྦྱོར་བརྡར་རིམ་པ་ཕུལ་ཡོད་ནའང་སྲིད་བྱུས་ཀྱི་ཡིག་ཆ་དམིགས་བསལ་མེད་པ་དང་། སྦྱོང་བརྡར་ད་ེདག་ལས་བྱེད་འདེམས་བསྐོ་ལྷན་ཁང་གིས་དགོས་མཁོ་དང་བསྟུན་ནས་ཟབ་སྦྱོང་ཕུལ་བ་ལས་སྤྱི་ཡོངས་ཀྱི་སྲིད་བྱུས་གཏན་འབེབས་མེད་སྟབས། བཀའ་ཤག་སྐབས་བཅུ་དྲུག་གིས་བོད་མིའི་སྒྲིག་འཛུགས་ཀྱི་སྲིད་བྱུས་གཏན་འབེབས་གནང་བ་དང་ཆབས་ཅིག དེའི་ནང་དུ་ལས་བྱེད་ཀྱི་ནུས་པ་གོང་སྤེལ་གྱི་དགོས་མཁོ་ལ་གཟིགས་ཏེ་སྦྱོང་བརྡར་སྤྲོད་ཕྱོགས་ཀྱི་སྲིད་བྱུས་གཏན་འབེབས་གནང་ཡོད་སྐོར་འགྲེལ་བརྗོད་གནང་བ་མ་ཟད། བོད་མིའི་སྒྲིག་འཛུགས་ཀྱི་ལས་བྱེད་རྣམས་ལ་སྦྱོང་བརྡར་སྤྲོད་ཕྱོགས་ཀྱི་སྲིད་བྱུས་དེའི་ནང་ཁྲིམས་སྒྲིག་གི་སྒྲོམ་གཞི་དང་།...

༄༅། །ཕྱི་ལོ་ ༢༠༢༦ ཟླ་བ་ ༤ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་བལ་ཡུལ་སོགས་ཡུལ་ལུང་འདྲ་མིན་གྱི་དད་ལྡན་མཇལ་བཅར་བ་སུམ་བརྒྱ་ལྷག་ལ་མཇལ་ཁ་སྩལ་ཡོད་པ་རེད།                                                               ...

༄༅། །ཕྱི་ལོ་ ༢༠༢༦ ཟླ་བ་ ༤ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྒྱལ་བའི་ཕོ་བྲང་དུ་འབྲུག་ཡུལ་སོགས་ཀྱི་དད་ལྡན་མཇལ་བཅར་བ་སུམ་བརྒྱ་ལྔ་བཅུ་ཙམ་ལ་མཇལ་ཁ་དང་བཀའ་སློབ་བཀའ་དྲིན་སྩལ་ཡོད། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་མཇལ་སྐབས། རྒྱ་གར་གྱི་འཚེ་མེད་ཞི་བའི་རིག་གཞུང་དེ་ཧ་ཅང་རྩ་ཆེན་པོ་ཡིན་པར་བཀའ་སྩལ་ཡོད་པ་དང་། མཇལ་བཅར་བ་ཞིག་གི་བཀའ་འདྲི་དང་འབྲེལ་སྐྱེས་ཙམ་ནས་ཨ་མའི་བརྩེ་བ་ཞིག་ཡོད་པ་དེ་རྒྱ་ཆེ་ས་ནས་སྒོམ་ཐུབ་ན་ཧ་ཅང་ཡག་པོ་ཡོད་པ་རེད། ངོས་རང་ཡང་ཞོགས་པ་གཉིད་སད་པ་དང་བརྩེ་བ་སྒོམ་བཞིན་ཡོད། ང་ཚོས་འཕགས་པ་སྤྱན་རས་གཟིགས་ཟེར་གྱི་ཡོད། སྤྱན་རས་གཟིགས་ནི་སྙིང་རྗེའི་ལྷ་རེད། ངོས་ཀྱི་བསམ་བློའི་ནང་དུ་སྤྱན་རས་གཟིགས་རང་གི་སྤྱི་བོར་ཡོད་བསམ་ནས་སྡོད་ཀྱིི་ཡོད། ཅེས་བཀའ་སློབ་སྩལ་རྗེས་ནང་པའི་ཚན་རིག་དང་ལྟ་གྲུབ་ཀུན་བཏུས་དེབ་ཕྲེང་གཉིས་པ་དང་བཞི་པ་ཨིན་བསྒྱུར་ཞུ་མཁན་ཕྱི་རྒྱལ་བ་བདེ་ཆེན་ལགས་ཀྱིས་མཇལ་ཁ་དང་། སྙིང་རྗེ་ཤུགས་ཆེ་རུ་སྐྱེས་ཐུབ་པའི་ཐུགས་སྨོན་སྐྱབས་འཇུག་ཞུས།དེ་ནས་ཨི་ཊ་ལཱི དང་ཐའེ་ཝན། ཨོསྟྲེ་ལི་ཡཱ། ཝི་ཡཏ་ནཱམ། སོག་ཡུལ་སོགས་ཡུལ་ལུང་འདྲ་མིན་ནས་ཆེད་དུ་ཕེབས་པའི་མཇལ་བཅར་བ་རྣམས་ལ་རིམ་པར་མཇལ་ཁ་སྩལ་བ་དང་། ཟླ་འདིའི་ཚེས་ ༥ ནས་ ༩ བར་དཔལ་གཤེན་བསྟན་སྨན་རིའི་གླིང་དུ་གཞུང་ཆེན་རིས་མེད་བགྲོ་གླེང་ཐེངས་ ༩ པའི་ཚོགས་བཅར་བ་རྣམས་ནས་མཇལ་ཁ་ཞུས་པར་བཀའ་སློབ་སྩལ་དོན། གཞུང་ཆེན་མོར་སློབ་གཉེར་བྱ་རྒྱུ་ཧ་ཅང་གལ་ཆེན་པོ་རེད། ང་ཚོའི་བོད་ལ་བཀའ་པོད་ལྔ་ཞེས་ཕར་ཕྱིན། དབུ་མ་སོགས་གཞུང་ཆེན་ལ་བལྟས་ཏེ་བསམ་བློའི་ནང་བང་སྒྲིག་ནས་ཡོང་སྐབས་གཞན་དང་མི་འདྲ་བ་ཞིག་རེད། ངོས་རང་ཡང་ཆུང་ཆུང་སྐབས་སུ་ཕར་ཕྱིན་ནས་བཟུང་བལྟས་པ་ཡིན། ཞེས་དང་། འབྲུག་ནས་དད་ལྡན་ ༣༠ པའི་ཁྲོད་འབྲས་སྤུངས་བློ་གསལ་གླིང་དུ་ཆོས་ཞུགས་ཀྱིས་ལོ་ཉི་ཤུར་སློབ་གཉེར་གནང་བའི་དགེ་བཤེས་ཤིག་གིས་ཚེ་རབས་རྗེས་འཛིན་གྱི་གསོལ་འདེབས་དང་༸སྐུ་ཚེ་ཞབས་པད་བརྟན་པའི་སྨོན་ལམ་ཞུས་མཚམས་༸གོང་ས་མཆོག་གིས་དགེ་བཤེས་ལགས་ཀྱིས་གཞུང་བཀའ་པོད་ལྔ་རེ་རེར་གཟིགས་ཡོད་མེད་བཀའ་འདྲི་དང་འབྲེལ་གཞི་གསུམ་གྱི་ཆོ་ག་འདུལ་བ་ནི་ཧ་ཅང་གལ་ཆེན་པོ་ཡིན་པར་བཀའ་སྩལ་བ་དང་། འབྲུག་ཡུལ་ནས་ཆེད་དུ་མཇལ་ཁར་ཕེབས་པའི་དད་ལྡན་རྣམས་ཀྱིས་རང་ལུགས་གླུའི་མཆོད་པ་ཕུལ། གཞན་ཡང་མཇལ་བཅར་བའི་ཁྲོད་ཀྱི་བྱིས་པ་གཉིས་ཀྱིས་ཨཕ་རི་ཀར་སྐྱེས་པའི་ལོ་སུམ་སྟོང་གི་ལོ་རྒྱུས་ཡོད་པའི་དཔག་བསམ་ཤིང་གི་འདྲ་པར་སྤྱན་འབུལ་དང་། དཔག་བསམ་ཤིང་གི་སོན་ཕུལ་ཏེ་མགོན་པོ་མཆོག་གི་༸སྐུ་ཚེ་ཞབས་པད་བརྟན་པའི་གསོལ་འདེབས་ཞུས་ཡོད།...

༄༅། །སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་གཏན་འབེབས་གནང་བའི་བོད་ཀྱི་རྒྱལ་དར་དང་། རྒྱལ་རྟགས། རྒྱལ་གླུ་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཏན་འབེབས་གནང་བ་བཞིན། བོད་རྒྱལ་ཁབ་ཆེན་པོའི་རྒྱལ་གླུ་འདི་ཉིད་གླུ་དབྱངས་དང་བཅས་གཤམ་དུ་འཁོད་ཡོད་པ་བཅས། ། Tibetan National Anthem ( Group Vocals) Tibetan National Anthem (Instrumental) Tibetan National Anthem (Solo)

༄༅། །ཕྱི་ལོ་ ༢༠༢༦ ཟླ་བ་ ༠༤ ཚེས ༠༨ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་དོན་ཐོག་ཡུན་རིང་ནས་ཤ་ཚ་རྒྱབ་སྐྱོར་གནང་མཁན་སྐུ་ཞབས་ཁིརི་ཤི་ཡན་ཤྭ་ཛི་ཤི་ལིང་ (Dr. Christian Schwarz-Schilling ) ལགས་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་དམ་པ་ཁོང་གི་ནང་མི་ཉེ་འབྲེལ་ཡོངས་ལ་ཐུགས་གསོ་ཞུས་གནང་ཡོད། དེ་ཡང་ཐུགས་གསོའི་གསུང་འཕྲིན་ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། སྐུ་ཞབས་ཁིརི་ཤི་ཡན་ཤྭ་ཛི་ལགས་ནི་ཇར་མ་ནི་དང་རྒྱལ་སྤྱིའི་ཆབ་སྲིད་ནང་ཐུགས་འགན་ཆེ་བཞེས་གནང་མཁན་ཞིག་དང་། བོད་རྒྱ་འབྲེལ་མོལ་ཐོག་གཡོ་བ་མེད་པའི་རྒྱབ་སྐྱོར་གནང་མཁན་ཞིག་ཡིན། འདས་པའི་ལོ་ཡུན་ནང་བོད་དོན་དང་འབྲེལ་བའི་ཚོགས་འདུ་སོགས་ཀྱི་བརྒྱུད་སྐུ་ཞབས་ཁིརི་ཤི་ཡན་ལགས་དང་མཇལ་འཕྲད་ཐེངས་མང་བྱུང་བའི་ཁྲོད། དམ་པ་ཁོང་ནི་ཇར་མ་ནིའི་ཆབ་སྲིད་པ་གྲགས་ཅན་ཙམ་དུ་མ་ཟད། རྩོད་རྙོག་རྣམས་ཞི་བའི་ལམ་ནས་སེལ་རྒྱུར་ཆོད་སེམས་བརྟན་པོ་འཛིན་མཁན་ཞིག་ཡིན་པ་ཤེས་སོང་། ཞེས་དང་། དེ་བཞིན་སྐུ་ཞབས་ཁིརི་ཤི་ཡན་ལགས་ཀྱིས་ལོ་ངོ་མང་པོའི་རིང་བོད་མིའི་སྒྲིག་འཛུགས་ཀྱི་འགོ་ཁྲིད་ལྷན་ཐུག་འཕྲད་ཀྱིས་བོད་དོན་ལ་རྒྱབ་སྐྱོར་གནང་ཡོད་པ་མ་ཟད། ཁོང་ལ་ཕྱི་ལོ་ ༢༠༡༣ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་བདེན་པའི་འོད་སྣང་ (Light of Truth) ཞེས་པའི་གཟེངས་རྟགས་འབུལ་བཞེས་གནང་ཡོད། ང་ཚོས་བོད་ཀྱི་ཡུན་རིང་གྲོགས་པོ་དང་། དམ་ཚིག་ལྡན་པའི་ཁྲིམས་རྩོད་པ། དེ་བཞིན་འགྲོ་བ་མི་བཟང་པོ་ཞིག་འདས་གྲོངས་སུ་གྱུར་པར་མྱ་ངན་ཞུ་བཞིན་ཡོད་པ་དང་། དཀའ་ངལ་ཀྱི་དུས་སྐབས་འདིར་ང་ཚོས་ཁྱེད་ཀྱི་ཤུལ་ལུས་ནང་མི་རྣམས་ལ་ཐུགས་གསོ་ཞུ་ཡི་ཡོད། ཅེས་འཁོད་ཡོད། །

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  དེ་རིང་ང་ཚོ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་དང་མཐའ་མ་ཆགས་ཀྱི་ཡོད་རེད། གྲོས་ཚོགས་ཀྱི་ལས་ཉིན་བཅུ་གསུམ་དེའི་ནང་ལ་ཐོག་མར་ཚོགས་གཙོ་གཉིས་ཀྱི་ཐོག་ནས་ལས་རིམ་བང་བསྒྲིགས་པ་གཞིར་བཟུང་དེ་རིང་ལེགས་གྲུབ་ཀྱི་ཉིན་མོ་དེ་ཆགས་བསྡད་ཡོད། དེར་བརྟེན་ང་ཚོས་ཚོགས་འདུའི་ནང་ལ་ལས་རིམ་མང་པོ་ཞིག་བསྐྱངས་ཐུབ་ཡོད་རེད། དེའི་ནང་ནས་གཞུང་འབྲེལ་གྲོས་ཆོད་གྲོས་འཆར་གསུམ་ནས་གཅིག་དེ་༸སྐུའི་གཅུང་པོ་སྤྱི་ཟུར་མངའ་རིས་རིན་པོ་ཆེ་མཆོག་ལ་མྱ་ངན་གུས་འདུད་ཀྱི་གྲོས་ཆོད་ཅིག་གཏན་འབེབས་བྱུང་བ་དང་། དེ་ག་ནང་བཞིན་གཉིས་པ་དེ་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་ཆོད། དེ་བཞིན་བཀའ་ཤག་ནས་བསྣམས་ཕེབས་པའི་གཞུང་འབྲེལ་གྲོས་ཆོད་གྲོས་འཆར་བཅས་ང་ཚོས་གྲོས་ཆོད་རིགས་གསུམ་གཏན་འབེབས་བྱུང་ཐུབ་ཡོད་རེད། དེ་ཡིན་དུས་གཙོ་བོ་གྲོས་ཆོད་ཀྱི་ནང་དོན་ལ་བགྲོ་གླེེང་ཞུས་ཡོང་དུས་བོད་མིར་གདུང་སེམས་མཉམ་སྐྱེད་ཀྱི་གྲོས་ཆོད་དེ་ཕྱི་ལོ་ ༢༠༠༨ ནས་ད་ལྟ་བར་དུ་གྲོས་ཚོགས་ནང་ལ་སླེབས་བསྡད་པའི་གནས་སྟངས་ཤིག་ཆགས་ཡོད་རེད། གཙོ་བོ་དེ་གང་རེད་ཟེར་ན། བོད་ནང་གི་ཛ་དྲག་གནས་སྟངས་དེ་མུ་མཐུད་ནས་གནས་བསྡད་པ་དེའི་ཐོག་ནས་ང་རང་ཚོས་སེམས་ཁུར་དང་། དེ་ག་ནང་བཞིན་རྒྱལ་སྤྱིའི་སྤྱི་ཚོགས་ལ་ཞུ་སྐུལ་བྱེད་རྒྱུས་མཚོན་པའི་ཆབ་སྲིད་ཀྱི་དཀའ་ངལ་ཟེར་ནའང་མི་འདུག བོད་རྒྱ་གཉིས་ཀྱི་ཆབ་སྲིད་ཀྱི་དཀའ་རྙོག་སེལ་ཐུབ་པར་ང་ཚོར་ཐབས་ལམ་ག་རེ་འདུག དེའི་ཐོག་ནས་རྒྱལ་སྤྱིའི་སྤྱི་ཚོགས་ནང་ལ་རྒྱབ་སྐྱོར་བཙལ་རྒྱུ། དེ་ག་ནང་བཞིན་བོད་ནང་གི་བོད་མིའི་གནས་སྟངས། རྒྱ་ནག་གིས་བོད་ཀྱི་ཐོག་ལ་ཆབ་སྲིད་ཀྱི་ཁ་ཕྱོགས་འཛིན་སྟངས། དེ་བཞིན་འཛིན་སྐྱོང་བཀའ་ཤག་གི་ཐོག་ནས་དེར་དམིགས་བསལ་འགན་ཁུར་བཞེས་རྒྱུ་ག་རེ་ཡོད་མེད་ཐོག་ནས་བཀའ་མོལ་བྱུང་སོང་། གཙོ་བོ་དེ་ད་ལྟ་ང་རང་ཚོས་བསམ་བློ་གཏོང་ཡག་ལ། བོད་ཀྱི་བདེན་པའི་འཐབ་རྩོད་དེ་འཚེ་མེད་ཞི་བའི་ཐོག་ནས་བོད་རྒྱའི་དཀའ་རྙོག་སེལ་ཐུབ་པར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཞིར་བཟུང་ཐབས་ལམ་ཞིག་བཏོན་ཡོད་རེད། དེ་ནང་བཞིན་དཀའ་ངལ་དེ་སེལ་བར་ཕན་ཚུན་འབྲེལ་མོལ་བྱས་ནས་དཀལ་ངལ་སེལ་ཐུབ་པའི་ཐབས་ལམ་ཉག་ཅིག་དེ་ཆགས་བསྡད་ཡོད་རེད། འབྲེལ་ལམ་ཐོག་ནས་ཐབས་ལམ་བརྒྱུད་ནས་ཡོང་དུས་ཕྱོགས་གཉིས་ཀས་ཕན་ཚུན་བཀའ་མོལ་ཞུ་རྒྱུ། གནད་དོན་དང་དེའི་བསམ་ཚུལ་དེ་ཚོ་རྟོགས་ཐུབ་རྒྱུ་གལ་ཆེན་པོ་ཞེ་པོ་ཆགས་བསྡད་ཀྱི་ཡོད་རེད། དེ་ཡིན་དུས་འདིའི་ཐོག་ནས་རྒྱ་ནག་གཞུང་གིས་ཡིན་ནའང་། བོད་ཀྱི་གནད་དོན་དེར་བཏང་སྙོམས་མེད་པའི་ཐོག་ནས་གལ་ཆེན་པོ་བརྩི་ཐུབ་པར་ང་ཚོར་ཐབས་ལམ་ག་རེ་འདུག དེ་ག་ནང་བཞིན་རྒྱལ་སྤྱིའི་སྤྱི་ཚོགས་དེར་ཤུགས་རྐྱེན་ག་རེ་སྤྲད་ཐུབ་ཀྱི་འདུག དེ་བཞིན་ང་རང་ཚོ་བོད་པ་རང་གི་ངོས་ནས་དེའི་ཐོག་ལ་དམིགས་བསལ་འགན་ཁུར་ག་རེ་ཞུ་ཐུབ་དགོས་ཀྱི་འདུག དེ་ཚོའི་གྲས་དེ་ང་ཚོས་མུ་མཐུད་ནས་བོད་དོན་བདེན་མཐའ་མ་གསལ་བར་དུ་རྒྱུན་འཁྱོངས་བྱེད་ཐུབ་དགོས་པ་དེ་གལ་ཆེན་པོ་ཞེ་དྲག་ཆགས་ཀྱི་ཡོད་རེད། དེའི་ཐོག་ནས་རྒྱ་ཆེའི་མང་ཚོགས་རེད། ང་ཚོ་བོད་དོན་ལ་རྒྱབ་སྐྱོར་བྱེད་མཁན་གྱི་གྲོགས་པོ་རྣམ་པ་རེད། དེ་ག་ནང་བཞིན་གཞུང་དང་སྒྲིག་འཛུགས་རེད། དེའི་ཐོག་ནས་དུས་རྒྱུན་ནས་ང་ཚོས་སྐུལ་མ་འདྲ་ཞུ་ཐུབ་དགོས་པ་དེ་གལ་ཆེན་པོ་ཞིག་ཆགས་བསྡད་ཀྱི་འདུག དེ་དང་མཉམ་དུ་དེ་རིང་གྲོས་ཚོགས་འདིར་བཀའ་ཤག་གི་གཞུང་འབྲེལ་གྲོས་ཆོད་ཀྱི་ཡིག་ཆ་གསར་པ་ཞིག་བསྣམས་ཕེབས་དགོས་པའི་གནས་སྟངས་ཆགས་ཡོད་རེད། ཉེ་ཆར་རྒྱ་ནག་མི་དམངས་འཐུས་མིའི་ཚོགས་ཆེན་གྱིས་ཕྱི་ཟླ་ ༣ ཚེས་ ༡༢ ལ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེ་རེད།...

༄༅། །ཕྱི་ལོ་ ༢༠༢༦ ཟླ་བ་ ༤ ཚེས་ ༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་དྲིལ་བོད་ཀྱི་འགྲེམས་སྟོན་ཁང་དུ་ཨིན་བོད་འབྲེལ་ལམ་དང་འབྲས་སྤྱི་སར་སྦེ་སིལ་སྒུལཌ་ (Frontier Diplomacy:Britain, Tibet and Sir Basil Gould) ཞེས་པའི་དུས་ཐུང་འགྲེམས་སྟོན་ཞིག་དབུ་འབྱེད་གནང་ཡོད།  དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༠ ཐོག་དཔལ་ལྡན་སྲིང་སྐྱོང སྤེན་པ་ཚེ་རིང་མཆོག་གིས་གཙོས་པའི་དཔལ་འབྱོར་དྲུང་ཆེ་གྱང་གསར་ཚེ་རིང་དོན་གྲུབ་ལགས་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། དམིགས་བསལ་སྐུ་མགྲོན་སྐུ་ཞབས་སྦེ་སིལ་སྒུལཌ་ལགས་ཀྱི་ཚ་མོ་ཕ་རིན་སིས་སི་ཀཊ་ལར་ལགས་དང་ཁོང་གི་སྐུ་ཟླ་ཇོ་ན་ཐན་ (Jonathan M Cutler) ལགས། ཕྱི་དྲིལ་དྲུང་འཕར་རྣམ་རྒྱལ་ཚེ་དབང་ལགས་བཅས་ཕེབས་ཞུགས་ཀྱིས་ཐོག་མར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་སྣང་གསལ་མར་མེ་ཞལ་ཕྱེ་གནང་གྲུབ་མཚམས་དུས་ཐུང་འགྲེམས་སྟོན་དབུ་འབྱེད་གནང་སྟེ། ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་སྐུ་མགྲོན་རྣམས་ལ་དུས་ཐུང་འགྲེམས་སྟོན་སྐོར་བསྐྱོད་གནང་ཡོད། དེ་རྗེས་དབུ་འབྱེད་མཛད་སྒོ་བསྐོང་ཚོགས་ཀྱིས་ཐོག་མར་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་ཕེབས་བསུའི་འཚམས་འདྲི་ཞུས་པ་དང་སྦྲགས། དུས་ཐུང་འགྲེམས་སྟོན་གྱི་ངོ་སྤྲད་དང་འབྲེལ་ནས་སྦེ་སིལ་སྒུལཌ་ལགས་ཀྱི་ཚ་མོ་ཕ་རིན་སིས་སི་ཀཌ་ལར་ལགས་དང་ཁོང་གི་ནང་མི་རྣམས་ནས་སྐུ་ཞབས་སྦེ་སིལ་སྒུལཌ་ལགས་ཀྱི་བོད་དང་འབྲེལ་བའི་ཡིག་ཚགས་གལ་ཆེན་གཉིས་འདི་ག་འགྲེམས་སྟོན་ཁང་དུ་ཞལ་འདེབས་གནང་བར་ཐུགས་རྗེ་ཆེ་ཞུས་ཡོད། ཕྱི་དྲིལ་བོད་ཀྱི་འགྲེམས་སྟོན་ཁང་ནས་ཡིག་ཚགས་དང་དངོས་རིགས་རྣམས་ཉར་ཚགས་བྱེད་པ་ཙམ་མ་ཡིན་པར། བོད་དོན་དྲིལ་བསྒྲགས་དང་བོད་ཀྱི་ལོ་རྒྱུས་ར་སྤྲོད་བྱེད་པར་གལ་ཆེར་འཛིན་ནས་ད་ཐེངས་དུས་ཐུང་གི་འགྲེམས་སྟོན་དེ་བཞིན་སྦེ་སིལ་སྒུལཌ་ལགས་ཀྱི་ནང་མི་རྣམས་ནས་འབོད་སྐུལ་ཞུས་པ་གཞིར་བཟུང་གོ་སྒྲིག་ཞུས་པ་ཞིག་ཡིན་པ་གསལ་བཤད་གནང་ཡོད། འབྲས་སྤྱི་སྦེ་སིལ་སྒུལཌ་ལགས་དང་འབྲེལ་བའི་འགྲེམས་སྟོན་དུས་ཚིགས་རེའུ་མིག་རྣམས་ཁོང་གིས་བརྩམས་པའི་དཔེ་དེབ་པདྨ་མའི་ནང་གི་ནོར་བུ་ཞེས་པར་གཞི་བཅོལ་གྱིས་བཟོས་པ་ཞིག་ཡིན་པ་དང་། འདིའི་ནང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་འཚོལ་ཞིབ་དང་འབྲེལ་བའི་གནད་དོན་དང་གསེར་ཁྲིའི་མངའ་སྲོལ་གྱི་མཛད་སྒོར་ཕེབས་བཅར་གནང་བའི་གནས་ཚུལ་ཁག་གསལ་ཡོད་སྐོར་བཅས་འགྲེལ་བརྗོད་གནང་ཡོད།དེ་ནས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ད་ལྟའི་ཆར་བོད་ནང་རྒྱ་གཞུང་གིས་བོད་ཀྱི་སྐད་དང་རིག་གཞུང་། ངོ་བོ་བཅས་པ་རྩ་མེད་བཏང་དང་གཏོང་མུས་ཡིན་པ་མ་ཟད། རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་ཀྱིས་བོད་ནི་གནའ་སྔ་མོ་ནས་རྒྱ་ནག་གི་ཆས་ཤས་ཡིན་པ་དྲིལ་བསྒྲགས་བྱེད་བཞིན་པའི་དུས་སྐབས་དེར་སྐུ་ཞབས་སྦེ་སིལ་སྒུལཌ་ལགས་ཁོང་ཉིད་འབྲས་སྤྱི་གནང་བའི་ལོ་རྒྱུས་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཁྲི་མངའ་གསོལ་གྱི་མཛད་སྒོའི་ཐོག་དངོས་སུ་བཅར་བའི་ལོ་རྒྱུས་ཀྱི་གནས་ཚུལ་ཁག་ལས་སྐབས་དེར་བོད་དེ་བཞིན་རང་བཙན་གཙང་མའི་རྒྱལ་ཁབ་ཀྱི་ངོ་བོའི་གནས་བབ་ཐོག་ཡོད་པ་གསལ་སྟོན་བྱེད་ཀྱི་ཡོད་པར་སོང་། ལོ་རྒྱུས་ནང་གལ་གནད་ཆེན་པོ་ཞིག་ཆགས་ཀྱི་ཡོད་སྐོར་ངོ་སྤྲོད་གནང་ཡོད། དེ་བཞིན་ཕྱི་དྲིལ་བོད་ཀྱི་འགྲེམས་སྟོན་ཁང་ནི་འགྲེམས་སྟོན་ཁང་གཞན་དང་མ་འདྲ་བར་བོད་ཀྱི་རྩ་དོན་དང་འབྲེལ་བའི་འགྲེམས་སྟོན་ཁང་ཞིག་ཆགས་ཀྱི་ཡོད་པས།...

༄༅། །ཕྱི་ལོ་ ༢༠༢༦ ཟླ་བ་ ༠༤ ཚེས་ ༠༡ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་མེས་དབོན་གཙུག་ལག་དཔེ་སྟོན་སློབ་གྲྭའི་བོད་ཀྱི་སྐད་ཡིག་ཁང་གསར་པ་དབུ་འབྱེད་གནང་སོང་། དེ་ཡང་ཤེས་རིག་བཀའ་བློན་མཆོག་སློབ་གྲྭར་ཕེབས་འབྱོར་སྐབས་སཾ་བྷོ་ཊ་བོད་སློབ་ཚོགས་པའི་འགན་འཛིན་ཚེ་རིང་དོན་གྲུབ་ལགས་དང་། སློབ་སྤྱི་ལེགས་བཤད་ཉི་མ་ལགས། དགེ་ཆེ་བསྟན་འཛིན་ཆོས་སྒྲོན་ལགས་ཀྱིས་གཙོས་སློབ་གྲྭའི་དགེ་ལས་སློབ་ཕྲུག་ཡོངས་ཀྱིས་ཕེབས་བསུ་ཞུས་གྲུབ་རྗེས་བཀའ་བློན་མཆོག་གིས་བོད་ཀྱི་སྐད་ཡིག་ཁང་དང་། ཨང་རྩིས་ཁང་གཉིས་དབུ་འབྱེད་ཀྱིས་གཟིགས་ཞིབ་གནང་སོང་།བོད་ཀྱི་སྐད་ཡིག་ཁང་གསར་འཛུགས་ཀྱི་ལས་གཞི་དེའི་འགྲོ་གྲོན་ཡོངས་རྫོགས་ཨ་རིར་གནས་བཞུགས་སྤྱི་ཟུར་པདྨ་ཕྱག་མཛོད་ཚང་ལགས་བརྒྱུད་ཡུ་ཊ་བོད་ཀྱི་ཐེབས་རྩ་ནས་ཨ་སྒོར་ཆིག་ཁྲི་ཐམ་པ་མཛའ་སྒྱུར་གྱིས་ཧིན་སྒོར་ ༨༩༣༥༠༠ ཐམ་པ་ཐབས་འཚོལ་གནང་ཡོད་པ་རེད། ལས་གཞི་འདི་ནི་མེས་དབོན་གཙུག་ལག་དཔེ་སྟོན་སློབ་གྲྭའི་བོད་ཡིག་དགེ་རྒན་རྣམས་ལ་སློབ་ཕྲུག་ཚོར་སྐད་ཡིག་གི་རྩལ་བཞི་སྦྱོང་བརྡར་སྤྲོད་ཆེད་དཔེ་གསར་བརྙན་འཕྲིན་འཕྲུལ་ཆས་ཆེ་བ་དང་། དྲྭ་རྒྱ། བོད་ཕྱི་ནང་ནས་ཐོན་པའི་བོད་ཡིག་གི་བྱིས་སྒྲུང་དང་དཔེ་དེབ་སྣ་ཚོགས། ནག་པང་། སྦྱར་པང་། དགེ་རྒན་ལ་ཀམ་པུ་ཊར་དང་ཚོན་ལྡན་པར་སྐྲུན་འཕྲུལ་འཁོར། སྒྲ་སྒམ་སོགས་དགོས་ངེས་ཀྱི་ཆ་རྐྱེན་ཡོངས་ཚང་བའི་བཙན་བྱོལ་བོད་མིའི་སློབ་གྲྭ་ཁག་གི་བོད་ཀྱི་སྐད་ཡིག་ཁང་དང་པོ་དེ་ཆགས་ཡོད། དབུ་འབྱེད་མཛད་སྒོ་གྲུབ་མཚམས་ཆུ་ཚོད་ ༡༡ ཙམ་ལ་ཤེས་རིག་བཀའ་བློན་མཆོག་གིས་སློབ་གྲྭའི་ཚོགས་ཁང་དུ་དགེ་སློབ་ཡོངས་ལ་རྒྱ་ནག་གཞུང་གི་བོད་ཀྱི་སྐད་ཡིག་དང་རིག་གཞུང་སིམ་ཡལ་གྱི་སྲིད་བྱུས་སྐོར་འགྲེལ་བརྗོད་གནང་ཞིང་། སྲིད་བྱུས་དེ་དག་གིས་བོད་ཀྱི་ངོ་བོ་དང་། སྐད་ཡིག རིག་གཞུང་བཅས་ལ་ཉེན་ཚབས་ཆེན་པོ་འཕྲད་བཞིན་ཡོད་སྐོར་དང་། བོད་ནང་རྟེན་གཞི་བྱས་པའི་སློབ་གྲྭ་ཁག་གི་ནང་རྒྱ་ཡིག་དེ་སློབ་ཚན་ངེས་ཅན་དུ་བཟོ་བ་མ་ཟད། རྒྱ་གཞུང་གིས་བོད་ནང་ཡར་རྒྱས་འཛུགས་སྐྲུན་གྱི་ལས་གཞི་ཞེས་མིང་འདོགས་ཏེ་རྒྱལ་སྤྱིའི་སྤྱི་ཚོགས་ལ་བསླུ་བྲིད་བྱེད་བཞིན་པ་སོགས་ཀྱི་སྐོར་གསུངས།དེ་ནས་བཀའ་བློན་མཆོག་གིས་བཙན་བྱོལ་བོད་མི་ཚོར་བོད་ཀྱི་སྐད་ཡིག་དང་། རིག་གཞུང་། ངོ་བོ་བཅས་ཉར་ཚགས་དང་གོང་འཕེལ་གཏོང་བར་འགན་འཁྲི་ཆེན་པོ་ཡོད་པ་དང་། ལྷག་པར་བོད་ནང་གི་བོད་མི་རྣམས་ལ་རང་གི་སྐད་ཡིག་དང་རིག་གཞུང་སྦྱོང་སྤྱོད་བྱེད་པའི་གོ་སྐབས་མེད་པའི་དུས་སུ་བཙན་བྱོལ་ནང་གི་སློབ་གྲྭ་དང་། དགེ་རྒན། ཕ་མ་བཅས་ལ་མ་འོངས་མི་རབས་གསར་པ་རྣམས་ལ་རང་གི་སྐད་ཡིག་དང་། རིག་གཞུང་སློབ་དགོས་པའི་ལས་འགན་འཕར་མ་ཞིག་ཡོད་ཅེས་གསུངས་པ་དང་། སློབ་གྲྭའི་དགེ་སློབ་ནས་བོད་ཀྱི་སྲོལ་རྒྱུན་རིག་གཞུང་སྲུང་སྐྱོབ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེ་བའི་བཀའ་སློབ་བརྩི་སྲུང་དགོས་པའི་ནན་སྐུལ་གནང་། དེ་མཚུངས་ཤེས་རིག་བཀའ་བློན་མཆོག་གིས་སློབ་ཕྲུག་རྣམས་ལ་སློབ་སྦྱོང་དང་ལྷན་སློབ་གྲྭའི་སྒྲིག་ཁྲིམས་འཁུར་དགོས་པ་དང་། དགེ་རྒན་དང་ལས་བྱེད་རྣམས་ལ་བརྩི་བཀུར་དགོས་པ།...

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༦ ཟླ་བ་ ༣ ཚེས་ ༣༡ ཉིན་གྱི་སྔ་དྲོ་ཆུ་ཚོད་ ༡༢།༠༠ ཙམ་གྱི་ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རྒྱ་གར་བློ་འདོན་ལྟེ་གནས་ཁང་འདྲ་མིན་གྱི་བོད་དང་། རྒྱ་ནག རྒྱ་གར་བཅས་ཀྱི་གནད་དོན་ཐོག་ཉམས་ཞིབ་གནང་མཁན་དང་། གཙུག་ལག་སློབ་གཉེར་ཁང་གི་སློབ་དཔོན་ཁག་གཅིག་བཅས་ལས་གྲུབ་པའི་སྐུ་ཚབ་ཚོགས་ཆུང་ཞིག་དང་ལྷན་མཇལ་འཕྲད་ཀྱིས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་སོང་། སྐབས་དེར་དཔལ་ལྡན་ཚོགས་གཙོ་མཆོག་གིས་ཐོག་མར་འཚམས་འདྲི་དང་སྦྲགས་གསུང་དོན། ང་ཚོ་བཙན་བྱོལ་ལ་སླེབས་ནས་ལོ་ངོ་ ༦༧ འགྲོ་ཡི་ཡོད་པ་དང་། དུས་ཚོད་དེའི་རིང་རྒྱ་གར་གཞུང་མང་གཉིས་ཀྱིས་བོད་ཀྱི་རྩ་དོན་ཐོག་མུ་མཐུད་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན།  དེ་ཡང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༤ ལོར་རྒྱ་ནག་ལ་ཆིབས་བསྒྱུར་བསྐྱངས་ནས་མའོ་ཀྲུ་ཞིས་གཙོས་པའི་རྒྱ་ནག་གི་འགོ་ཁྲིད་མང་ཆེ་བ་མཇལ་འཕྲད་དང་། རྒྱ་ནག་འཐུས་མིའི་ཚོགས་ཆེན་ནང་ལའང་ཕེབས་གནང་མཛད་ཡོད་པ། ཕྱིས་སུ་ཕྱི་ལོ་ ༡༩༥༦ ལོར་རྒྱ་གར་ལ་བདག་ཅག་གི་སྟོན་པ་ཤཱཀྱ་ཐུབ་པ་སྐུ་མྱ་ངན་ལས་འདས་ནས་ལོ་ངོ་ ༢༥༠༠ འཁོར་བའི་དུས་དྲན་སྲུང་རྩིའི་ཐོག་གདན་འདྲེན་ཞུས་པ་བཞིན་ཆིབས་བསྒྱུར་བསྐྱངས་ཤིང་། སྐབས་དེའི་རྒྱ་གར་གནད་ཡོད་དཔོན་རིགས་མང་པོ་ཞིག་དང་མཇལ་འཕྲད་གནང་ཡོད་པ་མ་ཟད། རྒྱ་གར་གྱི་གྲོས་ཚོགས་ནང་ཕེབས་གནང་མཛད་ཡོད། རྒྱ་གར་གྲོས་ཚོགས་ནང་འཐུས་མི་རྣམ་པས་སྲིད་བློན་སོགས་ལ་དྲི་བ་འབུལ་སྟངས་དང་། བགྲོ་གླེང་གནང་སྟངས། རྒྱ་ནག་མི་མང་འཐུས་མི་ཚོགས་ཆེན་ལྟ་བུ་མི་རེ་གཉིས་ཀྱིས་གང་བཤད་བཤད་མ་ཡིན་པར་གཟིགས་རྗེས། མགོན་པོ་མཆོག་རྒྱ་གར་གྱི་མང་གཙོའི་འགྲོ་ལུགས་ལ་ཐུགས་ཡིད་དབང་འཕྲོག་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་ནང་ལེགས་བཅོས་ལས་ཁུངས་དང་། གྱོད་ཞིབ་ལས་ཁུངས་གསར་འཛུགས་བསྐྱངས་ཏེ་སྔོན་མའི་བོད་ཀྱི་ལམ་ལུགས་ལ་བསྒྱུར་བཅོས་གནང་འགོ་བཙུགས་ཀྱང་། ཕྱི་ལོ་ ༡༩༥༩...

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡེ་ཤུའི་བླ་ཆེན་པོབ་ལིའོ་བཅུ་བཞི་པ་མཆོག་གིས་ Palm Sunday Mass ཐོག་འཛམ་གླིང་སྟེང་ཞི་བདེའི་འབོད་སྐུལ་གནང་བར་རྒྱབ་སྐྱོར་མཛད་ཡོད། དེ་ཡང་མགོན་པོ་མཆོག་གིས་པོབ་ལིའོ་མཆོག་གིས་མཚོན་ཆ་དང་འཚེ་བ་དོར་དགོས་པའི་འབོད་སྐུལ་དེ་ནི་འཛམ་གླིང་ནང་གི་ཆོས་ལུགས་ཆེ་ཁག་ཚང་མའི་བསླབ་བྱ་སྙིང་དོན་དེ་ཡིན་པ་དང་། བྱམས་པ་དང་། བརྩེ་བ། སྙིང་རྗེ། བཟོད་བསྲན་བཅས་ནི། ཡི་ཤུ་དང་ནང་པ། ཁ་ཆེ། ཧིན་རྡུ་སོགས་ཆོས་ལུགས་ཆེ་ཁག་ཐུན་མོང་གི་བསླབ་བྱ་གཅིག་མཚུངས་ཡིན་སྐོར་བཀའ་སྩལ་ཡོད། དེ་བཞིན་འཚེ་བ་ནི་ཆོས་ལུགས་གང་དུའང་མེདཔ་དང་། ལོ་རྒྱུས་ཐོག་ནས་ཕྱིར་བལྟས་བྱེད་ཚེ་འཚེ་བས་འཚེ་བ་ཁོ་ན་མ་གཏོགས་གཞི་བདེའི་རྩ་བ་ནམ་ཡང་བསྐྲུན་མི་ཐུབ་ཅེས་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཀྱིལ་ཤར་ཡུལ་གྲུའི་དམག་འཁྲུག་དང་། ཨུ་རུ་སུ་དང་ཡུ་ཀེ་རེན་དབར་གྱི་དམག་འཁྲུག་རྣམས་གྲོས་མོལ་དང་། རྒྱལ་འབྲེལ་ཐབས་བྱུས། ཕན་ཚུན་བསམ་བསམ་ཤེས་བཅས་ཀྱི་སྒོ་ནས་སེལ་ཐབས་དགོས་པའི་ལམ་སྟོན་མཛད་ཡོད་པ་དང་། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འཁྲུག་རྩོད་དེ་དག་མྱུར་དུ་མཚམས་འཇོག་ཡོང་བའི་ཐུགས་སྨོན་མཛད་ཡོད་པ་བཅས།།

༄༅། །ཕྱི་ལོ་ ༢༠༢༦ ཟླ་བ་ ༠༣ ཚེས་ ༣༡ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་འཛིན་སྐྱོང་དང་སྤྱི་ཚོགས་བདེ་དོན་ཐེབས་རྩའི་མཐུན་འགྱུར་འོག་གསར་བཞེངས་གནང་བའི་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་བོད་མིའི་སྒྲིག་འཛུགས་ཀྱི་ལས་ཤག་གསར་པ་དབུ་འབྱེད་གནང་སོང་། དེ་ཡང་གོང་ཚེས་ཉིན་གྱི་ཉིན་གུང་ཆུ་ཚོད་ ༡༢ ཐོག་གནས་ཆུང་གྲྭ་ཚང་གི་དགེ་འདུན་པ་ཁག་ཅིག་གིས་སྨོན་ལམ་གསུང་འདོན་གྱིས་རབ་གནས་གནང་གྲུབ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལས་ཤག་གསར་པ་དཔལ་འབར་ཁང་དང་། འཕེལ་རྒྱས་ཁང་གཉིས་རིམ་པར་དབུ་འབྱེད་དང་གཟིགས་སྐོར་གནང་སོང་། སྐབས་དེར་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་དང་། ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་ལགས། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས། དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། ལས་བྱེད་འདེམས་བསྐོ་ལྷན་ཁང་གི་དྲུང་ཆེ་བསྟན་འཛིན་ལེགས་གྲུབ་ལགས་གཙོས་པའི་ནང་སྲིད་ལས་ཁུངས་ཀྱི་ལས་བྱེད་བཅས་ཕེབས་ཡོད།།

༄༅། །ཕྱི་ལོ་ ༢༠༢༦ ཟླ་བ་ ༠༣ ཚེས་ ༣༡ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་གཏན་འབེབས་གནང་བའི་བོད་ཀྱི་རྒྱལ་དར་དང་། རྒྱལ་རྟགས། རྒྱལ་གླུ་བེད་སྤྱོད་བྱེད་ཕྱོགས་ཀྱི་སྒྲིག་གཞི་དང་འབྲེལ་བའི་ཁྲིམས་འཆར་ལ་མཚན་རྟགས་བཀོད་གནང་སོང་། སྐབས་དེར་དཔལ་ལྡན་སྲིད་སྐྱོང་མཆོག་གིས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་བོད་ཀྱི་རྒྱལ་དར་དང་། རྒྱལ་རྟགས། རྒྱལ་གླུ་བཅས་ཀྱི་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཏན་འབེབས་བྱས་ཡོད་ཅེས་དང་། དེ་ཡང་དེ་སྔ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གི་སྐབས་སུ་ཚོགས་ཆུང་བཙུགས་པ་དེ་འདྲ་བྱུང་ཡོད་པ་དང་། ད་ལྟའི་ཆར་ཚོགས་ཆུང་ཐེངས་གསུམ་པ་དེ་ཆགས་ཡོད་པ་འགྲེལ་བརྗོད་གནང་། ཁོང་གིས་རང་བཙན་ཡོད་པའི་རྒྱལ་ཁབ་ཆ་ཚང་ལ་རྒྱལ་དར་དང་རྒྱལ་རྟགས། རྒྱལ་གླུ་བཅས་ཡོད་པ་དང་། བོད་དེ་ལོ་རྒྱུས་ཐོག་ནས་རང་བཙན་རྒྱལ་ཁབ་ཅིག་ཡིན་པའི་གནས་བབ་ཐོག་ནས་གཏན་འབེབས་བྱེད་དགོས་རྒྱུ་གལ་ཆེན་པོ་ཆགས་ཡོད། ད་བར་སྤྱི་ཚོགས་ནང་བོད་ཀྱི་རྒྱལ་དར་གྱི་མཚོན་མདོག་དང་ཚད་གཞི་སྣ་ཚོགས་བེད་སྤྱོད་བྱེད་བཞིན་པས་རྒྱལ་དར་གཅིག་གྱུར་མེད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱིས་གཞུང་འབྲེལ་ཐོག་གཏན་འབེབས་གནང་ཐུབ་པ་དེས་ཕྱི་ཟླ་ལྔ་པ་ནས་བཟུང་གཅིག་གྱུར་བེད་སྤྱོད་བྱ་རྒྱུ་ཡིན་པ་གསུངས། དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་དྲ་ཚིགས་སྟེང་བོད་ཀྱི་རྒྱལ་དར་དང་རྒྱལ་རྟགས། རྒྱལ་གླུའི་པར་རིས་དང་ཚད་གཞི་བཅས་པ་འཇོག་རྒྱུ་ཡིན་པ་དང་། མི་མང་ཚོས་འདིར་གཞི་རྩར་བཞག་སྟེ་ཕབ་ལེན་གྱིས་བེད་སྤྱོད་གཏོང་དགོས་པའི་སྐུལ་མ་གནང་། ལྷག་པར་དུ་དེ་ཁྲིམས་སྒྲིག་གི་ངོ་བོའི་ཐོག་ནས་གཏན་འབེབས་གནང་ཡོད་པས་བོད་མི་ཚང་མས་བརྩི་སྲུང་བྱེད་དགོས་ཀྱི་ཡོད་ཅེས་གསུངས།།

༄༅། །ཕྱི་ལོ་ ༢༠༢༦ ཟླ་བ་ ༠༣ ཚེས ༢༩ ཉིན་ཁེན་བྷེ་རར་གསར་བཞེངས་གནང་བའི་དཔལ་ས་སྐྱའི་ཞི་བདེའི་གཙུག་ལག་ཁང་ (Sakya Peace Temple) དུ་དཔལ་ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག་གིས་ས་གནས་གནས་སྡོད་བོད་མི་རྣམས་ལ་བཀའ་སློབ་གནང་ཡོད། དེ་ཡང་སྐབས་དེར་དཔལ་ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག་གིས་མི་ལུས་རིན་ཆེན་སྐོར་བཀའ་སློབ་གནང་ཞིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ནང་པའི་བླ་ཆེན་རྣམས་ཀྱིས་བཀའ་སློབ་ལམ་སྟོན་བཞིན་བྱམས་སྙིང་རྗེ་དང་། བཟང་སྤྱོད་སྒོམ་པའི་ཐོག་མི་ཚེ་དོན་དང་ལྡན་པ་ཞིག་བསྐྱེལ་དགོས་པ་གསུངས། དེ་ནས་རིན་པོ་ཆེ་མཆོག་གིས་བོད་ཀྱི་སྐད་ཡིག་དང་། རིག་གཞུང་། ཆོས་ཕྱོགས་ཀྱི་ལམ་སྲོལ་བཅས་སྲུང་སྐྱོབ་དགོས་གལ་དང་། ཕ་མས་ཕྲུ་གུར་བོད་ཀྱི་སྐད་ཡིག་དང་རིག་གཞུང་སློབ་དགོས་པ། དེ་བཞིན་སྤྱི་ཚོགས་ནང་ཁུལ་ཆིག་སྒྲིལ་དང་། འཆམ་མཐུན་དགོས་པའི་ནན་སྐུལ་གནང་ཡོད།སྐབས་དེར་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་སྐུ་ཚབ་དོན་ཁང་གི་ལས་འགན་དང་བྱེད་སྒོ་ཁག་ངོ་སྤྲོད་གནང་བ་དང་སྦྲགས། རིན་པོ་ཆེ་མཆོག་གིས་བདུན་གཅིག་རིང་ཞི་བདེ་དགོན་དུ་བཀའ་སློབ་དང་རྗེས་གནང་བཀའ་དྲིན་གནང་བར་ཐུགས་རྗེ་ཆེ་ཞུས་ཡོད། དེ་རྗེས་ཁེན་བྷེ་ར་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་གཡུ་རྒྱལ་ལགས་ཀྱིས་ཚོགས་པའི་ལས་གཞི་སྤེལ་བ་ཁག་གི་སྐོར་ངོ་སྤྲོད་སྙིང་བསྡུས་གནང་ཡོད་པ་བཅས།།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༦ ཟླ་བ་ ༣ པའི་ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༡༡།༠༧ ཐོག་ལས་ཉིན་གྲངས་ ༡༣ རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་མཐའ་མའམ་བཅུ་གཅིག་པ་མཇུག་བསྒྲིལ་གནང་བ་དང་། སྐབས་དེའི་གྲོས་ཚོགས་ཐོག་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༦་་༢༧ ལོའི་ལས་ཁུངས་མ་ལག་དང་བཅས་པའི་འགྲོ་གྲོན་སྔོན་རྩིས་བཀའ་འཁྲོལ་བསྡོམས་སྒོར་ ༣,༤༠༨,༨༣༦,༣༠༤ སྤྱི་མོས་ཐོག་གཏན་འབེབས་དང་། དེ་བཞིན་བོད་ཀྱི་རྒྱལ་དར་དང་། རྒྱལ་རྟགས་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཏན་འབེབས། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་ཀྱི་ཕོགས་ཐོབ་དང་། ཟུར་ཕོགས། ལས་ཐོན་ཕོགས། ཐོབ་ཐང་གཞན་དག་བཅས་ཀྱི་སྒྲིག་གཞི་བསྐྱར་བཅོས་གཏན་འབེབས་བཅས་གནང་སོང་།   དེ་ཡང་སྔ་དྲོ་ཐོག་མར་ཁྲིམས་བཟོའི་ལས་དོན་བརྗོད་པ་གསུམ་པའི་ཐོག ཡིག་ཆ་ཨང་ ༢༨ པ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་ཀྱི་ཕོགས་ཐོབ་དང་། ཟུར་ཕོགས། ལས་ཐོན་ཕོགས། ཐོབ་ཐང་གཞན་དག་བཅས་ཀྱི་སྒྲིག་གཞི་བསྐྱར་བཅོས་ཁྲིམས་འཆར་དང་། ཡིག་ཆ་ཨང་ ༢༩ པ། བོད་ཀྱི་རྒྱལ་དར་དང་།...

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སཱ་ར་མུ་ལེ་ལི་ (Sarah Mullally) མཆོག་ཀེན་ཊར་བྷ་རི་ (Canterbury) ཡེ་ཤུའི་མཆོད་དཔོན་དུ་བསྐོ་གཞག་བྱུང་བར་དགའ་བསུའི་འཚམས་འདྲི་མཛད་ཡོད། དེ་ཡང་འཚམས་འཕྲིན་ནང་འཁོད་དོན། དེང་གི་འཆར་འཛམ་གླིང་ནང་དཀའ་ངལ་མང་དག་ཅིག་འཕྲད་བཞིན་ཡོད་པ་དེ་ནི་འགྲོ་བ་མིའི་གཞི་རྩའི་རིན་ཐང་ལ་ཚོད་བགམ་བྱེད་པའི་དུས་སྐབས་ཤིག་ཡིན་ཞེས་དང་། ཆོས་ལུགས་ཀྱི་དབུ་ཁྲིད་ཅིག་ཡིན་པའི་ཆ་ནས་རིན་ཐང་དེ་དག་བསྐྱར་གསོ་དང་མི་མང་ལ་རྒྱ་ཆེ་ས་ནས་དོ་སྣང་ཡོང་བར་བྱ་རྒྱུར་འགན་འཁྲི་དམིགས་བསལ་ཞིག་ཡོད་པ་ཐུགས་ཡིད་ཆེས་ཡོད་པ་བཀའ་སྩལ་བ་མ་ཟད། འཛམ་གླིང་གི་ཆོས་ལུགས་ཆེ་ཁག་ནས་བྱམས་བརྩེ་དང་། བཟོད་སེམས། ཚུལ་ཁྲིམས། ཆོག་ཤེས་བཅས་ཀྱི་བསླབ་བྱ་དང་། དེ་དག་ཉམས་ལེན་བྱེད་ཕྱོགས་ལ་ལམ་སྟོན་གནང་གི་ཡོད་པ་དང་། རིན་ཐང་དེ་དག་ནི་ང་ཚོས་འགྲོ་བ་མིའི་ཡོངས་ལ་དོན་སྙིང་ལྡན་པའི་སྒོ་ནས་མཉམ་སྤྱོད་གནང་ཐུབ་རྒྱུ་ཞིག་ཡིན་པ་བཀའ་སྩལ་འདུག དེ་བཞིན་མགོན་པོ་གང་ཉིད་མཆོག་གིས། སྐུ་ཉིད་ཨང་གི་ལི་ཀན་ཡི་ཤུའི་ལྷ་ཁང་ (Anglican Church) གི་བུད་མེད་ཀྱི་དབུ་ཁྲིད་ཐོག་མ་དེ་ཆགས་པར་ཐུགས་དགྱེས་ཚོར་ཆེན་པོ་བྱུང་ཞེས་དང་། བུད་མེད་རྣམས་གཞན་གི་བདེ་དོན་དང་ལྷག་པར་བྱམས་བརྩེའི་ཐོག་སེམས་ཁུར་ཆེ་བ་ཡོད་པ་ཚན་རིག་གི་དཔང་རྟགས་ཡོད་པར་བརྟེན། གལ་ཏེ་འཛམ་གླིང་འདིའི་ཐོག་བུད་མེད་ཀྱི་དབུ་ཁྲིད་མང་དག་གཅིག་འབྱུང་བ་ཡིན་ན། ཕན་ཚུན་བསམ་ཤེས་དང་ཞི་བདེ་ལྔག་ལྷག་ཡོང་རྒྱུའི་ཡིད་ཆེས་ཡོད་སྐོར་བཀའ་སྩལ་བ་དང་འབྲེལ། སྐུ་ཉིད་ཀེན་ཊར་བྷ་རི་ (Canterbury) ཡེ་ཤུའི་མཆོད་དཔོན་དུ་བསྐོ་གཞག་བྱུང་བ་ནི་རེ་བའི་སྒྲོན་མེ་ཞིག་ཀྱང་ཡིན། ཞེས་དང་། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སཱ་ར་མུ་ལེ་ལི་མཆོག་ལ་ཐུགས་སྨོན་མཛད་ཡོད་པ་བཅས། །

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༢༨ དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་གསར་དུ་བདམས་ཐོན་བྱུང་བའི་བལ་ཡུལ་གྱི་སྲིད་བློན་གསར་པ་སྐུ་ཞབས་བལེན་དྲ་ཤཱ་ (Balendra Shah) མཆོག་ལ་དགའ་བསུའི་འཚམས་འདྲི་ཞུས་གནང་ཡོད། དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས་ཉེ་ལམ་ (Gen z) གཞོན་སྐྱེས་ཀྱིས་སྣེ་ཁྲིད་པའི་ལས་འགུལ་འདིའི་རྗེས་ལོ་ན་ཆུང་ཤོས་ཀྱི་སྲིད་བློན་དུ་བདམས་ཐོན་བྱུང་ཡོད་པ་ནི་བལ་ཡུལ་མི་མང་དང་། ལྷག་པར་བལ་ཡུལ་གྱི་གཞོན་སྐྱེས་ཚོའི་མངོན་འདོད་མཚོན་གྱི་ཡོད། ཅེས་དང་། དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་དང་བལ་ཡུལ་དབར་དུས་རབས་མང་པོའི་རིང་ལོ་རྒྱུས་དང་རིག་གཞུང་གི་འབྲེལ་བ་དམ་ཟབ་ཡོད་པ་དང་། ཕྱིས་སུ་བོད་ས་བཙན་བཟུང་བྱས་རྗེས་བོད་མི་རྣམས་བལ་ཡུལ་དུ་བཙན་བྱོལ་དུ་འབྱོར་སྐབས་བོད་མི་རྣམས་ཀྱིས་སོ་སོའི་རིག་གཞུང་ཉར་ཚགས་ཙམ་དུ་མ་ཟད། བལ་ཡུལ་གྱི་སྤྱི་ཚོགས་དང་དཔལ་འབྱོར་གོང་འཕེལ་ལ་ཕན་གྲོགས་བྱེད་ཐུབ་པ་འདིས། ཕྱོགས་གཉིས་ཀྱི་འབྲེལ་ལམ་སྔར་ལྷག་སྲ་བརྟན་དུ་བཏང་ཡོད། འདི་དག་ནི་གཙོ་བོ་བལ་ཡུལ་གྱི་གཞུང་མང་གཉིས་ཀྱི་བཀའ་དྲིན་ལས་བྱུང་བ་ཞིག་ཡིན་པས་ཐུགས་རྗེ་ཆེ་ཞེས་གསུངས་ཡོད། མཐར་དཔལ་ལྡན་སྲིད་སྐྱོང་མཆོག་གིས་བལ་ཡུལ་གྱི་ལོ་རྒྱུས་ནང་གལ་གནད་ཆེ་བའི་དུས་སྐབས་འདིར་སྐུ་ཉིད་ཀྱིས་དབུ་ཁྲིད་གནང་བའི་རིང་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་པ་དང་ཆབས་ཅིག བོད་དང་བལ་ཡུལ་དབར་འབྲེལ་བ་ཇེ་བརྟན་དུ་འགྲོ་བའི་ཐུགས་རེ་དང་། བལ་ཡུལ་རྒྱལ་ཁབ་ཏུ་གང་ཅིའི་ཐད་ནས་ཡར་རྒྱས་ཕུན་སུམ་ཚོགས་པ་དང་། བཟང་ཕྱོགས་ཀྱི་འགྱུར་བའི་ཕྱོགས་སུ་མདུན་བསྐྱོད་ཐུབ་པའི་སྨོན་འདུན་ཞུས་ཡོད། བལ་ཡུལ་གྱི་སྲིད་བློན་དུ་བདམས་ཐོན་བྱུང་བའི་སྐུ་ཞབས་བལེན་དྲ་ཤཱ་མཆོག་གིས་ཕྱི་ལོ་ ༢༠༢༦ ཟླ་བ་ ༣ ཚེས་ ༢༧ ཉིན་སྲིད་བློན་གྱི་ལས་འཁུར་དམ་འབུལ་ཞུས་ཡོད་པ་བཅས།།

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༢༥ ཉིན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་རྣམ་པས་བོད་མིའི་ཆོས་དད་རང་དབང་དང་ཆོས་ལུགས་ཀྱི་དབུ་ཁྲིད་རང་དབང་ཐོག་ངོས་འཛིན་བྱེད་ཆོག་པའི་གྲོས་ཆོད་ཅིག་གཏན་འབེབས་གནང་ཡོད། གྲོས་ཆོད་འདིའི་ཐོག་གྲོས་ཚོགས་འཐུས་མི་གཅིག་ནས་ཀྱང་དགག་པ་མེད་པའི་ཐོག་གྲོས་ཚོགས་འཐུས་མི་ ༤༠ ནས་ཚད་མཐོའི་རྒྱབ་སྐྱོར་གྱིས་གཏན་འབེབས་གནང་བ་ཞིག་ཡིན་པ་དང་། འདིའི་བརྒྱུད་རྒྱ་ནག་གིས་ཁྲིམས་ཐོག་ནས་བོད་བརྒྱུད་ནང་བསྟན་ལ་སྟངས་འཛིན་བྱེད་ཐབས་བྱེད་བཞིན་པར་ངོས་ལེན་མེད་པ་གསལ་པོར་མཚོན་གྱི་ཡོད། གྲོས་ཆོད་ནང་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་ལྷན་ཁང་གཙོས་པས་གཞུང་ནས་བོད་མི་རྣམས་ལ་རང་དབང་སྒོ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༧སྐུའི་ཡང་སྲིད་ངོས་འཛིན་གནང་སྒོར་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད། གྲོས་ཆོད་དེ་བཞིན་བོད་ཀྱི་འགོ་ཁྲིད་རྣམས་ནས་ལོ་མང་རིང་རྒྱུན་མཐུད་བོད་དོན་ཞུ་གཏུག་གནང་བ་ལས་བྱུང་བ་ཞིག་ཡིན། དེ་ཡང་ཁོང་རྣམ་པས་ཅེཀ་སྤྱི་མཐུན་རྒྱལ་ཁབ་ཀྱི་དཔོན་རིགས་དང་གྲོས་ཚོགས་འཐུས་མི་རྣམས་དང་མཇལ་འཕྲད་ཀྱིས་བོད་པའི་ཆོས་དང་རིག་གཞུང་ཐོབ་ཐང་ཐོག་གོ་རྟོགས་རྒྱ་ཆེ་སྤེལ་ཐུབ་ཡོད་པ་མ་ཟད། ཅེཀ་སྤྱི་མཐུན་རྒྱལ་ཁབ་ཀྱི་མང་ཚོགས་ནས་ཀྱང་བོད་དོན་ཐོག་རྒྱབ་སྐྱོར་གནང་བ་བཅས་ཀྱི་འབད་བརྩོན་ལས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ནང་བོད་མིའི་ཆོས་དད་རང་དབང་གི་ཐོབ་ཐང་ལ་རྒྱབ་སྐྱོར་ཐོབ་པ་ཞིག་ཡིན། ཅེཀ་གྲོས་ཚོགས་གོང་མའི་ཚོགས་གཞོན་ལྕམ་སྐུ་ཇིཊི་ཀ་སེ་ཌི་ལོ་ཝ་ (Jitka Seitlova) མཆོག་གིས་གྲོས་ཆོད་འདི་འཆར་འབུལ་ཞུས་པ་དང་། ཅེཀ་གྲོས་ཚོགས་གོང་མའི་འཐུས་མི་པེ་རེམ་སིལ་ར་བྷ་སི་ (Přemysl Rabas) ལགས་དང་ཇི་རི་རུ་ཛི་ཀ་ (Jiri Ruzicka) ལགས་རྣམ་གཉིས་ཀྱིས་རྒྱབ་སྐྱོར་གནང་བའི་གྲོས་ཆོད་འདིའི་བརྒྱུད། ཅེཀ་སྤྱི་མཐུན་རྒྱལ་ཁབ་དང་བོད་མི་བར་ཡུན་རིང་གྱི་འབྲེལ་བ་དམ་ཟབ་ཡོད་པ་གསལ་སྟོན་གནང་ཞིང་། གྲོས་ཆོད་ནང་དེ་སྔོན་ཕྱི་ལོ་ ༢༠༢༥ ཟླ་བ་ ༡༢ ནང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དང་། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་པེ་ཊར་པ་ཝེལ་ (Petr Pavel) མཆོག་སོ་སོ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་པ་ཁག་དྲན་གསོ་ཞུས་འདུག བགྲོ་གླེང་ལས་རིམ་འདི་ཉིད་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཡི་རི་ཨོ་སྦར་ཕལ་ཛར་ (Jiří...

༄༅། །བོད་མིའི་སྒྲིག་འཛུགས་ཀྱི་ཡོངས་ཁྱབ་གསལ་བསྒྲགས་ཁག་སྒྲིག་འཛུགས་ཀྱི་དྲ་རྒྱའི་ཐོག་འདོན་སྤེལ་བརྒྱུད་བསྒྲགས་ཞུ་མུས་ཀྱང་། བར་ལམ་ནས་རང་རེ་སྤྱི་ཚོགས་ཁྲོད་ལྷིང་འཇགས་ལ་ཕོག་དང་མང་ཚོགས་མགོ་རྨོངས་སུ་འཇུག་རྒྱུའི་དམིགས་ཡུལ་ངེས་ཅན་ཐོག་སྤྱི་ཚོགས་དྲ་ལམ་སྟེང་ཡིག་རྫུན་འགྲེམས་སྤེལ་བྱེད་མཁན་ཡོང་བཞིན་ཡོད་པར་བརྟེན། ད་ནས་བཟུང་བོད་མིའི་སྒྲིག་འཛུགས་ཀྱི་ལས་ཁུངས་གང་རུང་གི་མིང་ཐོག་དོགས་གཞི་ཅན་གྱི་ཡི་གེ་འགྲེམས་སྤེལ་བྱུང་ཚེ། དོགས་འདྲི་བྱ་ཡུལ་འབྲེལ་ཆགས་ལས་ཁུངས་སོ་སོའི་ལས་བྱེད་ཀྱི་མཚན་དང་ཁ་པར་ཨང་གྲངས་ཟུར་ཡོད་ནང་གསལ་འབྲེལ་བ་ཞུ་ཕྱོགས་དགོས་པའི་ཁྱབ་ཁོངས་སོ་སོར་མ་གོ་མ་ཐོས་མེད་པའི་བཀོད་ཁྱབ་ཡོང་བའི་གསལ་བསྒྲགས་སུ། བཀའ་དྲུང་ཡིག་ཚང་ནས་ཕྱི་ལོ་༢༠༢༦ ཟླ་ ༣ ཚེས་ ༢༡ ལ།

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༢༥ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དབུས་གཙང་ཆོལ་ཁའི་དབུས་ས་གཉིས་དང་། མདོ་ཁམས་རྫ་ཆུ་ཁའི་སྐྱིད་སྡུག་ཚོགས་པ། མང་ཡུལ་སྐྱིད་གྲོང་སྐྱིད་སྡུག་བཅས་ཀྱིས་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད། དེ་ཡང་སྔ་དྲོའི་ཆུ་ཚོད་ ༨།༡༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྷ་རམ་ས་ལའི་བཞུགས་སྒར་ཕོ་བྲང་རྒྱལ་སྒོ་རུ་ཆིབས་བསྒྱུར་སྐབས་ཚོགས་སྐྱིད་ཁག་གསུམ་གྱི་འགོ་བྱེད་ཁག་ནས་སྤོས་སྣེས་མདུན་བསུ་དང་། རྣམ་གྲྭས་སྤྱན་རྒྱ་དང་བཅས་ཕེབས་བསུ་དང་། ཐེག་ཆེན་ཆོས་གླིང་གཙུག་ལག་ཁང་གི་ཐུབ་དབང་ལྷ་ཁང་གི་བཞུགས་ཁྲིར་ཞབས་སོར་འཁོད་མཚམས་བརྟན་བཞུགས་ཀྱི་རྡོ་རྗེ་སློབ་དཔོན་ནས་མཇལ་དར་རྐྱང་འབུལ་དང་འབྲེལ་༸རྒྱལ་བའི་འཁྲུངས་རབས་གསོལ་འདེབས་སོགས་རིམ་པར་གསུངས་ཏེ་བརྟན་བཞུགས་དབུ་འཛུགས་མཛད།བརྟན་བཞུགས་དངོས་གཞིན་བླ་མ་ལྷར་བསྐྱེད་དང་མཆོད་བསྟོད་ཚེ་འགུགས་སོགས་བརྟན་བཞུགས་ཀྱི་ཆོ་ག་རིམ་པར་ཕེབས་པ་དང་། གསོལ་འདེབས་མཎྜལ་སྐབས་སུ་དབུ་བཞུགས་གླིང་མཆོག་སྤྲུལ་རིན་པོ་ཆེ་ནས་མཎྜལ་འདེགས་འབུལ་དང་། བརྟན་བཞུགས་སྦྱིན་བདག་འཐུས་མི་ནས་ཚོམ་བུ་ཟུར་འདེགས་ཞུས་ཤིང་། རྡོར་སློབ་ནས་སྐུ་རྟེན་དང་། གསུང་རྟེན། ཐུགས་རྟེན། ཚེ་བུམ། རིགས་ལྔའི་མཚན་མ། ཚེ་ཆང་། ཚེ་རིལ་བཅས་འདེགས་འབུལ་དང་། དེ་ནས་རྒྱལ་སྲིད་སྣ་བདུན་དང་། བཀྲ་ཤིས་རྟགས་བརྒྱད་དང་རྫས་བརྒྱད་བཅས་བཤད་པ་དང་སྦྲགས་རིམ་བཞིན་འབུལ་ལམ་ཞུས་ཤིང་། བརྟན་བཞུགས་སྦྱིན་བདག་འཐུས་མི་ཁག་གཅིག་གིས་མཇལ་ཁ་ཞུས་ཏེ་འབུལ་དངོས་བསྟར།གཏང་རག་མཎྜལ་སྐབས་བརྟན་བཞུགས་འཐུས་ཚབ་ནས་མཎྜལ་ཚོམ་བུ་དང་རྟེན་གསུམ་འདེགས་འབུལ་གྱིས་སླར་ཡང་འཐུས་མི་ཁག་གཅིག་གིས་མཇལ་ཁ་ཞུས་པ་དང་། མཐར་ཞལ་འདོན་ཉི་གཞོན་འཆར་ཀ་མ་དང་རིས་མེད་བསྟན་རྒྱས་སྨོན་ལམ་སོགས་གསུངས་ཏེ་བརྟན་བཞུགས་གནང་སྒོ་ལེགས་པར་གྲུབ་ཡོད་པ་དང་། བརྟན་བཞུགས་དང་བསྟུན་དབུས་གཙང་ཆོལ་ཁའི་དབུས་ས་གཉིས་དང་རྫ་ཆུ་ཁའི་སྐྱིད་སྡུག་གཉིས་ནས་མགོན་པོ་གང་ཉིད་མཆོག་གི་བཀའ་དྲིན་མཚོན་བྱེད་ཀྱི་གཟེངས་རྟགས་རེ་འབུལ་ལམ་གྱིས་མཚོན་དོན་སྙན་སྒྲོན་ཞུས་ཡོད། །      

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༢༣ ཉིན་སྙན་གྲགས་ཆེ་བའི་ཨ་རབ་འཇིག་རྟེན་ལྟེ་གནས་ཁང་ (Arab World Institute) དུ་བྷི་བྷ་ལོ་སི་ (Byblos) ཞེས་པའི་འགྲེམས་སྟོན་དབུ་འབྱེད་ཀྱི་མཛད་སྒོར་ལྟེ་གནས་ཁང་གི་འགན་འཛིན་ཨན་ཀེ་ལེ་རེ་ལེ་གེ་དྷར་ (Anne-Claire Legendre) ལགས་ཀྱིས་མགྲོན་འབོད་གནང་བ་བཞིན་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ལགས་མཉམ་ཞུགས་གནང་ཡོད། མཛད་སྒོའི་ཐོག་ཕ་རན་སིའི་སྲིད་འཛིན་ཨེ་མེ་ནོལ་མེག་རོན་མཆོག་ཕེབས་ཞུགས་གནང་ཡོད་པ་དང་། དབུ་འབྱེད་མཛད་སྒོའི་ཐོག་འཛམ་གླིང་ནང་མི་སྡོད་གནས་ཡུན་རིང་ཤོས་ཀྱི་གྲོང་ཁྱེར་རྙིང་ཤོས་ཡིན་པའི་བྷི་བྷ་ལོ་སི་ (Byblos) ཡི་ལོ་རྒྱུས་ཀྱི་ཤུལ་བཞག་དང་། དེ་བཞིན་མེ་ཌི་ཊེ་རཱ་ནི་ཡན་ (Mediterranean) ས་ཁུལ་གྱི་ལོ་རྒྱུས་ནང་གྲོང་ཁྱེར་དེའི་གལ་ཆེའི་འགན་ཁྲིད་ལ་སྲུང་བརྩི་ཞུས་ཡོད།མཛད་སྒོའི་ཐོག་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ལགས་མཉམ་ཞུགས་གནང་བ་ཡོད་པ་དང་། འདིའི་བརྒྱུད་རྒྱལ་སྤྱིའི་སྡིངས་ཆའི་ཐོག་སོ་སོའི་རིག་གཞུང་མཚོན་ཐུབ་པའི་ཐབས་ལམ་གལ་ཆེན་ཞིག་ཏུ་མངོན་པ་དང་། དེ་ལྟ་བུའི་འབྲེལ་ལམ་ནི་རིག་གཞུང་གི་གོ་རྟོགས་རྒྱ་ཆེ་སྤེལ་ཐུབ་པ་དང་། དེ་བཞིན་ས་ཁུལ་འདྲ་མིན་དང་འབྲེལ་ལམ་བསྐྲུན་ཐུབ་པའི་གོ་སྐབས་བཟང་པོ་ཞིག་ཡིན་པ་ངོས་འཛིན་བྱེད་ཀྱི་ཡོད། ཨན་ཀེ་ལེ་རེ་ལེ་གེ་དྷར་ (Anne-Claire Legendre) ལགས་ཀྱིས་ལོ་ངོ་སྟོང་ཕྲག་མང་པོའི་ལོ་རྒྱུས་ལྡན་པའི་ཤུལ་བཞག་འདི་ཉིད་གཏོར་བཤིག་མ་འགྲོ་བར་སྲུང་སྐྱོབ་བྱེད་དགོས་པའི་གལ་གནད་དང་། ལྷག་པར་ད་ལྟའི་ལེ་བྷེ་ནོན་ (Lebanon) ནང་འགྲོ་བཞིན་པའི་རྩོད་རྙོག་གི་གནས་སྟངས་འོག་རྩ་གཏོར་མ་འགྲོ་བར་སྲུང་སྐྱོབ་བྱེད་དགོས་པའི་སྐོར་ནན་བརྗོད་གནང་ཡོད།  ཕ་རན་སིའི་སྲིད་འཛིན་ཨེ་མེ་ནོལ་མེག་རོན་མཆོག་གིས་ལེ་བྷ་ནོན་ལ་ཕ་རན་སི་ཡིས་རྒྱབ་སྐྱོར་ཡོད་པ་བསྐྱར་ནན་གནང་བ་དང་འབྲེལ། ད་ལྟའི་ཆར་བྱུང་བཞིན་པའི་དམག་འཁྲུག་འཚམས་འཇོག་དགོས་པའི་འབོད་སྐུལ་ཞུས་ཡོད། དེ་བཞིན་ཕྱི་འབྲེལ་ཙམ་མ་ཡིན་པར་སྲིད་འཛིན་མཆོག་ནས་འགྲེམས་སྟོན་གྱི་མཚོན་དོན་གལ་ཆེའི་རང་བཞིན་སྐོར་འགྲེལ་བརྗོད་གནང་ཡོད།མཛད་སྒོའི་ཐོག་ཕ་རན་སི་ཕྱི་འབྲེལ་བློན་ཆེན་སྐུ་ཞབས་ཇཽ་ནོལ་བྷེ་རོཊ་ (Jean-Noël Barrot) མཆོག་དང་། རིག་གཞུང་བློན་ཆེན་ཁཱ་ཐེ་རིན་པེ་གར་ (Catherine...

༄༅། །ཕྱི་ལོ་ ༢༠༢༦ ཟླ་བ་ ༠༣ ཚེས་ ༡༧ ཉིན་ཨོསྟྲེ་ལི་ཡ་དང་ནིའུ་ཛི་ལེནྜ་གྱི་ཕྱི་སྲིད་དང་བདེ་སྲུང་བློན་ཆེན་ཐུན་མོང་ནས་བོད་ནང་གི་འགྲོ་བ་མིའི་ཐོབ་ཐང་ཐོག་སེམས་འཚབ་བསྟན་པའི་ཟུང་འབྲེལ་བསྒྲགས་གཏམ་ཞིག་སྤེལ་ཡོད། ཟུང་འབྲེལ་བསྒྲགས་གཏམ་དེ་ཡང་ཨོསྟྲེ་ལི་ཡ་དང་ནིའུ་ཛི་ལེནྜ་གྱི་ཕྱི་སྲིད་དང་བདེ་སྲུང་ལས་ཁུངས་ཀྱི་ཚོགས་འདུ་ (ANZMIN 2+2) ཚོགས་པའི་རྗེས་སུ་གོང་གསལ་རྒྱལ་ཁབ་གཉིས་ཀྱིས་བོད་ནང་དུ་ཆོས་ལུགས་དང་། རིག་གཞུང་། ཤེས་ཡོན། སྐད་ཡིག་བཅས་ཀྱི་རང་དབང་དང་ཐོབ་ཐང་རྡོག་རོལ་གཏོང་གཞིན་པར་སེམས་འཚབ་བསྟན་པའི་བསྒྲགས་གཏམ་སྤེལ་ཡོད། ཨོསྟྲེ་ལི་ཡ་དང་ནིའུ་ཛི་ལེནྜ་གཉིས་ཀྱིས་བོད་ཀྱི་གནད་དོན་དེ་བཞིན་འཛམ་གླིང་གི་འགྲོ་བ་མིའི་ཐོབ་ཐང་གི་གནད་དོན་ཐོག་གླེང་སྟེ་རིག་གཞུང་དང་ཆོས་ལུགས་འདྲ་མིན་སྲུང་སྐྱོབ་དགོས་གལ་ཡིན་པ་ནན་བརྗོད་གནང་ཡོད། བསྒྲགས་གཏམ་དེ་ནི་རྒྱལ་སྤྱིའི་སྟེང་བོད་ནང་གི་འགྲོ་བ་མིའི་ཐོབ་ཐང་ཐོག་ཞིབ་བཤེར་གནང་བཞིན་པའི་དུས་སྐབས་སུ་སྤེལ་བ་ཞིག་དང་། དེར་ཡུ་རོབ་མཐུན་ཚོགས་དང་ཨ་རི་སྲིད་གཞུང་གཉིས་ནས་ཀྱང་ཉེ་ཆར་དེ་མཚུངས་ཐུགས་འཚབ་བསྟན་ཡོད། (ANZMIN 2+2) ཚོགས་འདུ་དེ་ཡང་ཕྱི་ལོ་ ༢༠༢༦ ལོར་ཁེན་སྦེ་རར་ཚོགས་ཡོད་ཅིང་། སྐབས་དེར་ཨོསྟྲེ་ལི་ཡ་དང་ནིའུ་ཛི་ལེནྜ་རྒྱལ་ཁབ་གཉིས་ཀྱི་ཕྱི་སྲིད་དང་བདེ་སྲུང་བློན་ཆེན་ཕེབས་ཏེ་རྒྱལ་ཁབ་ཀྱི་ཐབས་བྱུས་དང་། བདེ་འཇགས། ཕྱི་འབྲེལ་སྲིད་བྱུས་བཅས་ཀྱི་ཐོག་གྲོས་མོལ་གནང་ཡོད།།

༄༅། ཕྱི་ལོ་ ༢༠༢༦ ཟླ་བ་ ༣ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་རྟེན་ཚོགས་ཁང་དུ་དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༥་་་༢༠༢༦ ལོའི་སྐབས་ ༡༨ པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་དམིགས་གཏན་འབེབས་གསལ་བསྒྲགས་དང་ལམ་སྟོན་ཁག་གཅིག་གི་ཐོག་གསར་འགོད་གསལ་བསྒྲགས་སྤེལ་ཡོད། དེ་ཡང་གོང་ཚེས་ཉིན་གྱི་སྔ་དྲོར་ཆུ་ཚོད་ ༡༡ ཐོག་དབུས་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དབུ་བཞུགས་ཐོག་འོས་བསྡུའི་འགན་འཛིན་ལས་འཕར་ཚེ་རིང་གཡུ་སྒྲོན་ལགས་དང་སྣང་ས་ཆོས་སྒྲོན་ལགས། དྲུང་ཆེ་བློ་བཟང་ཆོས་གྲགས་ལགས། དྲུང་འཕར་བསྟན་འཛིན་ནོར་བུ་ལགས། ཕྱི་ནང་གི་གསར་འགོད་པ་བཅས་ལྷན་འཛོམས་ཐོག་དབུས་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་གིས་གསར་འགོད་གསལ་བསྒྲགས་སྒྲོགས་སྦྱང་གནང་དོན།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རང་ཅག་བོད་མི་རྣམས་ལ་ཡང་དག་པའི་མང་གཙོའི་ལམ་བཟང་གསོལ་བསྩལ་བཀའ་དྲིན་ཆེ་བ་བཞིན། འདི་ལོ་འཛམ་གླིང་རྒྱལ་ཁབ་གྲངས་ ༢༧ ནང་ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། སྐབས་ ༡༨ པའི་བོད་མི་མང་སྤྱི་འཐུས་ཀྱི་སྔོན་འགྲོའི་འོས་བསྡུ་ལེགས་བསྒྲུབས་ཀྱིས་སྔོན་འགྲོའི་འོས་དམིགས་གསལ་བསྒྲགས་ཞུས་ཟིན་པ་བཞིན། འོས་བསྡུའི་སྒྲིག་གཞི་དོན་ཚན་ ༤༩  ནང་གསལ་ས་གནས་སོ་སོར་སྔོན་འགྲོ་འོས་གཞིའི་གསལ་བསྒྲགས་གཏོང་ཚེས་དང་དངོས་གཞིའི་འོས་དམིགས་གསལ་བསྒྲགས་མ་བྱས་བར་སྒྲིག་གསལ་ཉིན་གྲངས་ ༣༠ འཇོག་དགོས་རྒྱུ་དང་། དུས་ཡུན་དེའི་རིང་ས་གནས་འོས་བསྡུ་ལས་ཁང་སོ་སོའི་ཁྱབ་ཁོངས་སུ་འོས་གཞིར་ཞུགས་མཁན་རྣམས་ཀྱི་ལོ་རྒྱུས་དང་། འདྲ་པར་རེ་བསྡུ་ལེན་གྱིས་དབུས་འོས་བསྡུ་ལས་ཁང་དུ་འབུལ་འབྱོར་དང་། འོས་གཞིར་ཞུགས་འདུན་མེད་རིགས་ནས་དགོངས་ཞུ་འབུལ་རྒྱུའི་དུས་ཚོད། དེ་བཞིན་འོས་གཞི་རྣམ་པའི་སྒྲིག་གསལ་འོས་ཆོས་ཚང་ཡོད་མེད་དང་། དཔྱ་དངུལ་འབུལ་ཆད་ཡོད་མེད་བརྟག་ཞིབ་རྩད་གཅོད།  དགོངས་ཞུའི་རིགས་བཅས་གྲུབ་རྗེས་དངོས་གཞིའི་འོས་གཞི་གསལ་བསྒྲགས་བྱེད་དགོས་ཞེས་གསལ་བ་ལྟར། དེ་རིང་གསར་འགོད་གསལ་བསྒྲགས་འདི་བརྒྱུད་ཐོབ་ཁུངས་སོ་སོའི་དངོས་གཞིའི་འོས་དམིགས་གཏན་འབེབས་གསལ་བསྒྲགས་དང་ལམ་སྟོན་ཁག་ཅིག་ཞུ་རྒྱུ་གཤམ་གསལ། ༡།      འོས་བསྡུའི་སྒྲིག་གཞི་དོན་ཚན་ ༤༩...

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༦ ཟླ་བ་ ༣ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་ཆགས་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཁང་ནང་ལས་ཉིན་གྲངས་བཅུ་གསུམ་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་མཐའ་མའམ་བཅུ་གཅིག་པ་དབུ་འཛུགས་གནང་སོང་། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་རྣམ་པ་བཅས་ཚང་འཛོམས་ཀྱིས་ཐོག་མར་དཔལ་ལྡན་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་དང་འབྲེལ། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་དཔལ་ལྡན་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསུང་བཤད་གནང་སོང་། དེ་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་དགུ་པ་དང་། བཅུ་དྲུག་གཞིར་བཟུང་། ཚོགས་གཙོའི་ལས་ཚབ་དང་། ལས་རིམ་ཚོགས་ཆུང་གི་ཚོགས་མི་བསྐོ་གཞག་གནང་གྲུབ་མཚམས། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་༧སྐུའི་གཅུང་པོ་སྤྱི་ཟུར་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་བཏོན་རྗེས། ཚང་མ་སྐུ་བཞེངས་ཐོག་ངག་བཅད་མྱ་ངན་སྐར་མ་གཅིག་རིང་ཞུས་གནང་སོང་། དེ་རིང་ལས་རིམ་དྲུག་པར་དཔལ་ལྡན་སྲིད་སྐྱོང་དང་། དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༦་་་༢༧ ལོའི་སྔོན་རྩིས་འགོད་འབུལ་གྱི་གསུང་བཤད་གནང་བ་དང་། དེ་བཞིན་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་ཆོས་གྲགས་རྒྱ་མཚོ་ལགས་ཀྱིས་རྩིས་ལོ་ ༢༠༢༦་་་༢༧ ལོའི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་གནང་། དེ་རྗེས་སྤྱི་འཐུས་ཀརྨ་དགེ་ལེགས་ལགས་ཀྱིས་དཔལ་ལྡན་དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོར་སྤྱི་ཡོངས་ཀྱི་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས་ཀྱིས་རྒྱབ་སྐྱོར་གནང་རྗེས། སྤྱི་འཐུས་རྣམ་པས་བགྲོ་གླེང་གནང་ཞིང་། ད་ལོའི་ཨ་རིའི་སྔོན་རྩིས་ཀྱི་གཏོང་ལེན་ཁྲིམས་ཡིག་ནང་བོད་མིའི་སྒྲིག་འཛུགས་འདི་བཞིན་བཙན་བྱོལ་བོད་གཞུང་ལ་ངོས་འཛིན་བྱེད་ཀྱི་ཡོད་ཅེས་ཚིག་བརྗོད་གསར་འཇུག་གནང་ཡོད་པར་བསྔགས་བརྗོད་དང་། དེ་བཞིན་ཨ་རིའི་རོགས་དངུལ་གྱི་གནས་བབས་སྐོར་དང་། སྔོན་རྩིས་འཆར་འབུལ་ནང་འགྲོ་གྲོན་གཏོང་ཕྱོགས་སྐོར་སོགས་དང་འབྲེལ་བའི་ཐོག་དོགས་འདྲི་དང་བགྲོ་གླེང་གནང་སོང་། ཐེངས་འདིའི་གྲོས་ཚོགས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༦་་་༢༧...

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཚོགས་ཁང་ནང་ལས་ཉིན་བཅུ་གསུམ་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བཅུ་གཅིག་པ་གཟབ་རྒྱས་ངང་དབུ་འཛུགས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་བཀའ་བློན་རྣམ་པ། བོད་མི་མང་སྤྱི་འཐུས་རྣམ་པ་བཅས་ཚང་འཛོམས་ཀྱིས་ཐོག་མར་དཔལ་ལྡན་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་དང་འབྲེལ། ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བླངས་རྗེས་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་འདུ་དབུ་འཛུགས་ཀྱི་གསུང་བཤད་གནང་དོན། འགྲོ་བ་ལྷ་དང་བཅས་པའི་མགོན་སྐྱབས་མཚུངས་ཟླ་མ་མཆིས་པ། འཇིག་རྟེན་ཞི་བདེའི་དེད་དཔོན། ཁམས་གསུམ་ཆོས་ཀྱི་རྒྱལ་པོ། བོད་མི་ཡོངས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་བའི་དབང་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས། དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཐེངས་བཅུ་གཅིག་པའི་ཐོག་ཕེབས་པའི་དཔལ་ལྡན་སྲིད་སྐྱོང་མཆོག་དང་། དཔལ་ལྡན་བཀའ་བློན་རྣམ་པ། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་པ་མཆོག་དང་། བཀུར་འོས་གྲོས་ཚོགས་ཀྱི་འཐུས་མི་ཚང་མ་ལ་ཚོགས་གཙོའི་ངོས་ནས་འཚམས་འདྲི་ཞུ་རྒྱུ་གཅིག་དང་། དེ་རིང་ང་ཚོའི་གྲོས་ཚོགས་འདི་དབུ་འཛུགས་ཞུ་ཡི་ཡོད་རེད། སྤྱིར་བཏང་ང་ཚོས་ལོ་གཅིག་ལ་གྲོས་ཚོགས་ཐེངས་གཉིས་ཚོགས་ཀྱི་ཡོད་རེད།ཕྱི་ཟླ་ ༣ པའི་གྲོས་ཚོགས་དེ་སྔོན་རྩིས་གྲོས་ཚོགས་དང་། དེ་ག་ནང་བཞིན་ཕྱི་ཟླ་ ༩ པའི་གྲོས་ཚོགས་དེ་ཡོངས་གྲགས་ཀྱིས་ལས་བསྡོམས་གྲོས་ཚོགས་ཞེས་ཚོགས་ཀྱི་ཡོད་རེད། དེ་རིང་ང་ཚོའི་སྔོན་རྩིས་གྲོས་ཚོགས་ཆགས་བསྡད་ཡོད་རེད། ང་ཚོའི་སྔོན་རྩིས་གྲོས་ཚོགས་འཚོགས་རྒྱུ་དེ་འཆར་ཅན་ལྟར་ཕྱི་ཟླ་ ༣ པ་འཁེལ་གྱི་ཡོད་རེད། ཕྱི་ཟླ་ ༣ པ་དེ་ང་ཚོོར་དམིགས་བསལ་གྱི་ཟླ་བ་ཞིག་ཆགས་བསྡད་ཡོད་རེད། བོད་མིའི་རང་དབང་སྒེར་ལངས་ཀྱི་ཉིན་མོ་གསུམ་བཅུའི་དུས་དྲན་དུས་ཚོད་དེ་འཁེལ་བསྡད་ཡོད་རེད། དེ་ག་ནང་བཞིན་བོད་ནང་དུ་ཡིན་ནའང་རྒྱ་མིའི་གཞུང་གིས་དམིགས་བསལ་དམ་དྲག་ཤུགས་ཆེན་པོ་བྱས་སའི་ཟླ་བ་དེ་ཆགས་ཀྱི་ཡོད་རེད།...

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༦ ཟླ་བ་ ༣ ཚེས་ ༡༣ ཉིན་རྒྱབ་ཆུ་ཚོད་ ༢།༣༠ ཐོག་རྡ་རམ་ས་ལ་མེག་གྷན་བོད་ཀྱི་ཟློས་གར་ཚོགས་པའི་ཚོགས་ཁང་ནང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ་དང་། འཕགས་བོད་འབྲེལ་མཐུད་ལས་ཁུངས་གཉིས་ཀྱིས་གོ་སྒྲིག་ཞུས་པའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་མཇུག་བསྒྲིལ་གནང་སོང་། སྐབས་དེའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་མཆོག་དང་། དམིགས་བསལ་སྐུ་མགྲོན་དུ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག གཞན་སྐུ་མགྲོན་དུ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་འབྲེལ་མཐུད་པ་སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས། ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས། ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་ཚོགས་གཙོ་སྐུ་ཞབས་ཨ་ནནྜ་ཀཱུ་མཱར་ (Dr. Anand Kumar) ལགས། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ཟུང་སྦྲེལ་འབྲེལ་མཐུད་པ་སྐུ་ཞབས་སུ་རི་དྷར་ཀུ་མར་ (Surendhar Kumar) ལགས། རྒྱ་གར་ས་ཁུལ་འདྲ་མིན་གྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཚོགས་མི་བཅས་ཁྱོན་ཚོགས་བཅར་བ་ ༢༣༠ ཙམ་ཕེབས་འདུགམཛད་སྒོའི་ཐོག་དཔལ་ལྡན་ཚོགས་གཙོ་མཆོག་གིས་ཐོག་མར་འཚམས་འདྲི་དང་སྦྲགས་གསུང་བཤད་གནང་དོན། དེ་རིང་འདིར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པའི་མཇུག་བསྡོམས་མཛད་སྒོར་མཉམ་ཞུགས་བྱ་རྒྱུ་བྱུང་བར་དགའ་སྤོབས་ཆེན་པོ་བྱུང་། ཁྱེད་རྣམ་པས་བོད་དོན་ཐོག་ལྷག་བསམ་རྣམ་དག་གིས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། བོད་དོན་འཐབ་རྩོད་ཐོག་རྒྱབ་སྐྱོར་གནང་བ་རྣམས་ང་ཚོས་ཧ་ཅང་གི་གལ་ཆེན་པོར་བརྩི་བཞིན་ཡོད་པས་ནམ་ཡང་བརྗེད་ཐབས་མེད་པ་ཞིག་ཆགས་ཡོད།  བོད་དང་རྒྱ་གར་དབར་ལོ་ངོ་སྟོང་ཕྲག་དུ་མའི་རིང་ནས་ཆོས་དང་། རིག་གཞུང་གི་འབྲེལ་བ་ཟབ་མོ་ཡོད་པའི་ཁྱིམ་མཚེས་རྒྱལ་ཁབ་ཅིག་ཆགས་ཡོད་ཅིང་། ང་ཚོའི་ནང་ཆོས་དང་རིག་གཞུང་གི་འབྱུང་ཁུངས་འདྲ་པོ་དཔལ་ནཱ་ལེནྡྲའི་པཎ་གྲུབ་རྣམས་ཆགས་ཀྱི་ཡོད་པས། དུས་རྒྱུན་ང་ཚོས་རྒྱ་གར་ལ་ “འཕགས་པའི་ཡུལ་” ཞེས་གུས་བརྩི་ཆེན་པོས་འབོད་བཞིན་ཡོད།ཕྱི་ལོ་ ༡༩༥༩ ལོར་རྒྱ་ནག་དམར་གཞུང་གིས་བོད་ས་ཡོངས་རྫོགས་ཁྲིམས་འགལ་བཙན་བཟུང་བྱས་རྗེས།...

༄༅། །ཕྱི་ལོ་ ༢༠༢༦ ཟླ་བ་ ༠༣ ཚེས་ ༡༣ ཉིན་དྷ་ས་བོད་ཀྱི་ཟློས་གར་ཚོགས་པའི་ཚོགས་ཁང་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མ་དང་། འཕགས་བོད་འབྲེལ་མཐུད་ལས་ཁུངས་གཉིས་ཀྱི་གོ་སྒྲིག་གནང་བའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པའི་མཇུག་བསྡོམས་མཛད་སྒོ་ཚོགས་ཡོད། དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢། ༣༠ ཙམ་ལ་སྐུ་མགྲོན་གཙོ་བོ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག སྐུ་མགྲོན་གཞན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་རྒྱལ་ཡོངས་འབྲེལ་མཐུད་པ་སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས། ས་གནས་འབྲེལ་མཐུད་པ་སྐུ་ཞབས་ཨ་མིཏ་ཇྱོ་ཏི་ཀར་ལགས། སྐུ་ཞབས་ཨ་ནནྜ་ཀུ་མཱར་ལགས་གཙོས་པའི་རྒྱལ་ཡོངས་དང་ས་གནས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཚོགས་མི་ཁྱོན་བསྡོམས་མི་གྲངས་ ༢༣༠ ཙམ་ལྷན་འཛོམས་ཀྱི་མཛད་སྒོ་དབུ་འཛུགས་གནང་ཡོད།སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ས་གནས་འབྲེལ་མཐུད་པ་སྐུ་ཞབས་སུ་རེན་དྲ་ཀུ་མཱར་ལགས་ཀྱིས་མཇུག་བསྡོམས་མཛད་སྒོ་གཙོ་སྐྱོང་གནང་ཞིང་། དང་ཐོག་ས་གནས་འབྲེལ་མཐུད་པ་སྐུ་ཞབས་ཨ་མིཏ་ཇྱོ་ཏི་ཀར་ལགས་ཀྱིས་ཕེབས་བསུའི་གསུང་བཤད་དང་། སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས་ཀྱིས་མཇུག་བསྡོམས་གསུང་བཤད་གནང་། དེ་རྗེས་དམིགས་བསལ་སྐུ་མགྲོན་ཕྱི་དྲིལ་བཀའ་བློན་ནོར་འཛིན་མཆོག་གིས་ཐོག་མར་འཚམས་འདྲི་དང་སྦྲགས། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པར་ཐུགས་རྗེ་ཞུས་པ་དང་། ཚོགས་པ་དེ་ཉིད་ཀྱིས་ཕྱི་དྲིལ་ལས་ཁུངས་དང་ཟུང་འབྲེལ་ཐོག་ཉེ་ཆར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་གོ་སྒྲིག་གནང་བར་ཐུགས་རྗེ་ཆེ་ཞུས་ཡོད།དེ་ནས་ཕྱི་དྲིལ་བཀའ་བློན་མཆོག་གིས་ཕྱི་ལོ་ ༡༩༥༩ ལོར་རྒྱ་ནག་གིས་བོད་བཙན་བཟུང་བྱས་པ་ནས་བཟུང་རྒྱ་གར་གཞུང་མང་གཉིས་ནས་༸གོང་ས་མཆོག་དང་། བོད་མི་རྣམས་ལ་སྣེ་ལེན་དང་རྒྱབ་སྐྱོར་གནང་ཡོད་པ་དང་། རྒྱ་གར་ནི་འཛམ་གླིང་ནང་གི་མང་གཙོའི་རྒྱལ་ཁབ་ཆེ་ཤོས་ཤིག་ཡིན་པར་བརྟེན། བོད་མི་རྣམས་ཀྱིས་བཙན་བྱོལ་དུ་དྲང་བདེན་དང་། རང་དབང་། འདྲ་མཉམ་བཅས་ཀྱི་རིན་ཐང་ལྡན་པའི་མང་གཙོའི་གཞུང་ཞིག་བཙུགས་ཐུབ་ཡོད་པ་མ་ཟད། རྒྱ་གར་གྱིས་ལོ་ངོ་བཅུ་ཕྲག་བདུན་ཙམ་རིང་བོད་མི་རྣམས་ལ་བྱམས་བརྩེ་དང་སྣེ་ལེན་ཟབ་རྒྱས་ཞུས་ཡོད་པར་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུས་གནང་ཡོད།དེ་བཞིན་རྒྱ་ནག་གིས་བོད་ནང་རིག་གཞུང་སིམ་ཡལ་གྱི་སྲིད་བྱུས་ལག་བསྟར་བྱེད་བཞིན་ཡོད་སྐོར་དང་། བོད་རྒྱའི་དཀའ་རྙོག་སེལ་བར་གྲོས་མོལ་དང་། འགྲོ་བ་མིའི་ཐོབ་ཐང་སྲུང་སྐྱོབ། བོད་མིའི་ཆེ་མཐོང་དང་རང་དབང་བསྐྱར་གསོ། བོད་མིའི་ཐུན་མོང་མ་ཡིན་པའི་རིག་གཞུང་དང་ངོ་བོ་ལ་ངོས་འཛིན་དགོས་ཀྱི་ཡོད་པ་འགྲེལ་བརྗོད་གནང་། བོད་མིའི་སྒྲིག་འཛུགས་ཀྱིས་གྲོས་མོལ་དང་། འཚེ་མེད་ཞི་བ། གཉིས་སྨན་དབུ་མའི་ལམ་གྱི་སྲིད་བྱུས་ལ་གཙིགས་ཚེར་གྱིས་བོད་རྒྱའི་དཀའ་རྙོག་སེལ་བར་འབད་བརྩོན་གནང་བཞིན་ཡོད་ཅེས་གསུངས།...

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་བཞུགས་སྒར་ཉེ་འདབས་སུ་ཆགས་པའི་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་བོད་ཀྱི་གྲངས་འཛིན་དཔེ་མཛོད་ཀྱི་མཉམ་འདུས་ཚོགས་སྡེ་ཚོགས་ཆེན་ཐེངས་གསུམ་པ་བསྐོང་ཚོགས་གནང་ཡོད་པ་དང་། སྐབས་དེར་རིས་མེད་དགོན་སྡེ་ཁག་དང་རིག་གཞུང་བསྟི་གནས་ཁང་ཁག་ ༤༩ ནས་ཚོགས་བཅར་བ་ལྔ་བཅུ་ལྷག་མཉམ་ཞུགས་གནང་ཡོད། ཐེངས་འདིའི་ཚོགས་འདུའི་དམིགས་ཡུལ་ནི་བོད་ཀྱི་གྲངས་འཛིན་དཔེ་མཛོད་ཀྱི་ལས་གཞི་དང་འབྲེལ་བའི་ཐོག་དགོན་སྡེ་ཁག་དང་རིག་གཞུང་ལྟེ་གནས་ཁང་ཁག་གི་དཔེ་མཛོད་འགན་འཛིན་དང་འབྲེལ་ཡོད་ལས་བྱེད་རྣམས་ལ་ལས་གཞིའི་གོ་རྟོགས་དང་། ད་བར་སྤེལ་བཞིན་པའི་ལས་གཞི་ཁག་གི་ནང་དཀའ་ངལ་ཇི་ཞིག་བྱུང་མིན་ཐོག་གོ་བསྡུར་ཡོང་སླད་གོ་སྒྲིག་གནང་བ་ཞིག་ཡིན། ཚོགས་འདུའི་ཉིན་གཉིས་པའི་མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་ཆེད་ཕེབས་ཀྱིས་གསུང་བཤད་གནང་ཡོད། དེ་ཡང་ཐོག་མར་ཆོས་རིག་ལས་ཁུངས་ཀྱི་རིག་གཞུང་ཚན་པའི་འགན་འཛིན་དོན་གྲུབ་ཚེ་རིང་ལགས་ཀྱིས་ཕེབས་བསུ་དང་སྦྲགས་ཚོགས་འདུའི་ངོ་སྤྲོད་སྙིང་བསྡུས་ཤིག་གནང་གྲུབ་མཚམས། དཔལ་ལྡན་སྲིད་སྐྱོང་མཆོག་གིས་གྲངས་འཛིན་དཔེ་མཛོད་ཀྱི་ལས་གཞི་དེ་བཞིན་བཀའ་ཤག་སྐབས་བཅུ་དྲུག་པའི་ལས་གཞི་མང་པོའི་ནང་ནས་གལ་ཆེ་ཤོས་ཤིག་ཆགས་ཀྱི་ཡོད་པ་དང་། ལས་གཞི་འདི་ནི་སངས་རྒྱས་ཀྱི་བཀའ་དང་བསྟན་བཅོས། གཞུང་ལུགས་ཡོངས་སུ་རྫོགས་པ་དེང་རབས་ཀྱི་འཕྲུལ་ཆས་དང་བཅོས་མའི་རིག་རྩལ་བཀོལ་སྤྱོད་བརྒྱུད་དུས་དང་མཐུན་པའི་སྒོ་ནས་བདག་གཉེར་བྱ་རྒྱུ་དང་། མ་འོངས་པར་མི་རབས་གསར་པ་དང་དོན་གཉེར་གནང་མཁན་རྣམས་ལ་མཁོ་སྤྲོད་ཐུབ་རྒྱུའི་དགེ་མཚན་ལྡན་ཡོད་སྐོར་འགྲེལ་བརྗོད་གནང་ཡོད། དེ་བཞིན་བོད་པའི་ཆོས་དང་རིག་གཞུང་། སྐད་ཡིག་བཅས་པ་སྲུང་སྐྱོབ་དང་ཉར་ཚགས་བྱེད་རྒྱུ་ཙམ་མ་ཡིན་པར་བཀོལ་སྤྱོད་བྱེད་དགོས་པའི་གལ་གནད་དང་། གཞི་རྩའི་ཆ་ནས་ལས་གཞི་དེ་བཞིན་ལོ་གསུམ་ནང་མཇུག་བསྡུ་རྒྱུའི་འཆར་གཞི་ཡོད་ཀྱང་ཨ་རིའི་རོགས་དངུལ་མཚམས་འཇོག་བྱས་པར་བརྟེན་ལས་གཞིར་དཀའ་ངལ་ཅུང་ཙམ་ཞིག་འཕྲད་ཡོད་པའི་སྐོར་དང་། ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་ཨ་རིའི་རོགས་དངུལ་ཕྱེད་ཙམ་བསྐྱར་གསོ་ཐུབ་ཡོད་པ་དང་། འདིའི་བརྒྱུད་ད་ལྟའི་ལས་གཞི་རྣམས་ཚགས་ཚུད་ངང་འགྲོ་བཞིན་ཡོད་པའི་སྐོར་འགྲེལ་བརྗོད་གནང་ཡོད། དེ་བཞིན་དཔལ་ལྡན་སྲིད་སྐྱོང་མཆོག་གིས་ལས་གཞི་འདི་ནི་ཚང་མས་མཉམ་རུབ་ཐོག་སྒྲུབ་དགོས་པ་ཞིག་ཡིན་པར་བརྟེན་ཚང་མས་ཕྱར་གྲུ་མཉམ་འདེགས་ཀྱིས་ད་བར་ཕྱག་ལས་གནང་དང་གནང་མུས་ཡིན་པར་ཐུགས་རྗེ་ཆེ་ཞུས་པ་དང་སྦྲགས་སླད་མ་འོངས་པར་དེ་མཚུངས་གནང་སྐྱོང་ཡོང་བའི་འབོད་སྐུལ་ཞུས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཀའ་སློབ་ལུང་འདྲེན་གྱིས་བོད་སྤྱི་པའི་རྩ་དོན་ནི་ཆབ་སྲིད་ཁོ་ན་མ་ཡིན་པར་བོད་པའི་སྐད་ཡིག་དང་། ལྷག་པར་ནང་ཆོས་སྲུང་སྐྱོབ་དང་རྒྱུན་འཛིན་བྱེད་ཐུབ་པ་ཡིན་ན་བོད་དོན་འཐབ་རྩོད་ཀྱི་ཆ་ཤས་ཤིག་སྒྲུབ་ཀྱི་ཡོད་སྐོར་ཡང་གསུངས་ཡོད། དེ་རྗེས་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་ཀྱི་ཐུགས་རྗེ་ཆེ་གསུང་བཤད་གནང་སྟེ་མཛད་སྒོ་མཇུག་སྒྲིལ་ཡོད། སྤྱིར་གྲངས་འཛིན་དཔེ་མཛོད་ཀྱི་མཉམ་འདུས་ཚོགས་ཆེན་དེ་བཞིན་ཐོག་མར་ཕྱི་ལོ་ ༢༠༢༤ ཟླ་བ་ ༣ ནང་བསྐོང་ཚོགས་ཀྱིས་ཐེངས་འདིའི་ཚོགས་ཆེན་ཐེངས་གསུམ་པ་ཆགས་ཀྱི་ཡོད་པ་དང་། ཚོགས་ཆེན་ཐོག་དཔེ་མཛོད་ཆེད་ལས་མཁས་པའི་གཏམ་བཤད་ཀྱི་ལས་རིམ་དང་། འདས་པའི་ལོ་གཉིས་ཀྱི་རིང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དང་ཟུང་སྦྲེལ་ཐོག་བོད་ཀྱི་གྲངས་འཛིན་དཔེ་མཛོད་ཀྱི་དྲ་ཚིགས་བཟོ་སྐྲུན་གནང་ཡོད་པ་དེ་བཞིན་ཚོགས་བཅར་བ་རྣམས་ལ་སྤྱན་འབུལ་གྱིས་བསམ་ཚུལ་བསྡུ་ལེན། དེ་བཞིན་དགོན་སྡེ་ཁག་གི་ནང་ཡིག་ཆ་བཤེར་འབེབས་ཀྱི་ལས་གཞི་འགྲོ་བཞིན་པའི་གནས་སྟངས་ཇི་ཡིན་སྐོར་བགྲོ་གླེང་གནང་ཡོད་པ་བཅས། །

༄༅། །ཕྱི་ལོ་ ༢༠༢༦ ཟླ་བ་ ༣ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་བཙུན་དགོན་ཤུག་གསེབ་ཨོ་རྒྱན་རྫོང་གི་སྐབས་དང་པོའི་མཁན་མོ་བཅུ་དགུས་གཙོས་དད་ལྡན་བཞི་བརྒྱ་སུམ་ཅུ་སྐོར་ལ་མཇལ་ཁའི་སྐབས་སུ་མིས་བཟོས་རིག་ནུས་སྐོར་ལ་བཀའ་སློབ་སྩལ་ཡོད། དེ་ཡང་ཐའེ་ཝན་ནས་ཕེབས་པའི་དད་ལྡན་མཇལ་བཅར་བ་ཞིག་གིས་མིས་བཟོས་རིག་ནུས་སྐོར་ལ་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། གང་ལྟར་འཕྲུལ་ཆས་ལ་འགན་མང་པོ་ཡོད་ཀྱང་། མཐར་ཐུག་མིའི་བསམ་བློར་ཐུག་ཡོད། དེར་བརྟེན་འཕྲུལ་ཆས་ག་ཚོད་ཅིག་ཟབ་པོ་ཡོད་ནའང་མིའི་བསམ་བློ་ཡི་རྗེས་ཟིན་ཐུབ་ཀྱི་མ་རེད། འཕྲུལ་ཆས་ལ་བཟོས་ཟིན་པ་དེ་མ་གཏོགས་ཁ་ཐུག་ཁ་ཐུག་ལ་འགྱུར་བ་འགྲོ་རྒྱུ་ཁག་པོ་རེད། མིའི་བསམ་བློ་ནི་ཁ་ཐུག་ཁ་ཐུག་ལ་འགྱུར་ཐུབ་ཀྱི་འདུག དཔེར་ན། ངོས་ཀྱི་བསམ་བློ་འདི་ཁ་ཐུག་ཁ་ཐུག་ལ་འགྱུར་ཡོང་གི་འདུག ཅེས་བཀའ་སྩལ་ཡོད། །