༄༅། །ཕྱི་ལོ་ ༢༠༢༦ ཟླ་བ་ ༠༥ ཚེས་ ༢༡ ཉིན་༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་དུ་༸གོང་ས་ཏཱ་ལའི་བླ་མའི་དགེ་རྩ་ཚོགས་པ་དང་། བོད་མིའི་སྒྲིག་འཛུགས་ཆོས་རིག་ལས་ཁུངས་གཉིས་ཀྱིས་གོ་སྒྲིག་གནང་བའི་བོད་བརྒྱུད་ནང་བསྟན་ཁྲོད་བུད་མེད་ནུས་སྟོབས་གོང་སྤེལ་ཚོགས་ཆེན་གྱི་མཇུག་བསྡོམས་མཛད་སྒོ་ཚོགས་གནང་སོང་།སྐབས་དེར་བཀའ་ཟུར་རིན་ཆེན་མཁའ་འགྲོ་མཆོག་དང་། བོད་ཀྱི་བཙུན་མའི་ལས་འཆར་འགན་འཛིན་སྤྱི་འཐུས་དབུ་དཀར་ཚང་གཡུ་སྒྲོན་ལགས། ཆོས་རིག་དྲུང་ཆེ་བདུད་འདུལ་རྡོ་རྗེ་ལགས། ཏཱ་ལའི་བླ་མ་དགེ་རྩ་ཚོགས་པའི་དྲུང་ཆེ་འཇམ་དཔལ་ལྷུན་གྲུབ་ལགས། ༸སྐུའི་གསུང་སྒྱུར་དགེ་བཤེས་ཐུབ་བསྟན་སྦྱིན་པ་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷ་རྡོར་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས། རྣམ་རྒྱལ་གྲྭ་ཚང་གི་སློབ་སྤྱི་དགེ་བཤེས་ཐུབ་བསྟན་ཡར་འཕེལ་ལགས། སྒྲོལ་མ་གླིང་བཙུན་དགོན་སློབ་གྲྭའི་སློབ་སྤྱི་དགེ་བཤེས་མ་བདེ་ལེགས་དབང་མོ་ལགས། ཤེས་རིག་དྲུང་འཕར་བསྟན་འཛིན་པདྨ་ལགས། དཔལ་འབྱོར་ལས་ཁུངས་ཁྱབ་ཁོངས་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་བསྟན་འཛིན་སྒྲོལ་དཀར་ལགས་བཅས་ཕེབས་ཞུགས་གནང་ཡོད། ཚོགས་ཆེན་དེའི་ཐོག་རྒྱ་གར་དང་བལ་ཡུལ་གཉིས་ཀྱི་བཙུན་དགོན་ ༡༣ ནས་བཙུན་མ་དང་ཚོགས་བཅར་བ་གྲངས་ ༨༦ མཉམ་ཞུགས་གནང་ཡོད།དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་སྐུ་མགྲོན་གཙོ་བོར་ཆེད་ཕེབས་ཀྱིས་གསུང་བཤད་གནང་སྐབས་དང་ཐོག་བོད་བརྒྱུད་ནང་བསྟན་ཁྲོད་བུད་མེད་ནུས་སྟོབས་གོང་སྤེལ་ཚོགས་ཆེན་དེ་བཞིན་ཚོགས་པ་ཐེངས་དང་པོ་ཆགས་ཀྱི་ཡོད་པར་འཚམས་འདྲི་དང་སྦྲགས། བཙན་བྱོལ་དུ་བོད་ཀྱི་ཆོས་དང་རིག་གཞུང་མི་ཉམས་སླར་གསོ་དང་། རྒྱལ་སྤྱིའི་སྟེང་བོད་དོན་ཐོག་རྒྱབ་སྐྱོར་ཐོབ་བཞིན་པ། ལྷག་པར་དགེ་བཤེས་མའི་ཕྱག་འཁྱེར་འབུལ་བཞེས་ཀྱི་ལམ་སྲོལ་རྒྱུན་མཐུད་གནས་ཐུབ་པ་བཅས་སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཡིན་ཞེས་གསུངས། དེ་ནས་ཁོང་གིས་དེང་སྐབས་དགོན་སྡེ་ཁག་ཏུ་བོད་མི་གྲྭ་བཙུན་དུ་ཞུགས་མཁན་ཇེ་ཉུང་དུ་འགྲོ་བཞིན་ཡང་གནས་སྟངས་དེ་ཕྱོགས་གཞན་ནས་བལྟས་ཚེ་ཧི་མ་ལ་ཡའི་རི་རྒྱུད་ནས་དགོན་སྡེ་ཁག་ཏུ་གྲྭ་བཙུན་ཞུགས་མཁན་ཇེ་མང་དུ་འགྲོ་བཞིན་པ་དང་། ཁོང་ཚོས་བོད་ཀྱི་ཆོས་དང་སྐད་ཡིག་སློབ་གཉེར་གནང་བ་དེ་ལེགས་པའི་ཆ་ཞིག་ཏུ་ངོས་འཛིན་གནང་ཡོད། དེ་བཞིན་དགོན་སྡེ་ཁག་ཏུ་བསླབ་པ་སློབ་གཉེར་གནང་རྗེས་སྤྱི་ཚོགས་ནང་ཕན་ཐོགས་སྒྲུབ་ཐུབ་པ་བྱ་རྒྱུ་གལ་ཆེན་པོ་ཡིན་པ་དང་། ལྷག་པར་ཧི་མ་ལ་ཡའི་རི་རྒྱུད་ཀྱི་གྲྭ་བཙུན་རྣམས་རང་ཡུལ་དུ་ཕེབས་ཏེ་རྒྱ་ཆེ་མི་མང་ལ་ཕན་ཐོགས་སྒྲུབ་དགོས་པ་གསུངས།མཐར་དཔལ་ལྡན་སྲིད་སྐྱོང་མཆོག་གིས་དགོན་སྡེ་དང་བཙུན་དགོན་ཁག་གི་ཤེས་ཡོན་ལམ་ལུགས་སྐོར་དང་འབྲེལ་ནས་གསུང་སྐབས་རྒྱུ་མཚན་གང་རུང་གིས་དགོན་པའི་མི་ཚེ་མུ་མཐུད་སྐྱོང་མི་ཐུབ་པ་རྣམས་ལ་རྒྱ་ཆེ་བའི་གོ་སྐབས་དང་། འཚོ་ཐབས་བསྐྲུན་ཆེད་རྒྱུན་ལྡན་ཤེས་ཡོན་ལམ་ལུགས་དང་མཐུན་ནས་བསླབ་གཞི་དང་སློབ་ཚན་འཇོག་དགོས་ཀྱི་ཡོད་པ་ནན་བརྗོད་གནང་། རྩ་བའི་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་ཚོགས་ཆེན་དེ་བཞིན་ཕྱི་ཚེས་ ༢༠ ཉིན་དབུ་འཛུགས་གནང་ཡོད་ཅིང་། ཉིན་གཉིས་རིང་གི་ཚོགས་ཆེན་དེའི་ཐོག་དགེ་བཤེས་མའི་ཕྱག་འཁྱེར་འབུལ་སྲོལ་གྱི་བྱུང་རིམ་དང་། ཤེས་ཡོན་གྱི་གནས་ཚད་དང་བསླབ་གཞིའི་རྩ་འཛིན་ཡར་རྒྱས་གཏོང་ཐབས།...

དེ་རིང་ཕྱི་ལོ་ ༢༠༢༦ ཟླ་ ༥ ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ། ཁ་སང་བརྟན་བཞུགས་བསྟར་འབུལ་ཞུས་མཁན་མདོ་ཁམས་ཆུ་བཞི་སྒང་དྲུག་དང་ཧི་མ་ལ་ཡའི་ནང་པའི་རིག་གཞུང་མཐུན་ཚོགས་ཀྱི་ཚོགས་བཅར་བ་གཙོས་ཧི་མ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་ Ravi Thakur ལགས་སོགས་དད་ལྡན་མཇལ་བཅར་བ་ ༤༠༠ ལྷག་ལ་མཇལ་ཁ་སྩལ་འདུག  མང་མཇལ་ཁྲོད་མགོན་པོ་༸གང་ཉིད་མཆོག་གིས་བོད་མི་དད་ལྡན་པ་གཅིག་གིས་གསོལ་འདེབས་ལ་བཀའ་ལན་དུ།  བོད་ལ་ཕལ་ཆེར་ཆིབས་བསྒྱུར་བསྐྱང་ཐུབ་རྒྱུ་ཡིན་པ་དང་།  བོད་གཞིས་ལུས་རྒྱ་ཆེ་མང་ཚོགས་ཀྱི་སེམས་ཤུགས་ཞེ་དྲག་ཡག་པོ་ཡོད་སྟབས། ང་ཚོས་དེའི་ཐོག་ཞབས་འདེགས་སྒྲུབ། ཕན་ཚུན་བར་གྱི་ཡིད་ཆེས་ལས་སྤྲོ་བ་སྐྱེས་ཏེ། ༸རྒྱལ་བ་བསྟན་འཛིན་རྒྱ་མཚོ་དང་ཞལ་བྲལ་བ་མིན་པར། གཞིས་བྱེས་མཉམ་འཛོ་མས་ཐད་སེམས་ཤུགས་སྐྱེ་དགོས་པའི་ལམ་སྟོན་བཀའ་དྲིན་ཆེ་བ་སྩལ་འདུག    མཇལ་ཁ་གྲུབ་མཚམས་འདི་གའི་གསར་འགོད་པས་དེ་རིང་མཇལ་ཁ་ཞུས་མཁན་ཁོངས་སུ་ཡོད་པ་ཧི་མ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་ Ravi Thakur ལགས་སུ་བཀའ་འདྲི་ཞུ་སྐབས་ཁོང་གིས།  དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོར་མཇལ་ཁ་བཀའ་དྲིན་སྩལ་བར་ཤིན་ཏུ་ནས་ཐུགས་རྗེ་ཆེ་ཞུ་རྒྱུ་དང་། ང་ཚོ་བཞུགས་སྒར་དུ་ཁ་སང་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་ཆེད་ཧི་མ་ལ་ཡའི་ནང་པའི་རིག་གཞུང་མཐུན་ཚོགས་ཀྱི་ཚོགས་མིའི་ངོ་བོའི་ཐོག་ཆེད་མངགས་བཅར་བ་ཡིན་པ་གསུངས་སོང་།  Ravi Thakur ལགས་ཀྱིས། ང་ཚོ་གོང་ས་མཆོག་ལྟ་བུ་སྐྱེས་ཆེན་དམ་པ་སྐུ་འཚོ་བཞུགས་སྐབས་གོ་ལ་འདིར་སྐྱེ་བ་ཐོབ་ཡོད་པ་དེ་ཧ་ཅང་གི་བསོད་ནམས་ཆེན་པོ་ཡིན་པ་དྲན་སྐུལ་དང་འབྲེལ།  ང་ཚོ་རྒྱ་གར་གྱི་ས་མཚམས་དེ་བཞིན་བོད་དང་མཉམ་དུ་ཡོད་པ་དང་།  བོད་དང་ང་ཚོ་ཧི་མ་ལ་ཡའི་མང་ཚོགས་བར་འབྲེལ་བ་དུས་སྔ་མོ་ནས་ཡོད་པ་མ་ཟད།  དཔལ་ནཱ་ལེན་ཌའི་དམ་པའི་ཆོས་ཧི་མ་ལ་ཡའི་ཁུལ་དུའང་འབྱོར་ཡོད་པ་དེ་ལྟར་ཡང་།  སངས་རྒྱས་ཀྱི་ཆོས་ཏེ་ང་ཚོ་རྒྱ་གར་བ་རྣམས་ཀྱི་ཇི་ཙམ་རྒྱུན་འཛིན་གནང་ཡོད་པ་དེ་ལས་ལྷག་པ་ཅིག་བོད་མི་ཚོས་དམ་འཛིན་གྱིས་ཉམས་ལེན་གནང་ཡོད་པར།  དཔེ་མཚོན་དུ་དེ་སྔ་རྒྱ་ནག་གིས་བོད་ལ་བཙན་འཛུལ་སྐབས་བོད་ལ་དམག་དཔུང་དང་གོ་མཚོན་རིགས་དེ་ཙམ་མེད་པ་དེ་སྟོན་པ་སངས་རྒྱས་ཀྱི་འཚེ་བ་མེད་པའི་ལམ་སྟོན་དེ་དག་ལག་བསྟར་གནང་བ་ཞིག་མཆོན་གྱི་ཡོད་པ་དེར་གུས་པས་ཡི་རངས་བསྔགས་བརྗོད་ཞུ་ཡི་ཡོད་ཅེས་གསུངས་སོང་། སྐུ་ཞབས་ཁོང་གིས་ད་དུང་།  བོད་པའི་གཞོན་སྐྱེས་ཚོའི་ངོས་ནས་བཟོད་སྲན་དང་། སྙིང་རྗེ།...

ཕྱི་ཚེས་ ༡༥ བོད་ཁམས་ཡོངས་སུ་འཁྱམ་སྐྱོད་བྱེད་མཁན་བོད་ཀྱི་རྩོམ་པ་པོ་གྲགས་ཅན་འབྲོག་སྐྱ་བོ་ལགས་ཀྱིས་གནས་ཚུལ་སྤེལ་བ་ལྟར་ན། སྔོན་ཆད་ཡུན་ནན་བདེ་ཆེན་རྫོང་དུ་བོད་ཡིག་སློབ་སྦྱོང་བྱེད་སའི་སློབ་གྲྭ་གཉིས་ཡོད་པ་དང་། དེང་སང་སློབ་གྲྭ་དེ་གཉིས་སྒོ་བརྒྱབ་ཡོད་པ་མ་ཟད། སློབ་གྲྭའི་ར་བའི་ནང་དུ་ཞི་ལ་དང་ཁྱི་སྡོམ་སོགས་འཚང་ཁ་རྒྱག་བཞིན་ཡོད་པའི་སྣང་བརྙན་དྲྭ་ལམ་དུ་བརྒྱུད་སྐུལ་ཤུགས་ཆེ་འགྲོ་བཞིན་པར་བོད་ཀྱི་ཆོས་རིག་དང་སྐད་ཡིག་བཅས་པར་གལ་ཆེན་འཛིན་མཁན་གྱི་བོད་མི་མང་དག་ཅིག་ནས་དེ་འབྲེལ་དྲྭ་ལམ་ཐོག་ཕངས་སེམས་ཀྱི་རྣམ་པ་ཤུགས་ཆེན་པོ་བསྟན་བཞིན་ཡོད་པ་རེད་འདུག འདི་ག་གསར་ཁང་གིས་འབྲེལ་ཡོད་བརྒྱུད་ནས་གནས་ཚུལ་རྒྱུས་ལོན་བྱས་པ་ལྟར་ན། བདེ་ཆེན་རྫོང་གི་བོད་ཡིག་སློབ་གྲྭ་དེ་སྔོན་ཆད་མིང་ལ་ཨ་འབྱུང་ཟེར་བའི་བོད་ཡིག་དགེ་རྒན་ཞིག་གིས་བཙུགས་པ་ཞིག་ཡིན་པ་དང་། སློབ་གྲྭའི་མིང་ལ་ཁ་བ་དཀར་པོ་ཀུན་ཕན་ལག་རྩལ་སློབ་གྲྭ་ཞེས་བཏགས་ཡོད་པ་དང་ཆབས་ཅིག སློབ་གྲྭ་འདིའི་ནང་བོད་ཕྲུག་ཚོར་བོད་ཡིག ལྷ་བྲིས། ལག་ཤེས་སོགས་བོད་ཀྱི་རིག་གཞུང་དང་འབྲེལ་བའི་སློབ་སྦྱོང་སྣ་མང་བསླབས་ཀྱི་ཡོད་ཀྱང་། རྗེས་སུ་རྒྱ་ནག་གཞུང་གི་བཅའ་ཁྲིམས་ལྟར་བོད་པའི་ཕྲུག་གུ་ཚོ་ངེས་པར་དུ་རྒྱ་གཞུང་གི་སློབ་གྲྭར་འགྲོ་དགོས་པའི་སྒྲིག་ཁྲིམས་བཟོས་རྗེས་སློབ་ཕྲུག་ཉུང་རུ་ཕྱིན་པ་དང་དགེ་རྒན་རྣམས་རིམ་བཞིན་ལས་གནས་ནས་ཐོན་དགོས་བྱུང་ཡོད་འདུག མ་ཟད། དགེ་རྒན་ཨ་འབྱུང་ཁོང་ཉིད་སྐུ་གྲོངས་རྗེས་བོད་ཡིག་སློབ་གྲྭ་དེ་རྩ་བ་ནས་ཉམས་ཡོད་པ་དང་དེང་སྐབས་བདག་པོ་མེད་པའི་གྱང་ཆགས་ལྟ་བུ་གྱུར་ཡོད་པས། ད་ཆ་བོད་ཡུལ་གྱི་ས་ཁུལ་གཞན་དང་བསྡུར་ན་ཡུན་ནན་ས་ཁུལ་དུ་བོད་ཀྱི་སྐད་ཡིག་དང་རིག་གཞུང་ཧ་ཅང་ཉམས་རྒུད་དུ་ཕྱིན་ཡོད་པ་དང་ལྷག་པར་ལོ་ན་གཞོན་པ་ཚོའི་ནང་དུ་བོད་སྐད་དང་བོད་ཡིག་ཤེས་མཁན་ཧ་ཅང་ཉུང་ཉུང་ཡིན་པ་འགྲེལ་བརྗོད་གནང་བྱུང་། རྩ་བའི་བདེ་ཆེན་བོད་རིགས་ས་ཁུལ་ནི་གནས་རི་རོང་ཆེན་ཁ་བ་དཀར་པོ་སྟེ། བོད་མི་རྣམས་ཀྱིས་དགྲ་ལྷ་བཅུ་གཉིས་ཞེས་བཀུར་བ་དེའི་གནས་མཆོག་དང་། དད་ལྡན་ཀུན་གྱི་མཆོད་ཡུལ་དུ་གྱུར་ཡོད་ལ། དེང་གི་དུས་སུ་ལྗོངས་རྒྱུ་ལྟ་སྐོར་བྱ་ཡུལ་གཙོ་བོ་ཞིག་ཡིན་འདུག The post བདེ་ཆེན་རྫོང་དུ་བོད་ཡིག་སློབ་སྦྱོང་བྱེད་སའི་སློབ་གྲྭ་གཉིས་པོ་སྒོ་བརྒྱབ་པར་སེམས་འཚབ། appeared first on vot.

བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ཁྱབ་ཁོངས་ YES+ གཞོན་སྐྱེས་ནུས་སྟོབས་གོང་འཕེལ་རྒྱབ་སྐྱོར་ཚོགས་པའི་གོ་སྒྲིག་འོག་འཆར་སྣང་དང་ལག་ལེན། དེ་བཞིན་མཉམ་རུབ་ཀྱི་མི་ཤུགས་གོང་སྤེལ་ཞེས་པའི་བརྗོད་གཞིའི་ཐོག་ ༢༠༢༦ ལོའི་ལས་ཤུགས་གོང་འཕེལ་ཐབས་བྱུས་ལྷན་ཚོགས་ཀྱི་ཚོགས་འདུ་དབུ་འཛུགས་གནང་སོང་། དེ་ཡང་དེ་རིང་བཞུགས་སྒར་ཉེ་འདབས་སུ་ཆགས་པའི་རྡ་ས་འཛིན་སྐྱོང་སྦྱོང་བརྡར་ཁང་དུ་འཚོགས་པའི་ཉིན་གསུམ་གྱི་ཚོགས་འདུ་དབུ་འབྱེད་ཐོག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་ས་གནས་ཁག་འདྲ་མིན་ནས་ཕེབས་པའི་གཞུང་ཁོངས་མ་ཡིན་པའི་ཚོགས་སྡེ་ཁག་གི་སྐུ་ཚབ་དང་མཁས་ལས་པ་སུམ་ཅུ་ལྷག་མཉམ་ཞུགས་གནང་སོང་། མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་གཞོན་སྐྱེས་དང་སྒྲིག་འཛུགས་གཉིས་དབར་འབྲེལ་བ་དམ་ཟབ་ཀྱི་ཐོག་ནས་ཡིད་ཆེས་རྙེད་པ་བཟོས་དགོས་པ་དང་། གཞུང་ཁོངས་མ་ཡིན་པའི་སྒྲིག་འཛུགས་སོ་སོས་དམིགས་ཡུལ་དང་དགོས་མཁོ་ལ་གཞིགས་པའི་གཞོན་སྐྱེས་གང་མང་དང་འབྲེལ་བ་བཙུགས་ཐུབ་པ་བྱེད་དགོས་པ་མ་ཟད། བོད་མིའི་སྒྲིག་འཛུགས་ཀྱི་ལྷན་ཁང་རེ་རེའི་དང་འབྲེལ་བ་གནང་སྟེ་མཉམ་རུབ་ཀྱི་ནུས་པ་སྤུང་ཐབས་བྱེད་དགོས་གལ་ཡིན་པ་གསུངས་སོང་། མ་ཟད་མཛད་སྒོ་གྲུབ་མཚམས་སུ་འདི་གའི་གསར་འགོད་པས་སྲིད་སྐྱོང་སྤེན་པ་ཚེ་རིང་མཆོག་ལ་ཚོགས་འདུའི་གལ་གནད་དང་བོད་པའི་གཞོན་སྐྱེས་རྣམས་ལ་བརྡ་ལན་ཇི་ཡོད་སྐོར་བཅར་འདྲི་ཞུས་པར་ཁོང་གིས། སྤྱི་ཚོགས་ནང་དུ་མིའི་ནུས་པ་དང་དཔལ་འབྱོར་གྱི་ནུས་པ་དགོས་གལ་ཆེ་བ་ཡིན་པ་དང་སྦྲགས། འདི་ལྟ་བུའི་ཟབ་སྦྱོང་བརྒྱུད་ནས་བོད་མི་རྣམས་ནུས་པ་ལྡན་པ་ཞིག་ཆགས་རྒྱུའི་འབད་བརྩོན་བྱེད་རྒྱུ་དེ་ཡིན་པ་སོགས་གསུངས་སོང་། དེ་བཞིན་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་སུ་བཅར་འདྲི་ཞུས་པར་ཁོང་གིས། སྒྲིག་འཛུགས་གང་ཡིན་ཡང་གཞོན་སྐྱེས་རྣམས་ནི་སྒལ་ཚིགས་ལྟ་བུ་ཆགས་ཀྱི་ཡོད་པར་བརྟེན། བོད་པའི་གཞོན་སྐྱེས་རྣམས་ལ་བོད་པ་ཡིན་པའི་ཞེན་ཁོག་དང་ལ་རྒྱ་ཡོད་ཀྱང་། དམིགས་བསལ་བོད་དོན་ཆེད་དུ་ལས་ཀ་བྱེད་སའི་སྡིངས་ཆ་མེད་པ་ལྟ་བུ་ཆགས་ཡོད་པར་བརྟེན། དེ་རིང་གི་ཚོགས་འདུའི་བརྒྱུད་ནས་བོད་པའི་གཞོན་སྐྱེས་གང་མང་ལ་སྡིངས་ཆ་དང་གོ་སྐབས་བསྐྲུན་ཐུབ་པའི་རེ་བ་ཡོད་པ་སོགས་གསུངས་སོང་། རྩ་བའི་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ཁྱབ་ཁོངས་ YES+ གཞོན་སྐྱེས་ནུས་སྟོབས་གོང་འཕེལ་རྒྱབ་སྐྱོར་ཚོགས་པ་དེ་བཞིན་ཕྱི་ལོ་ ༢༠༢༢ ལོར་དབུ་འཛུགས་གནང་བ་ཞིག་ཡིན་པ་དང་འབྲེལ། ད་ལན་གྱི་ཚོགས་འདུ་དེ་བཞིན་ཚོགས་པ་འདི་གའི་གོ་སྒྲིག་འོག་གཞུང་ཁོངས་མིན་པའི་ཚོགས་པ་ཁག་གི་འགན་འཛིན་དང་མཁས་ལས་པ་སོགས་གདན་ཞུས་གནང་བའི་ཚོགས་འདུ་ཐེངས་དང་པ་དེ་ཆགས་ཀྱི་ཡོད་པ་རེད། The post ལས་ཤུགས་གོང་འཕེལ་ཐབས་བྱུས་ལྷན་ཚོགས་ཀྱི་ཚོགས་འདུ་ཐེངས་དང་པོ་དབུ་འཛུགས། appeared first on vot.

དེ་རིང་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་ཚོགས་ཆེན་ཉིན་གཉིས་པའི་ཐོག་བོད་རིགས་ཀྱི་སྤྱི་ཚོགས་ནང་སྐྱེས་པ་དང་བུད་མེད་ལ་ཐོབ་ཐང་འདྲ་མཉམ་ཡོད་ཀྱང་། བུད་མེད་རྣམ་པས་ངས་འཇོན་གྱི་མ་རེད་ཅེས་པའི་བསམ་བློ་དེ་དོར་བའི་ཐོག་ནས་དེང་རབས་དང་མཐུན་པའི་བཟང་སྤྱོད་སོགས་སྲོལ་རྒྱུན་གྱི་རིག་གནས་ཟུང་དུ་སྦྲེལ་ནས་ལྷག་བསམ་དང་རྣམ་དཔྱོད་ལྡན་པའི་འགོ་ཁྲིད་ཅིག་བྱ་དགོས་པའི་སྐུལ་མ་དང་། ཁྱིམ་ཚང་དང་ཤེས་ཡོན་ལྟེ་གནས་ཁང་། ཚོགས་པ་སྒྲིག་འཛུགས་ཁག་གི་འགོ་ཁྲིད་གསོ་སྐྱོང་ལ་ཤུགས་རྐྱེན་ཆེན་པོ་ཡོད་སྟབས། དེ་དག་གི་ནང་དུ་ཕོ་མོའི་ལྟ་བའི་སྐོར་ལ་དཔྱད་པ་ཞིབ་ཕྲ་བྱས་ཚེ། མ་འོངས་པར་སྤྱི་ཚོགས་ནང་ལ་འགྱུར་བ་སླེབས་ཐུབ་རྒྱུ་ཡིན་པའི་བརྡ་ལན་གནང་སོང་། དེ་ཡང་དེ་རིང་ཕྱི་ཚེས་ ༢༡ ཉིན་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་ཚོགས་ཆེན་ཉིན་གཉིས་པའི་ཐོག སྤྱི་ཚོགས་དང་དགོན་སྡེའི་ནང་དུ་དགེ་བཤེས་མའི་འགོ་ཁྲིད་ཅེས་པའི་བརྗོད་གཞིའི་སྐོར་གསུང་བཤད་དང་བགྲོ་གླེང་གི་ཚོགས་ཐུན་དང་པོའི་ཐོག་བཙུན་དགོན་འཇམ་དབྱངས་ཆོས་གླིང་གི་དགེ་བཤེས་མ་བློ་བཟང་ཆོས་སྒྲོན་ལགས་དང་། དཔལ་འབྱོར་ལས་ཁུངས་ཀྱི་ཁྱབ་ཁོངས་བུད་མེད་ནུས་སྟོབས་ཚན་པའི་འགན་འཛིན་ཚེ་རིང་སྐྱིད་ལགས། བཙུན་དགོན་སྒྲོལ་མ་གླིང་གི་སློབ་སྤྱི་དགེ་བཤེས་མ་བདེ་ལེགས་དབང་མོ་ལགས་བཅས་ཀྱིས་གསུང་བཤད་གནང་ཡོད་པ་དང་། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་གཙོ་སྐྱོང་གནང་ཡོད་པ་རེད། བཙུན་དགོན་འཇམ་དབྱངས་ཆོས་གླིང་གི་དགེ་བཤེས་མ་བློ་བཟང་ཆོས་སྒྲོན་ལགས་ཀྱིས། ནང་གསེས་བརྗོད་གཞི་མིག་དཔེ་དང་སློབ་སྟོན་སྐོར་གསུང་བཤད་གནང་བའི་སྐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བུད་མེད་ནུས་སྟོབས་གོང་འཕེལ་དང་ལྷག་པར་བཙུན་མའི་ནུས་སྟོབས་གོང་འཕེལ་སྐོར་བཀའ་སློབ་ལམ་སྟོན་རིམ་པ་གནང་བ་རྣམས་དྲན་གསོ་དང་འབྲེལ། མགོན་པོ་༸གང་ཉིད་མཆོག་གིས་བཙུན་མ་རྣམས་ལ་གཞུང་ཆེན་སློབ་གཉེར་བྱ་དགོས་པ་དང་རིམ་པས་དགེ་བཤེས་མའི་མཚན་གནས་སྩལ་བའི་ལམ་ལུགས་གསར་གཏོད་མཛད་པ་དེ་ནི་དེ་སྔོན་ལོ་རྒྱུས་ནང་བྱུང་མྱོང་མེད་པ་ཞིག་ཡིན་པ་མ་ཟད། སྤྱི་ཚོགས་དང་དགོན་སྡེ། སློབ་གྲྭ་ཁག་གི་ནང་དུ་འགན་འཁུར་ཐུབ་པ་ཞིག་བྱ་དགོས་པའི་དྲན་སྐུལ་གནང་སོང་། ལྷག་པར་དགེ་བཤེས་མ་རྣམས་སྐད་ཡིག་དང་གཞུང་ཆེན་ཟུང་འབྲེལ་གྱི་འདབ་ཤོག་གཉིས་ལྡན་ཞིག་བྱུང་ཚེ་སོ་སོའི་སྦྱངས་པའི་སློབ་སྦྱོང་དེ་བེད་སྤྱོད་ཚུལ་བཞིན་བྱ་ཐུབ་རྒྱུ་དང་། ༸གོང་ས་མཆོག་གི་ལམ་སྟོན་བཞིན་བསྟན་པ་སྤྱི་བཙན་གྱི་ཐོག་ནས་དགོངས་བཞེས་གནང་དོགས་རྒྱུ་གལ་ཆེན་པོ་ཡིན་པ། ཤེས་ཡོན་དང་ལྷག་བསམ། བྱམས་བརྩེ་ཅན་ཞིག་བྱ་ཐུབ་ཚེ་དེ་ནི་འགོ་ཁྲིད་ལ་དགོས་པའི་ཁྱད་ཆོས་ཤིག་ཆགས་ཀྱི་ཡོད་པ་སོགས་གསུངས་སོང་། དེ་བཞིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་ཚན་པའི་འགན་འཛིན་ཚེ་རིང་སྐྱིད་ལགས་ཀྱིས། བཙུན་མ་རྣམས་དགེ་རྒན་དང་མཁན་མོ། དེ་བཞིན་མང་ཚོགས་ཀྱི་བསམ་བློའི་འགོ་ཁྲིད་ཆགས་ཐབས་སྐོར་ལ་གསུང་བཤད་གནང་བའི་ཁྲོད། རྒྱལ་སྤྱིའི་ཁྱོན་ཡོངས་ཀྱི་ནང་དུ་བུད་མེད་གྲོས་ཚོགས་འཐུས་མིའི་འགོ་ཁྲིད་བརྒྱ་ཆ་ ༢༨ དང་འཛིན་སྐྱོང་ནང་བརྒྱ་ཆ་ ༢༢ ཆགས་ཀྱི་ཡོད་པ། བོད་མིའི་སྒྲིག་འཛུགས་ལ་མཚོན་ན་བུད་མེད་ཀྱི་འགོ་ཁྲིད་ཀྱི་བརྒྱ་ཆ་ ༣༤ དང་གྲོས་ཚོགས་ནང་ལ་བུད་མེད་ཀྱི་བརྒྱ་ཆ་ ༢༤ ཆགས་ཀྱི་ཡོད་སྟབས། ཁྱད་པར་དེ་དག་ཇི་ལྟར་ཡོང་གི་ཡོད་པ་དང་། སྤྱི་ཚོགས་ཀྱིས་བུད་མེད་ལ་གསོ་སྐྱོང་བྱ་ཐབས། སྤྱི་ཚོགས་ཀྱི་སྒྲོམ་གཞིའི་གནས་སྟངས་གང་འདྲ་ཡིན་མིན་སོགས་ཀྱི་གནད་དོན་རྣམས་ལ་ཤེས་རྟོགས་ཐུབ་དགོས་གལ་ཡིན་ཞིང་།...

ཀུན་བདེ་གླིང་རྟ་ཚག་རྗེ་སྤྲུལ་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནི་བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་གཏོང་པར་བླ་ན་མེད་པའི་རྨང་གཞི་དང་གོ་སྐབས་སྐྲུན་མཁན་ཡིན་ཞེས་གསུངས་སོང་། ཟླ་འདིའི་ཕྱི་ཚེས་ ༢༠ དང་ ༢༡ ཉིན་གྲངས་གཉིས་རིང་༧གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་དུ། ཏཱ་ལའི་བླ་མའི་དགེ་རྩ་དང་བོད་མིའི་སྒྲིག་འཛུགས་ཆོས་རིག་ལས་ཁུངས་གཉིས་ཀྱི་གོ་སྒྲིག་འོག བོད་བརྒྱུད་ནང་བསྟན་ཁྲོད་བུད་མེད་ཀྱི་ནུས་སྟོབས་གོང་སྤེལ་ཚོགས་ཆེན་འཚོགས་ཏེ། དེ་རིང་མཇུག་བསྡོམས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕེབས་ཏེ། གྲངས་འཛིན་དཔེ་མཛོད་ཐོག་ནས་བོད་ཀྱི་མཁས་པ་རྣམས་ཀྱིས་བརྩམས་པའིི་དཔེ་ཆ་ཡོངས་རྫོགས་བདག་ཉར་བྱ་དགོས་པའི་སྐོར་ལམ་སྟོན་གནང་སོང་ལ། ཐེངས་འདིའི་ཚོགས་ཆེན་ཐོག་དྷ་ས་ཁུལ་གྱི་ཤེས་ཡོན་ལྟེ་གནས་ཁང་ཁག་ཉི་ཤུའི་སྐུ་ཚབ་དང་། ཐེངས་འདིའི་ཚོགས་ཆེན་གྱི་གཙོ་སྐྱོང་གནང་མཁན་དང་གཏམ་བཤད་པ་ ༢༤ ། དེ་བཞིན་བཙུན་དགོན་ཁག་ནས་བཙུན་མ་གྲངས་ ༨༦ མཉམ་ཞུགས་གནང་ཡོད་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། མདོ་སྔགས་ཟུང་འབྲེལ་དང་ལུང་རྟོགས་ཀྱི་བསྟན་པ་ཡོངས་རྫོགས་བོད་ཀྱི་སྐད་ཡིག་ནང་དུ་མ་གཏོགས་མེད་ཀྱང་། སྐད་ཡིག་བཀོལ་སྤྱོད་བྱེད་མཁན་གྱི་མི་གྲངས་ཉུང་ཉུང་ཞིག་ལས་མེད་ཚེ་སྐད་ཡིག་ལ་ཉེན་ཁ་ཡོང་གི་ཡོད། ཧི་མ་ལ་ཡའི་རི་རྒྱུད་ཀྱི་མི་རྣམས་བོད་ཀྱི་དགོན་སྡེ་ནང་དུ་ཞུགས་ཏེ་བོད་ཡིག་ཐོག་སློབ་གཉེར་བྱེད་བཞིན་ཡོད་དུས། བོད་ཀྱི་སྐད་ཡིག་བཀོལ་སྤྱོད་བྱེད་མཁན་མང་དུ་འགྲོ་བཞིན་ཡོད། ཐར་བ་འདོད་མཁན་མི་ཚང་མར་ནང་ཆོས་ཀྱིས་ཕན་ཐོགས་དགོས་པ་མ་གཏོགས། བོད་དང་ཧི་མ་ལ་ཡ་གཉིས་བདག་གི་ཡོད་པ་དེ་འདྲ་མ་རེད། དེའི་དངོས་ཡོད་གནས་སྟངས་ཐོག་ནས་དགོན་པའི་ནང་འགྱུར་བ་ཆེན་པོ་འགྲོ་བཞིན་ཡོད། དགོན་སྡེ་ཆེན་པོ་ཁག་ཏུ་ནང་ཧི་མ་ལ་ཡའི་མི་རྣམས་ཀྱིས་འགན་འཁུར་བའི་དུས་ཤིག་ཤར་ཡོང་གི་འདུག ཅེས་དང་། ཆོས་རིག་ལས་ཁུངས་ཀྱི་ལས་གཞིའི་རྒྱ་ཆེ་ཤོས་དེ་གྲངས་འཛིན་དཔེ་མཛོད་རེད། མ་འོངས་བར་ལས་གཞི་འདི་ཚུགས་ཚད་བྱུང་ཚེ་དཔེ་ཆ་འཚོལ་བ་དཀའ་ངལ་འབྱུང་གི་མ་རེད། ད་དུང་དེའི་ཐོག་ཏུ་མིས་བཟོས་རིག་ནུས་བེད་སྤྱོད་གཏོང་ཐུབ་ཚེ། བསྐལ་བ་མ་སྟོང་བར་དུ་བོད་ཀྱི་མཁས་པ་རྣམས་ཀྱིས་བརྩམས་པའིི་དཔེ་ཆ་ཡོངས་རྫོགས་བདག་ཉར་བྱ་ཐུབ་པའི་གནས་བབ་ཞིག་ཡོང་གི་རེད། ཅེས་གསུངས་སོང་། ཡང་སྲིད་སྐྱོང་མཆོག་གིས། བོད་ཀྱི་དགོན་སྡེ་ཁག་ཏུ་ལོ་རྟག་པར་དགེ་བཤེས་དང་མཁན་པོ་མང་པོ་བསླབ་པ་མཐར་སོན་གྱི་ཡོད་ཅིང་། དགོན་པར་བཞུགས་ནས་བསྡད་ཚེ་སྤྱི་ཚོགས་ནང་ཕན་ཐོགས་ཀྱི་ཡོད་མེད་ཤེས་ཀྱི་མི་འདུག ཧི་མ་ལ་ཡའི་རི་རྒྱུད་ཀྱི་མི་རྣམས་ཀྱིས་བསླབ་པ་མཐར་ཕྱིན་རྗེས། སོ་སོའི་ཁོངས་ཀྱི་མི་རྣམས་ལ་ཕན་ཐོགས་རྒྱུ་གལ་ཆེན་པོ་རེད་བསམ་གྱི་འདུག ནང་ཆོས་ཀྱི་ཁྱད་ཆོས་ནི་འགྲོ་བའི་དོན་བསྒྲུབ་པར་མི་མང་གི་བསམ་བློའི་དཀའ་ངལ་སེལ་རྒྱུ་དེ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དང་མི་སྣ་མང་པོ་ཞིག་གི་དཀའ་ལས་བརྒྱབ་པར་བརྟེན་ནས་བཙུན་མོའི་སྡེ་ཡར་རྒྱས་ཡོང་བཞིན་ཡོད།...

རྒྱ་ནག་གི་མགོ་འཁྲིད་ཞི་ཅིན་ཕིན་གྱིས་ཟླ་འདིའི་ཉིན་གྲངས་ ༡༠ ཡི་ནང་ཨ་རིའི་སྲིད་འཛིན་ཊོམ་ཕུ་དང་ཨུ་རུ་སུའི་སྲིད་འཛིན་ཕུ་ཊིན་གཉིས་པེ་ཅིན་དུ་སྣེ་ལེན་བྱས་ཡོད་པ་མ་ཟད་མི་འགྱང་བར་བྱང་ཀོ་རི་ཡར་སོང་སྟེ་ཀེམ་ཇོང་ཨུན་ལ་ཐུག་འཆར་ཡོད་པའི་གནས་ཚུལ་ཐོན་འདུག ཟླ་འདིའི་ཕྱི་ཚེས་   ༡༤ ཉིན་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་ཨ་རིའི་སྲིད་འཛིན་ཊོམ་ཕུ་མཆོག་གཉིས་ཐུག་འཕྲད་གནང་སྟེ་ཨ་རྒྱ་གཉིས་ཀྱི་ཚོང་འབྲེལ་དང་། ཨི་རན་གྱི་དམག་འཁྲུག  མིས་བཟོས་རིག་ནུས། ཐའེ་ཝན་གྱི་གནད་དོན་སོགས་ཀྱི་ཐོག་གྲོས་མོལ་དང་། ཁ་སང་ཕྱི་ཚེས་ ༢༠ ཉིན་རྒྱ་ནག་གི་རྒྱལ་ས་པེ་ཅིན་དུ་ཨུ་རུ་སུའི་མགོ་ཁྲིད་པུ་ཊིན་དང་ཐུག་འཕྲད་བྱས་ཡོད་ཅིང་། མི་འགྱངས་བར་བྱང་ཀོ་རི་ཡའི་མགོ་ཁྲིད་ཀེམ་ཇོང་ཨུན་དང་ཐུག་འཕྲད་བྱ་འཆར་ཡོད་པས། གལ་ཏེ་རྒྱ་ཀོའི་མགོ་ཁྲིད་ཐུག་འཕྲད་བྱས་པ་ཡིན་ན། དེ་ནི་ཕྱི་ལོ་ ༢༠༡༩ ཡི་རྗེས་སུ་ཞི་ཅིན་ཕིན་བྱང་ཀོ་རི་ཡར་འགྲོ་ཐེངས་དང་པོ་ཆགས་ཀྱི་ཡོད་འདུག་ལ། ལྷོ་རི་ཡའི་སྲིད་གཞུང་གིས་དེ་འབྲེལ་གནས་ཚུལ་སྤེལ་བའི་ནང་། ང་ཚོས་བྱང་ཀོ་རི་ཡ་དང་རྒྱ་ནག་བར་གྱི་ཐུག་འཕྲད་སྐབས། ཀོ་རི་ཡའི་མཚོ་འགག་ཁུལ་དུ་ཞི་བདེ་དང་བརྟན་ལྷིང་ལ་ཕན་ཐོགས་ཡོང་བའི་གྲོས་མོལ་བྱ་རྒྱུར་རེ་བ་བྱེད་ཀྱི་ཡོད།  དེ་བཞིན་རྒྱ་ནག་གིས་ཀྱང་ཀོ་རི་ཡའི་མཚོ་འགག་ཁུལ་དུ་ཕན་འབྲས་ཐོན་པའི་ལས་དོན་ཞིག་གཉེར་རྒྱུར་རེ་བ་བྱེད་ཀྱིན་ཡོད། ཅེས་བརྗོད་འདུག རྒྱ་ནག་གཞུང་ཕྱོགས་ཀྱིས་གནས་ཚུལ་དེའི་སྐོར་ལ་གང་ཡང་བཤད་མེད་ཀྱང་། དེ་རིང་ཕྱི་ཚེས་ ༢༡ ཉིན་བྱང་ཀོ་རི་ཡའི་གསར་ཁང་ཆེ་གྲས་ཡོན་ཧེབ་( YonHap )གིས་སྤེལ་བའི་གནས་ཚུལ་ལྟར་ན། ཟླ་འདིའི་ཟླ་མཇུག་གམ་ཕྱི་ཟླ ༦ པའི་ཟླ་མགོར་རྒྱ་ནག་གི་མགོ་ཁྲིད་ཞི་ཅིན་ཕིན་བྱང་ཀོ་རི་ཡའི་རྒྱལ་ས་ཕེན་ཡཱང་དུ་ཡོང་སྟེ། མགོ་ཁྲིད་ཀེམ་་ཇོང་ཨུན་དང་ཐུག་འཕྲད་བྱ་འཆར་ཡོད་སྟབས་ཉིན་ཤས་གོང་ནས་རྒྱ་ནག་གི་བདེ་སྲུང་མི་སྣ་དང་རྒྱལ་འབྲེལ་འཐབ་ཇུས་ཚན་པའི་མི་སྣའང་ཕེན་ཡཱང་དུ་འབྱོར་ཟིན་ཡོད་ལུགས་བསྒྲགས་འདུག ཡིན་ནའང་། ད་ལྟའི་ཆར་གནས་ཚུལ་དེའི་ཐད་གསལ་ཁ་གང་ཡང་མེད་པ་རེད། རྒྱལ་སྤྱིའི་གནད་དོན་དབྱེ་ཞིབ་པ་དག་གིས། འདས་པའི་མི་ལོ་གཉིས་ལྷག་གི་རིང་བྱང་ཀོ་རི་ཡ་དང་ཨུ་རུ་སུའི་བར་འབྲེལ་ལམ་ཇེ་བཟང་དུ་གྱུར་ནས་ཀོ་རི་ཡས་ཨུ་རུ་སུར་དམག་དོན་དང་མཚོན་ཆས་རོགས་འདེགས་བྱས་ཡོད་སྟབས། བྱང་ཀོ་རི་ཡར་རྒྱ་ནག་གི་དབང་ཤུགས་སྔར་ལས་རྒྱ་སྐྱེད་ཐབས་དང་། ཨ་རིའི་བྱང་ཀོ་རི་ཡར་དབང་ཤུགས་སྐྱེད་པར་འགོག་ཐབས་བྱེད་ཀྱི་ཡོད་པའི་ཚོད་དཔག་བྱེད་ཀྱི་ཡོད་འདུག  འདས་ལོའི་ཕྱི་ཟླ་ ༩ ཚེས་ ༣ ཉིན་བྱང་ཀོ་རི་ཡའི་མགོ་ཁྲིད་ཀེམ་ཇོང་ཨུན་དང་ཨུ་རུ་སུའི་མགོ་ཁྲིད་པུ་ཊིན་གཙོས་རྒྱལ་ཁབ་ཉི་ཤུ་ལྷག་གི་མགོ་ཁྲིད་ཐུག་འཕྲད་དང་།   ཕྱོགས་གཉིས་ཀྱི་མཉམ་ལས་ཀྱི་ལས་དོན་ཐད་སྔར་ལྷག་ཤུགས་སྣོན་བརྒྱག་རྒྱུར་གླེང་སློང་གནང་ཡོད་ལ། འདི་ལོའི་ཕྱི་ཟླ་ ༤ ཚེས ༡༠ ཉིན་རྒྱ་ནག་ཕྱི་སྲིད་བློན་ཆེན་ཝང་ཡེ་ཡི་ཉིན་གྲངས་གཉིས་རིང་གི་བྱང་ཀོ་རི་ཡའི་གཞུང་འབྲེལ་སྐོར་སྐྱོད་དང་བསྟུན། རྒྱལ་ས་ཕེན་ཡཱང་དུ་བྱང་ཀོ་རི་ཡའི་མགོ་ཁྲིད་ཀེམ་དང་། ཀོ་རི་ཡའི་ཕྱི་སྲིད་བློན་ཆེན་ཆོ་སན་ཧེཡོ་(Choe Son Hui) དང་ཐུག་འཕྲད་བྱས་ཏེ། ཕྱོགས་གཉིས་ཀྱི་མཉམ་འབྲེལ་དམག་དོན་འཐབ་ཇུས་ཟེར་བ་གོང་མཐོར་དང་། རྒྱ་ནག་དང་བྱང་ཀོ་རི་ཡ་གཉིས་ཀྱི་ཚོང་དོན་མཉམ་ལས་ཀྱི་འབྲེལ་ལམ་བཙུགས་ནས་མི་ལོ་ ༦༥ འཁོར་བ་དང་འབྲེལ།  དེང་གི་འཛམ་གླིང་ཡོངས་ཀྱི་ཆབ་སྲིད་འཕོ་འགྱུར་གྱི་ཁ་ཕྱོགས་བཞིན།  དུས་གཏན་དུ་ཡིད་ཆེས་དང་མཛའ་བརྩེའི་ཐོག་གྲོས་མོལ་གྱི་ལམ་ནས་ཕན་ཚུན་རྒྱབ་སྐྱོར། དེ་བཞིན་གཉིས་ཕན་གྱི་འབྲེལ་ལམ་ལས་མི་མང་འབྲེལ་འདྲིས་དང་རིག་གཞུང་བརྗེ་ལེན། ཀོ་རི་ཡའི་སྤྱི་ཚོགས་འཕེལ་རྒྱས་དང་དཔལ་འབྱོར་ཡར་རྒྱས་གཏོང་བར་སྐུལ་འདེད་བྱ་རྒྱུ་ཡིན་ལུགས་ཀྱི་ཐད་ལ་གླེང་སློང་བྱས་ཡོད་པ་རེད། དེ་བཞིན་རྒྱ་ནག་དང་བྱང་ཀོ་རི་ཡའི་བར་འདས་པའི་མི་ལོ་དྲུག་ཅུ་ལྷག་གི་རིང་ཚོང་དོན་མཉམ་ལས་ཀྱི་ལས་དོན་གཉེར་ཡོད་ཅིང་། ཀོ་རི་ཡས་རྒྱ་ནག་ལ་མཚོ་ཟས་དང་། ལྕགས་རྡོ་(Iron ore)། རས་ཆ་སོགས་ཕྱིར་ཚོང་དང་། རྒྱ་ནག་ནས་སྣུམ་དང་རྡོ་སྣུམ་གྱི་ཐོན་རྫས་ཁག འཕྲུལ་རིགས། ཟས་རིགས། ཐོན་འབྲས་དང་རྫས་རིགས་སོགས་ནང་འདྲེན་བྱས་ཏེ། རྒྱལ་ཁབ་དེའི་ཚོང་དོན་གྱི་ཕྱིའི་རྒྱལ་ཁབ་ཀྱི་ཚོང་ཟོག་བརྒྱ་ཆ་དགུ་བཅུ་ལྷག་རྒྱ་ནག་ནས་སྐྱེལ་འདྲེན་བྱེད་ཀྱིན་ཡོད་སྟབས། རྒྱ་ནག་ནི་ཁེར་ཚུགས་སུ་གནས་པའི་བྱང་ཀོ་རི་ཡའི་ཚོང་དོན་གྱི་ཐོག་ནས་འབྲེལ་ལམ་ཆེ་ཤོས་ཀྱི་རྒྱལ་ཁབ་ཅིག་ཏུ་གྱུར་བས། རྒྱ་ནག་གིས་ཚོང་དོན་དང་ཐབས་ཇུས་ཀྱི་ཐོག་ནས་ཚོད་འཛིན་ནན་མོ་བྱེད་མུས་ཡིན་འདུག ཨ་རིའི་ལྡོག་ཕྱོགས་སུ་ལངས་པའི་དམར་ཕྱོགས་ཀྱི་དམག་དཔུང་། ཟླ་འདིའི་ཕྱི་ཚེས་ ༡༩ དང་ ༢༠  ཉིན་གྲངས་གཉིས་རིང་། རྒྱ་ནག་གི་རྒྱལ་ས་པེ་ཅིན་གྱི་མི་དམངས་ཚོགས་ཁང་ཆེན་མོ་ཟེར་བའི་ནང་དུ། ཞི་ཅིན་ཕིན་དང་ཨུ་རུ་སུའི་མགོ་འཁྲིད་པུ་ཊིན་གཉིས་ཐུག་འཕྲད་བྱས་ཡོད་ཅིང་། ཐེངས་འདིའི་ཐུག་འཕྲད་སྐབས་རྒྱལ་ཁབ་གཉིས་བར་གྱི་རླངས་རྫས་ཉོ་ཚོང་གི་གན་རྒྱ་མུ་མཐུད་གནས་རྒྱུ་དང་། ཡུ་ཁེ་རིན་དང་ཨི་རན། ཨ་རི་སོགས་ཀྱི་སྐོར་ལ་གླེང་སློང་བྱས་ཡོད་ལ། ཟླ་འདིའི་ཕྱི་ཚེས་ ༢༤ ནས་ ༢༨ བར་ཞི་ཅིན་ཕིན་གྱིས་ཡུ་རོབ་ཀྱི་སར་བྷི་ཡ་རྒྱལ་ཁབ་ཀྱི་མགོ་ཁྲིད་ཨ་ལེག་སན་དྷར་(Aleksandar Vucic) གྱི་རྒྱ་ནག་གི་གཞུང་འབྲེལ་ཕྱོགས་སྐྱོད་དང་བསྟུན་ནས་ཐུག་འཕྲད་བྱ་འཆར་ཡོད་སྟབས། གློ་བུར་ལྟ་བུའི་ཀོ་རི་ཡར་འགྲོ་བའི་ལས་རིམ་དེའི་ཐད་ལ་འཛམ་གླིང་གི་ཆེད་མཁས་པ་ཁག་ཅིག་གིས་དབྱེ་ཞིབ་སྣ་ཚོགས་བྱེད་ཀྱི་ཡོད་ཀྱང་། རྒྱ་ནག་གཞུང་གིས་འདས་ལོ་ནས་སྲིད་འཛིན་ཊོམ་ཕུ་མཆོག་གིས་སྲིད་འཛིན་ལས་ཁུར་བཞེས་རྗེས།...

མདོ་ཁམས་ཆུ་བཞི་སྒང་དྲུག་དང་ཧི་མ་ལ་ཡ་ནང་པའི་ཪིག་གཞུང་མཐུན་ཚོགས་ཀྱིས་༧གོང་ས་མཆོག་ལ་གཟེངས་རྟགས་ཕུལ་ཏེ་བཀྲིན་རྗེས་དྲན་ཞུས་པ། དོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་ཧི་མ་ལ་ཡ་ནང་པའི་རིག་གཞུང་མཐུན་ཚོགས་ཐུན་མོང་གིས་ཕྱི་ལོ་ ༢༠༢༦ ཟླ་ ༥ ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་མི་ཤིགས་རྡོ་རྗེའི་ཁམས་སུ་བརྟན་ཆེད་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་པ་དང་སྦྲགས། འདི་ལོར་༧སྐུའི་གོ་སྟོན་དང་བསྟུན་བཀའ་དྲིན་རྗེས་དྲན་གྱི་ཚུལ་དུ། ཆུ་བཞི་སྒང་དྲུག་གཞིས་བྱེས་གཉིས་ཀྱིས་ཚབ་ཞུས་ཏེ་༧གོང་ས་༧སྐྱབས་མགོན་ཆེན་པོ་མཆོག་ལ་རིགས་གསུམ་པདྨའི་རང་མདངས་ཞེས་པ་དང་། ཧི་མ་ལ་ཡའི་དད་ལྡན་པ་རྣམས་ཀྱིས་བྱམས་བརྩེའི་གཟེངས་རྟགས་ཞེས་པ་ཞིག་འབུལ་བཞེས་མཛད་སོང་།ཧི་མ་ལ་ཡའི་ཚོས་ཚོགས་ཐུན་མོང་གི...

དེ་རིང་ཕྱི་ལོ་ ༢༠༢༦ ཕྱི་ཟླ་ ༥ ཚེས་ ༢༠ ཉིན་ལ་དྭགས་ཁྲིག་སེ་དགོན་པའི་ཤེས་རབ་སྐྱེད་ཚལ་གླིང་༸རྒྱལ་བའི་ཕོ་བྲང་དུ་༸སྐྱབས་རྗེ་ཁྲིག་སེ་རིན་པོ་ཆེ་ངག་དབང་འཇམ་དབྱངས་བྱམས་པ་བསྟན་འཛིན་མཆོག་དགུང་གྲངས་ ༨༤ ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཞུས་གནང་ཡོད་པ་དང་། རིན་པོ་ཆེ་མཆོག་གིས་ཐེངས་འདིའི་དུས་ཚིགས་འདི་དང་བསྟུན་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་༸སྐུའི་ཚ་བོ་བསྟན་འཛིན་སྟག་ལྷ་མཆོག་ལ། ལོ་ངོ་སུམ་ཅུ་ལྷག་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཞབས་ཞུ་ལྷོད་མེད་དང་། བཙན་བྱོལ་བོད་མིའི་སྤྱི་ཚོགས། རྒྱ་ཆེ་ས་ནས་ཧི་མ་ལ་ཡའི་རི་རྒྱུད་བཅས་ལ་ཞབས་ཞུ་གནང་བའི་ངོས་འཛིན་དྲན་རྟེན་དུ་ཆེ་བསྟོད་གཟེངས་རྟགས་ཤིག་འབུལ་བཞེས་གནང་འདུག དེ་ཡང་དེ་རིང་ཕྱི་ལོ་ ༢༠༢༦ ཟླ་ ༥ ཚེས་ ༢༠ ཉིན་༸སྐྱབས་རྗེ་ཁྲིག་སེ་རིན་པོ་ཆེ་སྐུ་ཕྲེང་དགུ་པ་དགུང་ལོ་ ༨༤ ཕེབས་པའི་འཁྲུངས་སྐར་གྱི་མཛད་སྒོའི་ཐོག་སྐུ་མགྲོན་གྱི་གཙོ་བོ་ལ་དྭགས་གཙོ་གཞུང་མངའ་སྡེའི་སྤྱི་ཁྱབ་དྲུང་ཆེ། Ashish Kundra ཆེད་ཕེབས་ཐོག དགའ་ལྡན་ཕོ་བྲང་གི་དྲུང་ཆེ་སྟག་ལྷ་བསྟན་འཛིན་རྣམ་དག་མཆོག་གི་སྐུ་ཟླ་ཚེ་རིང་སྒྲོལ་དཀར་ལགས་ཀྱིས་སྐྱབས་རྗེ་ཁྲིག་སེ་རིན་པོ་ཆེ་མཆོག་གིས་དྲུང་ནས་བསྔགས་བརྗོད་ཕྱག་འཁྱེར་དང་ཆེ་བསྟོད་གཟེངས་རྟགས་དེ་བཞེས་གནང་འདུག སྤྱིར་སྐྱབས་རྗེ་ཁྲིག་སེ་རིན་པོ་ཆེ་མཆོག་གིས་ཆེ་བསྟོད་གཟེངས་རྟགས་དེ་ཉིད་ཐོག་མར་ཕྱི་ལོ་ ༢༠༡༦ ལོ་ནས་དབུ་འཛུགས་མཛད་པ་ཞིག་ཡིན་པ་དང་། གཟེངས་རྟགས་ཐོག་མར་དེ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་ཡོད་པ་རེད། ད་ཆ་སྐུ་ཞབས་བསྟན་འཛིན་སྟག་ལྷ་མཆོག་ནི་གཟེངས་རྟགས་དེ་བཞེས་མཁན་གང་ཟག་གཉིས་པ་དེ་ཡིན་པ་དང་དེའང་ཁོང་གིས་འདས་པའི་མི་ལོ་ ༣༠ ལྷག་ཙམ་གྱི་རིང་༸གོང་ས་མཆོག་དབུས་པའི་བཙན་བྱོལ་བོད་མིའི་སྤྱི་ཚོགསམ་ལ་ཡའི་རི་རྒྱུད་བཅས་ལ་སྲི་ཞུ་རླབས་ཆེན་བསྒྲུབས་པར་ཆེ་བསྟོད་སླད་འབུལ་བཞེས་གནང་བ་ཞིག་རེད་འདུག གཟེངས་རྟགས་དེའི་སྐོར་འདི་གའི་གསར་འགོད་པས་ཁྲིག་སེ་དགོན་པའི་དགེ་བཤེས་ལྷ་རམས་པ་འཇམ་དབྱངས་བཀྲ་ཤིས་ལགས་སུ་བཀའ་འདྲི་ཞུས་ཡོད། སྟག་ལྷ་བསྟན་འཛིན་རྣམ་དག་མཆོག་ནི་ཕྱི་ལོ་ ༡༩༦༥ ལོར་རྒྱ་གར་ལྷོ་ཕྱོགས་ཀྱི་གྲོང་ཁྱེར་ Calcutta རུ་༸སྐུའི་གཅེན་པོ་ཡབ་བློ་བཟང་བསམ་གཏན་དང་ཡུམ་རྣམ་རྒྱལ་ལྷ་མོ་གཉིས་ཀྱི་སྲས་སུ་འཁྲུངས་པ་དང་།...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མདོ་ཁམས་ཆུ་བཞི་སྒང་དྲུག་དབུས་རྒྱུན་དང་ཧི་མ་ལ་ཡའི་ནང་པའི་རིག་གཞུང་མཐུན་ཚོགས་ནས་ཇི་ལྟར་གསོལ་བ་བཏབ་པ་ལྟར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་། དེ་ཡང་དེ་རིང་ཕྱི་ཟླ་ ༥ ཚེས་ ༢༠ བོད་ཟླ་ ༤ ས་ག་ཟླ་བའི་ཚེས་ ༤ རེས་གཟའ་ལྷག་པ་༸རྒྱལ་བའི་སྐུའི་བླ་གཟའ་དང་བསྟུན། རྡོ་རྗེ་སློབ་དཔོན་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས་དབུས་པའི་དགའ་ལྡན་ཤར་བྱང་མཁན་རིན་པོ་ཆེ། མཁན་ཟུར། རྣམ་གྲྭ་མཁན་སློབ། བོད་མིའི་སྒྲིག་འཛུགས་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་སྤྱི་འཐུས་ཁག་གཅིག དགེ་བཤེས་དང་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་གཙོས་པའི་ཚོགས་མི་རྣམ་པ། དེ་བཞིན་དད་ལྡན་སེར་སྐྱ་མང་ཚོགས་སྟོང་ཕྲག་བརྒལ་བ་ལྷན་ཞུགས་ཐོག་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གནང་སོང་། བརྟན་བཞུགས་སྐབས་ཚོགས་པ་གཉིས་ནས་གཟེངས་རྟགས་ཕུལ་ཡོད་པ་དང་། མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་ཐུན་མོང་གི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་པོར་ཆོས་སྲིད་གཉིས་ཀྱི་མཛད་པ་བསྐྱངས་པའི་བཀའ་དྲིན་གཏང་རག་མཚོན་ཆེད་རིགས་གསུམ་པདྨའི་རང་མདངས་ཀྱི་གཟེངས་རྟགས་འབུལ་བཞེས་མཛད་ཡོད་པ་དང་ཕྱོགས་མཚུངས། ཧི་མ་ལ་ཡའི་ནང་པའི་མཐུན་ཚོགས་ཀྱི་ངོས་ནས་བཀའ་དྲིན་རྗེས་དྲན་གྱི་བྱམས་བརྩེའི་གཟེངས་རྟགས་འབུལ་བཞེས་གནང་སོང་། ལྷག་པར་དེ་རིང་གི་བརྟན་བཞུགས་དང་འབྲེལ་ནས་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་ནས་༸རྒྱལ་བའི་སྐུ་ཕྱྭའི་ཞབས་རིམ་དུ། ༸རྒྱལ་བའི་ཞབས་བརྟན་དང་མ་ཎི། འོད་མཚན། སི་དྷི། སྐྱབས་འགྲོ། དམིགས་བརྩེ་མ་སོགས་དུང་ཕྱུར་ ༥༠ ལྷག་སྨིན་བསྒྲུབས་ཞུས་ཡོད་པ་དང་། ཤིང་སྣ་ ༡༡༣ འདེབས་འཛུགས། སྲོག་བསླུ། སྦྱིན་གཏོང་སོགས་ཀྱི་མཚོན་པའི་ལོ་འཁོར་མོ་བོད་མིའི་སྒྲིག་འཛུགས་ཀྱི་བྱམས་བརྩེའི་ལོ་སྲུང་བརྩི་ཞུས་ཡོད་པ་རེད་འདུག རྩ་བའི་དེ་རིང་བརྟན་བཞུགས་འགོ་འཛུགས་མ་ཞུས་གོང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་ནས་རྣམ་གྲྭ་སྤྱན་རྒྱ་སྤོས་འཛིན་དང་། བརྟན་བཞུགས་གོ་སྒྲིག་ཚོགས་ཆུང་ཚོགས་པ་གཉིས་ཀྱི་སྐུ་ཚབ་བཅས་ནས་སྤོས་སྣེ་སྤྱན་འདྲེན་གཟབ་རྒྱས་ཞུས་པའི་ཐོག་མགོན་པོ་༸གང་ཉིད་མཆོག་ཐེག་ཆེན་ཆོས་གླིང་གཙུག་ལག་ཁང་དུ་གདན་འདྲེན་ཞུས་གྲུབ་མཚམས་བརྟན་བཞུགས་དངོས་གཞི་དབུ་འཛུགས་ཀྱིས་མཎྜལ་རྟེན་གསུམ་འདེགས་འབུལ་དང་སྐུ་གསུང་ཐུགས་རྟེན་རིམ་པས་ཕུལ་ཏེ། སྦྱིན་བདག་རྣམས་ལ་མཇལ་ཁ་སྩལ་ཡོད་པ་རེད། འདི་ག་རླུང་འཕྲིན་ཁང་ནས་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་ཀྱི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་པདྨ་གྲུབ་དབང་ལགས་དང་། ཧི་མ་ལ་ཡའི་ནང་པའི་མཐུན་ཚོགས་ཀྱི་ཚོགས་གཙོ་དགེ་བཤེས་ཆོས་འཕེལ་བཟོད་པ་རྣམ་གཉིས་ལ་བཀའ་འདྲི་ཞུས་སྐབས། དེ་རིང་གི་བརྟན་བཞུགས་དེ་ཧ་ཅང་ཡག་པོ་བྱུང་སོང་བ་དང་། མགོན་པོ་༸གང་ཉིད་མཆོག་གི་མཛད་པ་ལ་བཀའ་དྲིན་མཚོན་ཆེད་ཀྱི་ཆ་ཤས་སུ་གཟེངས་རྟགས་ཕུལ་རྒྱུ་བྱུང་བས་དགའ་ཚོར་ཆེན་པོ་བྱུང་བ་མ་ཟད།...

དགའ་ལྡན་ཕོ་བྲང་གི་དྲུང་ཆེ་དང་༸སྐུའི་ཚ་བོ་བསྟན་འཛིན་སྟག་ལྷ་ལགས་ཀྱིས་འདས་པའི་ལོ་ངོ་ ༣༠ ལྷག་གི་རིང་སངས་རྒྱས་ཀྱི་བསྟན་པ་དང་བོད་དང་ཧི་མ་ལ་ཡའི་སྤྱི་ཚོགས་ལ་ལེགས་སྐྱེས་ཕུལ་བའི་ངོས་འཛིན་དུ་ཁྲིག་རྩེ་གཟེངས་རྟགས་ཕུལ་འདུག The post སྐུ་སྒེར་དྲུང་ཆེ་བསྟན་འཛིན་སྟག་ལྷ་ལགས་སུ་ཁྲིག་རྩེ་གཟེངས་རྟགས་ཕུལ། appeared first on བོད་ཀྱི་དུས་བབ།.

རྒྱ་ནག་གཞུང་གི་གཉེར་བའི་ DeepZang AI འམ་གཏེར་ཚང་མིས་བཟོས་རིག་ནུས་ཀྱིས་བོད་ནང་གི་བོད་མི་ཚོས་བསམ་བློ་བསྒྱུར་བཅོས་བྱེད་ཐབས་བྱེད་བཞིན་པ་དང་བོད་དོན་དང་འབྲེལ་བའི་ཚོར་བ་རྣོ་བའི་གནད་དོན་ཁག་འཁྱོག་བཤད་བྱེད་བཞིན་པ་ཐེར་འདོན་གནང་འདུག དེ་ཡང་ཁ་སང་ ThePrint གསར་ཁང་གི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་བོད་ནང་ DeepZang AI འམ་གཏེར་ཚང་མིས་བཟོས་རིག་ནུས་བརྒྱུད་བོད་ནང་ཆོས་དང་རིག་གཞུང་། དེ་བཞིན་ཆབ་སྲིད་བཅས་ཀྱི་ཐོག་ཤུགས་རྐྱེན་སྤྲོད་ཐབས་དང་སྟངས་འཛིན་བྱེད་ཐབས་བྱེད་ཀྱི་ཡོད་པ་མ་ཟད། མིས་བཟོས་རིག་ནུས་དེ་བཞིན་བོད་མི་ཁོ་ནར་དམིགས་ཏེ་བོད་ནང་གནས་ཚུལ་ལོག་པ་སྤེལ་ཐབས་བྱེད་ཀྱི་ཡོད་པ་མངོན་གསལ་གནང་འདུག གནས་ཚུལ་ལ་གཞིགས་ན་རྩ་བའི་རྒྱ་ནག་གཞུང་གིས་ད་བར་མིས་བཟོས་རིག་ནུས་སྣ་མང་བཟོས་ཡོད་ཀྱང་། DeepZang འམ་གཏེར་ཚང་མིས་བཟོས་རིག་ནུས་དེ་བཞིན་སྐད་ཡིག་དང་འབྲེལ་བ་ཡོད་པ་ཙམ་མ་ཡིན་པར། དེ་ལས་ལྷག་པ་དམིགས་པ་ཞིག་ཡིན་པར་འགྲེལ་བརྗོད་གནང་འདུག་པ་མ་ཟད། བོད་ནང་གི་བོད་མི་ཚོར་གནས་ཚུལ་དང་སྐད་ཆ་ལོག་བཤད་བྱེད་པའི་བརྒྱུད་ཤུགས་རྐྱེན་སྤྲོད་ཐབས་བྱེད་ཀྱི་ཡོད་པ་དང་། བོད་མི་ཚོར་གནས་ཚུལ་སྟངས་འཛིན་བརྒྱུད་དབང་དུ་བསྒྱུར་ཐབས་ཀྱི་ཐབས་ཇུས་ཆེན་པོ་ཞིག་ཡིན་པ་འགྲེལ་བརྗོད་གནང་འདུག མ་ཟད་གཏེར་ཚང་མིས་བཟོས་རིག་ནུས་དེ་བཞིན་བོད་ཀྱི་སྐད་ཡིག་བེད་སྤྱོད་བྱེད་པའི་བརྒྱུད་གནས་ཚུལ་ཤེས་ཐབས་ཀྱི་རིག་ནུས་ཤིག་ཡིན་པར་སྟོན་ཐབས་བྱེད་ཀྱི་ཡོད་ཀྱང་། དོན་དངོས་ལ་བོད་མི་ནང་བསམ་བློ་དང་ལྟ་བ་ངེས་ཅན་ཞིག་གི་ཐོག་ནས་གནས་ཚུལ་སྤེལ་ཐབས་དང་མི་མང་གི་བསམ་བློ་བསྒྱུར་ཐབས་བྱེད་ཀྱི་ཡོད་པ་འགྲེལ་བརྗོད་དང་སྦྲགས། གཏེར་ཚང་མིས་བཟོས་རིག་ནུས་དེ་བཞིན་དམིགས་ཡུལ་གཙོ་བོ་གསུམ་གྱི་ཐོག་ནས་ལས་ཀ་བྱེད་ཀྱི་ཡོད་པ་དང་། དེ་ཡང་དང་པོ་བོད་ཀྱི་སྐད་ཡིག་བརྒྱུད་ནས་མི་མང་ཁྲོད་གནས་ཚུལ་སྤེལ་ཐབས་བྱེད་པ་དང་། གཉིས་པ་རྒྱ་ནག་གཞུང་གི་ལྟ་བ་དང་བོད་དང་འབྲེལ་བའི་ཚོར་བ་རྣོ་བའི་གནས་ཚུལ་ཁག་ལ་འགྲེལ་ལོག་བྱས་པའི་བརྒྱུད་རྒྱ་ནག་གཞུང་གིས་ལངས་ཕྱོགས་སྤེལ་ཐབས་བྱེད་པ། གསུམ་པ་དེ་བཞིན་བོད་ནང་རྒྱ་ནག་གཞུང་གིས་གཏན་འབེབས་བྱས་པའི་བོད་དང་འབྲེལ་བའི་ཐ་སྙད་ Xizang ལྟ་བུ་བོད་མི་རྣམས་ཀྱི་ཉིན་རེའི་འཚོ་བའི་ནང་བེད་སྤྱོད་བྱེད་ཐུབ་པ་དང་འཇུག་ཐུབ་པར་བཟོ་ཐབས་བྱེད་བཞིན་པ་དེ་ཡིན་པ་འགྲེལ་བརྗོད་གནང་འདུག དེ་བཞིན་མི་བཟོས་རིག་ནུས་དེའི་བརྒྱུད་ནས་སེམས་ཁྲལ་བྱེད་དགོས་པའི་གནས་ཚུལ་གཞན་ཞིག་ནི་གཏེར་ཚང་མིས་བཟོས་རིག་ནུས་ཀྱིས་ཚོར་བ་རྣོ་བའི་གནས་ཚུལ་དང་བརྗོད་གཞི་ཁག་མི་མང་རྣམས་ལ་བཀག་འགོག་མ་བྱེད་པར་རྒྱ་ནག་གཞུང་གི་ལྟ་བ་མཚོན་ཐུབ་པའི་བསམ་བློ་སྟོན་ཐབས་བྱེད་ཀྱི་ཡོད་པ་དང་འབྲེལ། གཏེར་ཚང་མིས་བཟོས་རིག་ནུས་བེད་སྤྱོད་བྱེད་མཁན་རྣམས་ལ་གནས་ཚུལ་ལོག་པར་བསྟན་པ་ཙམ་མ་ཡིན་པར་རྒྱ་ནག་གཞུང་གི་ཆོག་མཆན་ཡོད་པའི་གནས་ཚུལ་སྟོན་ཐབས་བྱེད་ཀྱི་ཡོད་པ་འགྲེལ་བརྗོད་གནང་འདུག མ་ཟད་ད་བར་རྒྱ་ནག་གཞུང་གིས་འཛིན་སྐྱོང་དང་ལྟ་སྲུང་། དེ་བཞིན་སྲིད་བྱུས་འདྲ་མིན་བརྒྱུད་བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་དང་བཅོས་བསྒྱུར་བྱེད་ཐབས་བྱེད་ཀྱི་ཡོད་པའི་ཁྲོད། ད་ཆ་ DeepZang ལྟ་བུ་མིས་བཟོས་རིག་ནུས་བརྒྱུད་ནས་བོད་ནང་དམ་དྲག་དང་སྟངས་འཛིན་བྱེད་ཐབས་ཀྱི་ལམ་ཁ་དེ་ནི་གསར་པ་ཞིག་ཡིན་པ་འགྲེལ་བརྗོད་གནང་འདུག གནད་དོན་དེ་འབྲེལ་འདི་ག་རླུང་འཕྲིན་ཁང་གིས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་དགྲ་ལྷ་ལགས་སུ་བཀའ་འདྲི་ཞུས་པར་ཁོང་གིས།  བོད་ནང་གི་གཞོན་སྐྱེས་ཚོར་གཏེར་ཚང་བཅོས་མའི་རིག་ནུས་གང་མང་གི་བེད་སྤྱོད་བཏང་ཚེ། བོད་ཀྱི་ཆོས་དང་རིག་གཞུང་སོགས་ལ་གྱོང་གུན་ཆེན་པོ་ཞིག་ཆགས་ཀྱི་ཡོད་པ་མ་ཟད། མ་འོངས་པར་བོད་མི་གཞོན་སྐྱེས་རྣམས་འཚར་ལོངས་བྱུང་བའི་སྐབས་བཅོས་མའི་རིག་ནུས་དེའི་བརྒྱུད་ནས་འཁྱོག་བཤད་དང་འགྲེལ་ལོག་བྱས་པ་སོགས་ཀྱིས་ཤུགས་རྐྱེན་ངན་པ་ཐེབས་ངེས་ཡིན་པ་སོགས་གསུངས་སོང་།...

The post Public Reactions to the Election Results | Real Opinions & Views appeared first on བོད་ཀྱི་དུས་བབ།.

༄༅། །ཕྱི་ལོ་ ༢༠༢༦ ཟླ་བ་ ༥ ཚེས་ ༢༠ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ནས་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༡༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྷ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བསྐྱངས་ཤིང་། ཕོ་བྲང་རྒྱ་སྒོ་རུ་རྣམ་གྲྭའི་སྤྱན་རྒྱ་སྤོས་འཛིན་དང་། ཧི་མ་ལ་ཡའི་ནང་ཚོགས་ཀྱི་འཐུས་ཚབ་སྒོ་མང་མཁན་ཟུར་བློ་བཟང་རྒྱལ་མཚན་ལགས་དང་རྒྱུད་སྟོད་མཁན་ཟུར་བློ་བཟང་མཁས་གྲུབ་ལགས། མདོ་ཁམས་ཆུ་སྒང་གི་ཚོགས་གཙོ་དགེ་བཤེས་བློ་བཟང་སྙན་གྲགས་ལགས། མདོ་ཁམས་ཆུ་སྒང་གི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་པདྨ་གྲུབ་དབང་ལགས་བཅས་ཀྱིས་སྤོས་སྣེས་དང་བཅས་གདན་ཞུ་དང་། ཚོགས་ཁག་གཉིས་ཀྱི་ཁོངས་མི་རྣམས་ནས་རང་རང་གི་ཡུལ་སྲོལ་གཟབ་མཆོར་ལེགས་པར་སྤྲས་ཏེ་ཕེབས་བསུ་དང་བཅས་ཐུབ་དབང་ལྷ་ཁང་དུ་བཞུགས་ཁྲིར་༸ཞབས་སོར་འཁོད།ཐོག་མར་བརྟན་བཞུགས་ཀྱི་དབུ་བཞུགས་རྡོ་རྗེ་སློབ་དཔོན་ཀུན་བདེ་གླིང་རིན་པོ་ཆེས་མཇལ་དར་རྐྱང་འབུལ་དང་འབྲེལ་ཚོགས་མང་ནས་༸རྒྱལ་བའི་འཁྲུངས་རབས་གསོལ་འདེབས་སོགས་ཞལ་འདོན་དབུ་འཛུགས་གནང་ཞིང་། བརྟན་བཞུགས་དངོས་གཞིར་བླ་མ་ལྷར་བསྐྱེད། མཆོད་བསྟོད་ཚེ་འགུགས་བཟླས་པ་ཡན་སོང་མཚམས་ཙ་རུའི་ཚོགས་འཁོར་འབུལ་བཞེས་དང་། ཀུན་བདེ་གླིང་རྟག་ཚག་རྗེ་དྲུང་སྤྲུལ་པའི་སྐུ་རིན་པོ་ཆེས་གསོལ་འདེབས་མཎྜལ་འདེགས་འབུལ་དང་ཚོགས་ཁག་གཉིས་ཀྱི་འཐུས་ཚབ་ནས་ཚོམ་བུ་ཟུར་འདེགས་ཞུས་ཤིང་། རྡོར་སློབ་མཆོག་གིས་སྐུ་གསུང་ཐུགས་རྟེན་དང་ཚེ་བུམ། རིགས་ལྔའི་མཚན་མ། ཚེ་ཆང་། ཚེ་རིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་དང་རྫས་བརྒྱད་བཅས་བཤད་པ་དང་སྦྲགས་རིམ་པར་འབུལ་ལམ་ཞུས་པ་དང་། བརྟན་བཞུགས་སྦྱིན་བདག་འཐུས་མི་ ༢༢ ཙམ་ནས་མཇལ་ཁ་ཞུས།མཐར་གཏང་རག་མཎྜལ་འབུལ་སྐབས་བརྟན་བཞུགས་སྦྱིན་བདག་མདོ་ཁམས་ཆུ་སྒང་གི་ཚོགས་གཙོ་དགེ་བཤེས་བློ་བཟང་སྙན་གྲགས་ལགས་ཀྱིས་མཎྜལ་ཚོམ་བུ་འདེགས་འབུལ་དང་། དགའ་ལྡན་ཤར་བྱང་གི་མཁན་རིན་པོ་ཆེ་རྣམ་གཉིས་དང་སྒོ་མང་མཁན་ཟུར་བློ་བཟང་རྒྱལ་མཚན་ལགས་བཅས་ནས་སྐུ་གསུང་ཐུགས་གསུམ་གྱི་རྟེན་རིམ་པར་ཕུལ་བ་སོགས་བརྟན་བཞུགས་ཀྱི་གནང་སྒོ་རིམ་པར་ཕེབས་ཤིང་། ཉི་གཞོན་འཆར་ཀ་མ་དང་རིས་མེད་བསྟན་རྒྱས་སྨོན་ལམ་སོགས་གསུང་འདོན་གྲུབ་མཚམས་ཚོགས་ཁག་གཉིས་ཀྱི་ཚོགས་གཙོ་དང་འཐུས་ཚབ་ནས་སྤོས་སྣེ་སྤྱན་རྒྱ་དང་བཅས་མགོན་པོ་མཆོག་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་དང་། བརྟན་བཞུགས་འདིར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་དཔལ་ལྡན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་ཁྲིམས་ཞིབ་པ་གཞན་ཟླ་བ་ཕུན་སྐྱིད་མཆོག དཔལ་ལྡན་ཁྲིམས་ཞིབ་པ་གཞན་འཕགས་པ་ཚེ་རིང་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག  ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ལྷན་བཞུགས་གནང་ཡོད་པར་མ་ཟད།...

རྒྱ་གཞུང་གིས་ཉེ་བའི་ལོ་ཤས་ནང་རྒྱལ་མཚམས་ལས་བརྒལ་ཏེ་རང་དང་ལྟ་སྤྱོད་མི་མཐུན་མཁན་གྱི་རྒྱལ་སྤྱིའི་གསར་འགོད་པ་དང་། ཤེས་ཡོན་མི་སྣ། ལས་འགུལ་བ་སོགས་ཀྱི་ཐོག་གསང་མྱུལ་དོགས་སྲུང་གི་ལས་གཞི་ཞིག་སྤེལ་བཞིན་ཡོད་པ་མ་ཟད།  ལྷོ་ཤར་ཨེ་ཤི་ཡའི་ཁུལ་དུ་མགོ་སྐོར་བསླུ་བྲིད་ཀྱི་ལྟེ་གནས་འཛུགས་སྐྲུན་བརྒྱུད་ལོ་རེར་ཨ་རིའི་མི་མང་ནས་ཉུང་མཐར་ཨ་སྒོར་ཐེར་འབུམ་བཅུ་ལྷག་རྐུ་འཁྱེར་བྱེད་ཀྱིན་ཡོད་པ་ཐེར་འདོན་གནང་འདུག དེ་ཡང་ཁ་སང་ཕྱི་ཚེས་ ༡༩ ཉིན་དབྱིན་ཡུལ་ནང་གི་ The Telegraph  གསར་ཤོག་གིས་འདོན་སྤེལ་གནང་བའི་གནས་ཚུལ་ནང་གསལ་ལྟར་ན།   རྒྱ་གཞུང་གིས་ཉེ་བའི་ལོ་ཤས་ནས་བཟུང་ Dynamic Control Platform ཞེས་མིས་བཟོས་རིག་ནུས་ཀྱི་ཁྱད་ཆོས་ལྡན་པའི་དྲྭ་ཐོག་གསང་མྱུལ་དོགས་སྲུང་གི་བྱ་ར་ཞིག་གི་བརྒྱུད་རང་དང་ལྟ་སྤྱོད་མི་མཐུན་པའི་རྒྱ་ནག་ཐོག་ཞིབ་འཇུག་བྱེད་མཁན་གྱི་རྒྱལ་སྤྱིའི་གསར་འགོད་པ་དང་། འགྲོ་བ་མིའི་ཐོབ་ཐང་ཐོག་སྙན་ཐོ་འདོན་སྤེལ་གནང་མཁན་གྱི་ཤེས་ཡོན་མི་སྣ།  དེ་བཞིན་ཆབ་སྲིད་གནད་དོན་དང་འབྲེལ་བའི་རྒྱ་ནག་ཐེར་འདོན་གནང་མཁན་གྱི་ལས་འགུལ་བ་སོགས་དམིགས་དབེན་དུ་བཟུང་ནས་ཁོང་རྣམས་ཀྱི་འགྲོ་སྡོད་སྤྱོད་གསུམ་ལ་རྒྱལ་མཚམས་ལས་བརྒལ་ཏེ་ལྟ་སྲུང་ནན་པོ་བྱེད་བཞིན་ཡོད་པ་མངོན་གསལ་བྱུང་འདུག་པ་མ་ཟད།  དྲྭ་ཐོག་གསལ་མྱུལ་གྱི་བྱ་ར་དེས་དམིགས་དབེན་བཟུང་ས་ཁོངས་སུ་ The Telegraph  གསར་ཤོག་གི་གསར་འགོད་པ་རྒན་པ་ Sophia Yan ལགས་ཀྱང་ཚུད་ཡོད་པ་རེད་འདུག  གནས་ཚུལ་ནང་གསལ་ཐེངས་འདིའི་རྒྱ་གཞུང་གི་དྲྭ་ཐོག་ངན་བྱུས་སྐོར་གྱི་གནས་ཚུལ་དེ་ཉིད་ཐོག་མར་ NetAskari ཞེས་རྒྱ་ནག་ལ་དམིགས་པའི་དྲྭ་རྒྱའི་བདེ་འཇགས་སྐོར་རང་དབང་ཅན་གྱི་ཞིབ་འཇུག་གནང་མཁན་རུ་ཁག་གིས་ཤེས་རྟོགས་བྱུང་བ་དང་དེའི་རྗེས་ The Telegraph གསར་ཤོག་གིས་དབྱེ་ཞིབ་དང་བརྒྱུད་སྐུལ་གནང་བ་ཞིག་རེད་འདུག  དྲྭ་ཐོག་གསལ་མྱུལ་དེས་དམིགས་དབེན་བཟུང་གཙོ་བོ་ཨ་རི་དང་། དབྱིན་ཡུལ། ཁེ་ན་ཌ།  ཨོ་གླིང་། ནིའུ་ཛི་ལེནཌ་རྒྱལ་ཁབ་ཀྱི་མི་སེར་ཚོ་ཡིན་པ་མ་ཟད།  དོགས་སྲུང་གི་བྱ་ར་དེ་ཕལ་ཆེར་ཕྱི་ལོ་ ༢༠༢༡ ནས་བཟུང་འགོ་འཛུགས་བྱས་ཟིན་པ་ཞིག་ཡིན་པ་དེ་ལྟར་ཡང་།  དྲྭ་ཐོག་སྟེགས་བུ་དེ་ཉིད་དངོས་སུ་གཞུང་འབྲེལ་ཐོག་བེད་སྤྱོད་བྱེད་པར་ཡོངས་བསྒྲགས་བྱེད་ཡོད་མེད་དང་ཡང་ན་ད་དུང་ཡར་རྒྱས་གཏོང་རྒྱུ་ལྷག་ཡོད་མེད་ཤེས་ཚོད་ཐིག་གི་མེད་པ་རེད་འདུག  ...

དེ་རིང་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་ལ་མདོ་ཁམས་ཆུ་བཞི་སྒང་དྲུག་དང་ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པ་གཉིས་ཀྱིས་བརྟན་བཞུགས་བསྟར་འབུལ་ཞུས་སོང་། སྐབས་དེ་དུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་དང་། སྲིད་སྐྱོང་སྤེན་པ་ཚེ་རིང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་གཙོས་པའི་སྤྱི་འཐུས་ཁག་ཅིག དེ་བཞིན་སེར་སྐྱ་མི་མང་མང་པོ་ཕེབས་གནང་འདུག The post མདོ་ཁམས་ཆུ་བཞི་སྒང་དྲུག་དང་ཧི་མ་ལ་ཡའི་ནང་པའི་ཆོས་ཚོགས་ཀྱིས་བརྟན་བཞུགས་བསྟར་འབུལ་ཞུས་པ། appeared first on བོད་ཀྱི་བང་ཆེན།.

༸གོང་ས་མཆོག་ལ་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་དང་ཧི་མ་ལ་ཡའི་ནང་པའི་ཆོས་ཚོགས་ཐུན་མོང་ནས་བརྟན་བཞུགས་བསྟར་འབུལ་དང་བཀའ་དྲིན་རྗེས་དྲན་གྱི་གཟེངས་རྟགས་ཕུལ་སོང་། དེ་རིང་ཕྱི་ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་དང་ཧི་མ་ལ་ཡའི་ནང་པའི་ཆོས་ཚོགས་ཐུན་མོང་ནས་སྐུ་ཚེ་མི་གཤེགས་རྡོ་རྗེའི་ཁམས་སུ་བརྟན་པའི་བརྟན་བཞུགས་བསྟར་འབུལ་ཞུས་ཤིང་། མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་ནས་༸མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་དུ་རིགས་གསུམ་པདྨའི་རང་མདངས་གཟེངས་རྟགས་དང་། ཧི་མ་ལ་ཡའི་ནང་པའི་ཆོས་ཚོགས་ནས་བྱམས་བརྩེའི་གཟེངས་རྟགས་ཤིག་འབུལ་ལམ་ཞུས་སོང་། ད་ལན་བརྟན་བཞུགས་བསྟར་འབུལ་སྐབས་མདོ་ཁམས་ཆུ་བཞི་སྒང་དྲུག་ནས་ཨ་རི་དང་། ཁེ་ན་ཌ། ཨོ་གླིང་། ཡུ་རོབ་རྒྱལ་ཁབ་ཁག དྷ་ས་སོགས་ནས་སེར་སྐྱ་མི་མང་ ༦༠༠ ཙམ་དང་། ཧི་མ་ལ་ཡའི་ཆོས་ཚོགས་ནས་རྒྱ་གར་གྱི་མངའ་སྡེ་འབྲས་ལྗོངས་དང་། ལ་དྭགས། ཧི་མ་ཅལ། ཇ་མུ་དང་ཀ་ཤི་མིར་ནང་དཔལ་གྷར་ (Palghar)། ཨུ་ཏ་ར་ཁན་ཌི་ (Uttarakhand)། ནུབ་བྷན་གྷལ་ (West Bengal)། ཨ་རུ་ན་ཅལ་བཅས་མངའ་སྡེ་བདུན་ནས་ཚོགས་བཅར་བ་ ༩༠༠ ཡས་མས་མཉམ་ཞུགས་གནང་འདུག ཧི་མ་ལ་ཡའི་ནང་པའི་ཆོས་ཚོགས་ཀྱི་བྱམས་བརྩེའི་གཟེངས་རྟགས་ཀྱི་མཚོན་དོན་ནི། ༡) འཛམ་གླིང་གླིང་ཆེན་ལྔའི་སྐྱེ་འགྲོ་རྣམས་ལ་མགོན་པོ་གང་གི་ཐུགས་བྱམས་པ་དང་སྙིང་རྗེ། ཡེ་ཤེས་ལྔའི་འཕྲིན་ལས་རྒྱུན་མི་ཆད་པར་འཇུག་པའི་མཚོན་དོན་དུ་རྒྱུ་རིན་ཆེན་དངུལ་ལས་གྲུབ་པའི་གཏེར་ཆེན་གྱི་བུམ་པ་རིན་ཆེན་སྣ་ལྔས་བཀང་ཞིང་བཀྲ་ཤིས་རྟགས་བརྒྱད་ཀྱི་འབུར་རིས་རིན་ཆེན་གསེར་ཚག་ཚར་དུ་དངར་བས་བརྒྱན་པ། ༢) འགྲོ་བ་མིའི་རིགས་ཡོངས་ལ་བྱམས་བརྩེའི་སྤྱོད་པ་དར་དཀར་ཡུག་གཅིག་གིས་ཁྱབ་ཅིང་ཆོས་ལུགས་རིགས་སུ་མ་མཆིས་པ་མཐུན་ལམ་གོང་བུ་གཅིག་ཏུ་བསྒྲིལ་བའི་མཚོན་དོན་དུ། བཀྲ་ཤིས་པའི་ཆོས་དུང་དཀར་པོ་གཡས་སུ་འཁྱིལ་བའི་ཏོག་གིས་བརྒྱན་པ། ༣) བོད་ཀྱི་ཆོས་དང་རིག་གཞུང་། སྐད་དང་ཡི་གེ། བོད་ཀྱི་བདེན་དོན་ཁག་ཡུག་དང་བཅས་པ་རྒྱུན་འཛིན་དང་ཉམས་གསོ་མཛད་པའི་མཚོན་བྱེད་དུ། མདུན་དུ་རང་ཅག་ཁ་བ་རི་པའི་ཐུན་མོང་མ་ཡིན་པའི་བོད་ཀྱི་ཡི་གེའམ་བྷོར་ཊའི་ཡི་གེས་མཚན་བྱང་བཀོད་པ། ༤) རྒྱ་གར་གྱི་གནའ་བོའི་རིག་གཞུང་བསྐྱར་གསོ་དང་འབྲེལ་བྱམས་བརྩེ་ལྡན་པའི་འཛམ་གླིང་ཞིག་འཛུགས་སྐྲུན་གནང་རྒྱུའི་རླབས་ཆེན་དགོངས་གཞི་དང་མཛད་འཕྲིན་རྣམས་མཚོན་ཆེད་དུ། གཡས་སུ་ཧིན་དྷི་དང་གཡོན་དུ་དབྱིན་ཡིག་ཐོག་མཚན་བྱང་བཀོད་འདུག མདོ་ཁམས་ཆུ་བཞི་སྒང་དྲུང་གཞིས་བྱེས་གཉིས་ནས་རིགས་གསུམ་པདྨའི་རང་མདངས་ཞེས་པའི་གཟེངས་རྟགས་ཀྱི་མཚོན་དོན་ནི། རྒྱལ་བ་རིག་གསུམ་མདོན་པོའི་ཕྱག་མཚན་གསེར་དངུལ་བཀྲ་མའི་སེང་གེས་བཏེགས་པ། པདྨས་སྤྱན་རས་གཟིགས་ཀྱི་ཐུགས་རྒྱུད་ཀྱི་བརྩེ་བ་སྙིང་རྗེ་ཆེན་པོ་དང་།...

[དྷ་རམ་སར] ཕྱི་ལོ་༢༠༢༦ ཟླ་༥ ཚེས་༢༠ ཉིན། ལ་དྭགས་ཁྲིག་རྩེ་རིན་པོ་ཆེ་སྐུ་ཕྲེང་དགུ་པ་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་དགུང་གྲངས་༨༤ ལ་ཕེབས་པའི་སྐུའི་འཁྲུངས་སྐར་སྲུང་བརྩི་དང་སྦྲགས། སྐུ་སྒེར་དྲུང་ཆེ་བསྟན་འཛིན་སྟག་ལྷ་ལ་ཁྲིག་རྩེ་གཟེངས་རྟགས་དངོས་སུ་ཕུལ་འདུག The post སྐུ་སྒེར་དྲུང་ཆེ་བསྟན་འཛིན་སྟག་ལྷར་ཁྲིག་རྩེ་གཟེངས་རྟགས་ཕུལ་བ། appeared first on བོད་ཀྱི་བང་ཆེན།.

ཁེ་ན་ཌར་གནས་སྡོད་བོད་མི་འཇིགས་བྲལ་ཀླུ་ལྡིང་ལགས་ཁེ་ན་ཌའི་རྒྱལ་དམག་སློབ་ཆེན་ནས་སློབ་མཐར་ཕྱིན་པ་དང་ཐད་ཀར་རིམ་པ་གཉིས་པའི་དམག་དཔོན་དུ་བསྐོ་གཞག་བྱས་འདུག The post བོད་མི་འཇིགས་བྲལ་ཀླུ་ལྡིང་ལགས་ཁེ་ན་ཌའི་རིམ་པ་གཉིས་པའི་དམག་དཔོན་དུ་བསྐོ་གཞག་བྱས། appeared first on བོད་ཀྱི་དུས་བབ།.

རྒྱ་གར་གྱི་ཚོང་པ་གྲཊ་ཅན་(Ness Wadia) ཡིས་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུས། པན་ཇབ་ཀིང་ཞེས་པའི་ (IPL Cricket) དབྱུག་རྩེད་རུ་ཁག་གི་ཟུང་སྦྲེལ་ཚོང་བདག་དང་རྒྱ་གར་གྱི་ཚོང་པ་གྲགས་ཅན་ནེསི་ཝ་ཌི་ཡ་ (Ness Wadia) ལགས་ཀྱིས་བཞུགས་སྒར་རྒྱལ་བའི་ཕོ་བྲང་དུ་ཆེད་བཅར་གྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཡོད་པ་དང་། མཇལ་ཁ་གྲུབ་མཚམས་ནེསི་ཝ་ཌི་ཡ་ (Ness Wadia) ལགས་ཀྱིས། “ཐེངས་འདིའི་མཇལ་ཁ་ནི་ངོ་མཚར་ཅན་ཞིག་བྱུང་། མཇལ་ཁའི་སྐབས་ངས་དེ་སྔ་ཕྱི་ལོ་ ༢༠༡༠ ལོར་༧གོང་ས་༧སྐྱབས་མགོན་ཆེན་པོ་མཆོག་རྡ་སའི་དབྱུག་རྩེད་འགྲན་བསྡུར་གྱི་ཐང་ཆེན་དུ་ཆིབས་བསྒྱུར་བསྐྱངས་སྐབས། རྩེད་རྭའི་ནང་མཉམ་དུ་སྐོར་བ་བསྐྱོན་རྒྱུའི་གོ་སྐབས་བྱུང་བའི་སྐོར་༧གོང་ས་མཆོག་ལ་བསྐྱར་དྲན་ཞུས་ཡིན་ལ། དེ་རིང་ཡང་མཇལ་ཁ་ཐོབ་བྱུང་བས་ཧ་ཅང་བྱིན་རླབས་ཆེན་པོ་བྱུང་། ༧གོང་ས་༧སྐྱབས་མགོན་ཆེན་པོ་མཆ...

ཨ་རིའི་ཕྱི་སྲིད་ལས་ཁུངས་ཀྱིས་༧ཀུན་གཟིཊ་པཎ་ཆེན་རིན་པོ་ཆེ་གློད་བཀྲོལ་དགོས་པ་དང་། ༧གོང་ས་མཆོག་གིས་དབུས་བོད་ཀྱི་བླ་སྤྲུལ་གྱི་ཡང་སྲིད་གནད་དོན་ཐད་དམར་ཤོག་གཞུང་གིས་ཐེ་བྱུས་མེད་པ་བྱ་དགོས་ཞེས་གསུངས་འདུག དེ་ཡང་ཕྱི་ཟླ་ ༥ ཚེས་ ༡༨ ཉིན་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Thomas Pigott ལགས་ཀྱིས་ཡོངས་ཁྱབ་གསལ་བསྒྲགས་སྤེལ་བའི་ནང་། རྒྱ་ནག་གི་དབང་འཛིན་པས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་རྣམས་འཕྲལ་དུ་གློད་བཀྲོལ་ཐོངས་དགོས་པ་དང་། ཆོས་དད་ཀྱི་དབང་གིས་བོད་པ་དང་ཡང་ན་རྒྱ་ནག་ནང་དུ་མི་གཞན་ལ་གཉའ་གནོན་བྱེད་པ་མཚམས་འཇོག་བྱེད་དགོས་ཞེས་གསུངས་འདུག་ལ། བོད་བརྒྱུད་ནང་བསྟན་གྱི་རྗེས་འཇུག་པ་ཚོར་ཡང་། ཆོས་ལུགས་ཀྱི་ཚོགས་སྡེ་གཞན་ཚང་མ་དང་གཅིག་མཚུངས། ༧གོང་ས་ཏཱ་ལའི་བླ་མ་མཆོག་དང་༧པཎ་ཆེན་རིན་པོ་ཆེ་ལྟ་བུའི་རང་གི་ཆོས་ཕྱོགས་ཀྱི་དབུ་ཁྲིད་རྣམ་པ་རྒྱ་ནག་དམར་ཤོག་གཞུང་གི...

ཡུ་རོབ་མཐུན་ཚོགས་ནས་བལ་ཡུལ་གཞུང་ལ་འབོད་སྐུལ་དང་སྦྲགས། བལ་ཡུལ་གནས་སྡོད་བོད་མི་བཙན་བྱོལ་བ་མང་དག་ཅིག་ལ་ཡིག་ཆ་མེད་པའི་དཀའ་ངལ་དེ་དག་སེལ་དགོས་པ་མ་ཟད། གཞི་རྩའི་འགྲོ་བ་མིའི་ཐོབ་ཐང་དང་རིག་གཞུང་སྲུང་སྐྱོབ་ཀྱི་ཐོབ་ཐང་སྤྲད་དགོས་པ་གསུངས་འདུག དེ་ཡང་ཁ་སང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ཡུ་རོབ་གྲོས་ཚོགས་འཐུས་མི་སྐུ་ཞབས་ཌེ་ལི་ཡ་སི་ཛ་ལི་མ་སི་ Dainius Zalimas ལགས་དང་ཧན་ནསེ་ཧ་ཌི་ Hannes Heide ལགས་རྣམ་གཉིས་ཀྱིས་འདི་ལོའི་ཕྱི་ཟླ་ ༣ པའི་ནང་ཡུ་རོབ་མཐུན་ཚོགས་ཀྱི་ཚོང་དོན་འགན་འཛིན་མ་རོ་སི་ ཤེབ་ཅོ་ཝིཆ་ Maros Sefcovic ལགས་ལ་བལ་ཡུལ་ནང་གི་བོད་མི་བཙན་བྱོལ་བ་རྣམས་ཀྱི་ངེས་གཏན་མེད་པའི་གནས་སྟངས་སྐོར་ཡིག་ཐོག་ནས་འདྲི་རྩད་གནང་བ་ལྟར། ཉེ་ཆར་ཟླ་ ༤ ཚེས་ ༢༩ ཉིན་སྐུ་ཞབས་ Sefcovic མཆོག་གིས་ལས་ཁུངས་ནས་གྲོས་ཚོགས་འཐུས་མི་རྣམ་པ་གཉིས་ལ་དེ་འབྲེལ་ལན་འདེབས་ཕྱག་ཡིག་ཞིག་གནང་འདུག དེའི་ནང་ཡུ་རོབ་མཐུན་ཚོགས་ངོས་ནས་ Refugee Core Group ཞེས་སྐྱབས་བཅོལ་བར་གཟིགས་རྟོག་གནང་མཁན་རྒྱལ་སྤྱིའི་གནའ་འབྲེལ་ཚོགས་པའི་ཚོགས་མིའི་ངོ་བོའི་ཐོག་བལ་ཡུལ་གཞུང་ལ་ཕྱག་བྲིས་ཕུལ་བའི་བརྒྱུད། ཡུལ་དེའི་ནང་གནས་སྡོད་བོད་མིའ་བཙན་བྱོལ་བ་རྣམས་ལ་ཡིག་ཆའི་ཐོག་ནས་དཀའ་ངལ་ཡོད་པར་བརྟེན། བོད་མི་ཚོར་ PAN CARD འམ་གཏན་འཇགས་བྱང་བུ་ཡིག་ཆ་གནང་དགོས་པ་མ་ཟད། དེའི་བརྒྱུད་ནས་བོད་མི་སྤྱི་དང་ལྷག་དོན་གཞོན་སྐྱེས་རྣམས་ལ་དངུལ་ཁང་ཡིག་ཆ་བཟོས་ཐུབ་ཀྱི་ཡོད་པ། དེ་བཞིན་ཉིན་རེའི་འཛིན་སྐྱོང་ལས་དོན་ཁག་ལའང་དགོས་མཁོ་ཆགས་ཀྱི་ཡོད་པ་སྙན་སེང་ཞུས་ཡོད་སྐོར་གསུངས་འདུག མ་ཟད་བལ་ཡུལ་གཞུང་ངོས་ནས་བོད་མིའི་བཙོན་བྱོལ་བ་རྣམས་ལ་སྤྱི་དམངས་ཀྱི་ཐོབ་ཐང་སྤྲོད་དགོས་པ་དང་རིག་གཞུང་གི་ཐོབ་ཐང་སྲུང་སྐྱོབ་བྱེད་དགོས་པ། ལྷག་དོན་བོད་མི་ཚོར་བཀག་སྡོམ་དང་དམ་བསྒྲགས་མེད་པའི་ཐོག་ནས་ཆོས་ཕྱོགས་གི་བྱ་བ་དང་རིག་གཞུང་གི་དུས་སྟོན་གལ་ཆེན་ཁག་སྲུང་བརྩི་ཞུ་ཆོག་པའི་ཐོབ་ཐང་སྤྲོད་དགོས་པའི་འབོད་སྐུལ་ཡང་ཞུས་འདུག ད་དུང་ཡུ་རོབ་མཐུན་ཚོགས་ནས་བལ་ཡུལ་གཞུང་གིས་བོད་མི་བཙོན་བྱོལ་བ་རྣམས་རྒྱལ་ཁབ་གཞན་དུ་གཞིས་སྤོས་བྱེད་ཆོག་པར་ངོས་ལེན་ཐོབ་པའི་བོཙན་བྱོལ་བ་རྣམས་དང་། གཞན་ཡང་སོ་སོའི་ཕ་ཡུལ་དང་རྒྱལ་ཁབ་གསུམ་པར་འགྲོ་འདོད་ཡོད་པ་རྣམས་ལ་བལ་ཡུལ་གཞུང་གི་ངོས་ནས་མཐོང་མཆན་གུ་ཡངས་དང་ཕྱིར་བསྐྱོད་ལག་ཁྱེར་གྱི་མཐུན་རྐྱེན་བསྐྲུན་དགོས་པའི་འབོད་སྐུལ་ཞུས་འདུག...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ Dalai Lama Fellows འམ་༸གོང་ས་མཆོག་གི་དགོངས་བཞེད་ལག་བསྟར་གནང་མཁན་གྱི་རྒྱལ་སྤྱིའི་གཞོན་སྐྱེས་འགོ་ཁྲིད་ཚོར་མཇལ་ཁ་སྩལ་བ་དང་འབྲེལ།  མཐར་ཐུག་སངས་རྒྱས་ཀྱི་གོ་འཕང་གཙོས་པའི་འཛམ་གླིང་ཞི་བདེ་བརྩེ་བ་ལ་ཐུག་ཡོད་པ་དང་།  ད་ལྟའི་རྒྱ་ནག་ནང་དུ་ཆོས་དད་ཤུགས་ཆེ་རུ་འགྲོ་བཞིན་པ་དང་བསྟུན་༸གང་ཉིད་མཆོག་ནས་ཁུལ་དེར་བྱམས་བརྩེ་སྤེལ་ཐུབ་པའི་ཐུགས་རེ་མཛད་ཀྱི་ཡོད་པ་བཀའ་སྩལ་འདུག དེ་ཡང་འདི་ལོའི་ Global Dalai Lama Fellows Assembly ཞེས་༸གོང་ས་མཆོག་གི་དགོངས་བཞེད་ལག་བསྟར་ཐད་རྒྱལ་སྤྱིའི་གཞོན་སྐྱེས་འགོ་ཁྲིད་ཀྱི་ལྷན་འཛོམས་དེ་བཞིན་བཞུགས་སྒར་དུ་རྟེན་གཞི་བྱས་པའི་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དུ་འཚོགས་གཏན་འཁེལ་ཡོད་པ་དང་།  ལྷན་འཛོམས་ཐོག་ཕེབས་པའི་རྒྱལ་ཁབ་ ༢༤ ཡི་གཞོན་སྐྱེས་འགོ་ཁྲིད་ ༥༡ ཚུད་པའི་ལས་བྱེད་སྦྱིན་བདག་བཅས་ཁྱོན་ཚོགས་བཅར་བ་ ༧༡ ཙམ་ནས་ཁ་སང་ཕྱི་ཟླ་ ༥ ཚེས་ ༡༨ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་བཅར་ཞུས་པ་ཡོད་པ་རེད།   སྐབས་དེར་༸མགོན་པོ་མཆོག་གིས་ཚོགས་བཅར་བ་ལྷན་དུ་སྐུ་པར་བསྐྱོན་པ་དང་འབྲེལ།  བརྩེ་བ་ཞེས་པ་དེ་སྤྱིར་བཏང་འདོད་ཆགས་དང་སྦྲེལ་ཡོད་ནའང་མངལ་སྐྱེས་གཅིག་ཡིན་ཕྱིན་ཆད་ལ་དེ་ནི་ཧ་ཅང་གི་གལ་ཆེན་པོ་ཡིན་པ་དང་།  ནང་པ་སངས་རྒྱས་པའི་ལུགས་ལ་རང་བཞིན་ལྷན་སྐྱེས་སུ་ཡོད་པའི་བརྩེ་བ་དེ་ཐབས་སྙིང་རྗེ་ཆེན་པོ་དང་སྟོང་ཉིད་རྟོིགས་པའི་ཤེས་རབ་དེ་བཞིན་ཆོས་རབ་ཏུ་རྣམ་འབྱེད་ཀྱིས་བསམ་བློ་བཏང་སྟེ་གོང་དུ་འཕེལ་བའི་བརྒྱུད་མཐར་སངས་རྒྱས་ཀྱི་ཐུགས་རྗེ་ཆེན་པོ་ཡང་དེ་ལས་སྒྲུབ་ཀྱི་ཡོད་པ་བཀའ་སྩལ་འདུག  ལྷག་པར་དུ་༸གང་ཉིད་མཆོག་གིས།  རྒྱ་གར་དང་བོད་རྒྱ་ནག་བཅས་སུ་བརྩེ་བ་ལ་དང་དོད་ཡོད་པ་དེ་མུ་མཐུད་རྒྱལ་སྤྱིའི་ཁྲོད་སྤེལ་ཐུབ་པར་བསམ་བློ་གཏང་དགོས་གལ་ཡིན་པ་མ་ཟད།  མཐར་ཐུག་སངས་རྒྱས་ཀྱི་གོ་འཕང་གཙོས་པའི་འཛམ་གླིང་ཞི་བདེ་བརྩེ་བ་ལ་ཐུག་ཡོད་པ་དང་།  ད་ལྟའི་རྒྱ་ནག་ནང་ཆོས་དད་ཤུགས་ཆེ་རུ་འགྲོ་བཞིན་པ་དང་བསྟུན་ནས་ཁུལ་དེར་བྱམས་བརྩེ་སྤེལ་ཐུབ་ན་བསམ་པའི་ཐུགས་རེ་མཛད་ཀྱི་ཡོད་པ་བཀའ་སྩལ་འདུག  རྒྱལ་སྤྱིའི་གཞོན་སྐྱེས་འགོ་ཁྲིད་ཀྱི་ལྷན་འཛོམས་ལས་གཞི་དེ་ཉིད་ཐོག་མ་གསར་འཛུགས་སྐབས་ནས་དེའི་ལས་བྱེད་ཁོངས་སུ་ཡིན་པ་༸སྐུའི་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་ཀྱིས་གསར་འགོད་པའི་དྲི་བ་ལན་འདེབས་ཁྲོད།  Dalai Lama Fellows ཞེས་རྒྱལ་སྤྱིའི་ཁྲོད་གཞོན་སྐྱེས་སེམས་ཤུགས་ཅན་དང་འཇོན་ཐང་ཡོད་མཁན་རྣམས་ནས་སྙིང་རྗེའི་ཀུན་སློང་རྩ་བ་དུ་བཞག་སྟེ་སོ་སོའི་ཕྱག་ལས་གནང་སའི་སྡེ་ཚན་ནང་སྐུ་མདུན་གྱི་དགོངས་བཞེས་དང་མཐུན་པའི་གཞན་ཕན་གྱི་ཕྱག་ལས་གནང་གི་ཡོད་པ་ལྟར།  མ་འོངས་པར་ནུབ་ཕྱོགས་ཨ་རི་སོགས་ཀྱི་ནང་ཡོད་པའི་བོད་པའི་གཞོན་སྐྱེས་རྣམས་ནས་ལས་གཞི་འདི་རིགས་ལ་དོ་སྣང་གིས་གོ་སྐབས་དམ་འཛིན་གནང་དགོས་གལ་ཡིན་པ་གསུངས་འདུག  རྩ་བའི་...

བལ་ཡུལ་དུ་ཡོད་པའི་སྐྱབས་བཅོལ་བོད་མི་ཚོར་བལ་ཡུལ་གཞུང་གིས་ངོས་ནས་ཁྲིམས་མཐུན་གྱི་ཡིག་ཆ་གནང་དགོས་པའི་སྐོར་ཡུ་རོབ་མཐུན་ཚོགས་ནས་འབོད་སྐུལ་གནང་ཡོད་འདུག The post བལ་ཡུལ་གཞུང་ལ་བོད་མི་ཚོར་ཁྲིམས་མཐུན་ཡིག་ཆ་སྤྲོད་དགོས་པའི་འབོད་སྐུལ། appeared first on བོད་ཀྱི་བང་ཆེན།.

སྲིད་གཞུང་གི་ཆོག་མཆན་མེད་པར་ཆོས་ལུགས་བྱེད་སྒོར་ཞུགས་མི་ཆོག ཕྱི་ཟླ་ ༥ ཚེས་ ༨ ཉིན་ནས་རྒྱ་ནག་གཞུང་གིས་བོད་ནག་ཆུ་གྲོང་ཁྱེར་གྱི་གྲྭ་བཙུན་རྣམས་ལ་ཀྲུང་ཧཱ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཇེ་དྲག་ཏུ་གཏོང་བ་དང་རྒྱལ་ཁབ་ཀྱི་སྤྱི་སྐད་ཁྱབ་གདལ་དུ་གཏོང་བར་སྐུལ་འདེད་ཟེར་བའི་མིང་ཐོག་ནས་ཆེད་དོན་ཟབ་སྦྱོང་ཟེར་བའི་འཛིན་གྲྭ་ཞིག་འཚོགས་མགོ་བཙུགས་ཡོད་ཅིང་། ཆེད་དོན་འཛིན་གྲྭ་དེའི་ནང་། མི་རིགས་ལས་དོན་ལ་ཤུགས་སྣོན་དང་གཅེས་བཅོས་བྱ་རྒྱུའི་སྐོར་གྱི་ཞི་ཅིན་ཕིན་གྱི་བསམ་བློ་ལ་གལ་ཆེན་སློབ་སྦྱོང་དང་གོ་བ་གཏིང་ཟབ་ལེན་པ་དང་། མི་རིགས་ནི་ཆོས་ལུགས་ལས་གལ་ཆེ་བ། མི་རིགས་ཀྱི་བཅའ་ཁྲིམས་ནི་ཆོས་ལུགས་ལས་གལ་ཆེ་བ་ཡོད་སྐོར་སློབ་སྦྱོང་དང་། ཁ་བྲལ་གྱི་གཏམ་སྤྱོད་ལ་ངོ་རྒོལ་དང་མཐའ་གཅིག་ཏུ་བྱས་ཏེ་མི་རིགས་མཐུན་སྒྲིལ་སྲུང་སྐྱོབ་བྱེད་མཁན་དང་རྒྱལ་ཁབ་གཅིག་གྱུར་སྲུང་སྐྱོང་བྱེད་མཁན་དུ་འགྱུར་བ་བྱ་དགོས་ལུགས་ཀྱི་སློབ་གསོ་སྤྲད།   ཕྱི་ཟླ་ ༥ པའི་ཟླ་མགོ་ཙམ་ནས་ཉིན་གྲངས་བཅུ་གཉིས་རིང་ལྷ་ས་གྲོང་ཁྱེར་འཐབ་ཕྱོགས་གཅིག་གྱུར་ལས་དོན་ཁང་དང་ལྷ་ས་སྤྱི་ཚོགས་རིང་ལུགས་སློབ་གླིང་གཉིས་ཀྱི་གོ་སྒྲིག་འོག ཀྲུང་ཧཱ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་གཏོང་བ་དང་རྒྱལ་ཡོངས་ཀྱི་སྤྱི་སྐད་ཁྱབ་གདལ་དུ་གཏོང་བའི་སྐུལ་འདེད་ཟེར་ནས།  ལྷ་སའི་ཁུལ་གྱི་གྲྭ་བཙུན་ལྔ་བཅུ་ལྷག་ལ་རྒྱའི་སྐད་ཡིག་འབྲི་ཀློག་སྦྱོང་དུ་བཅུག དེ་བཞིན་འདས་པའི་ཉིན་གྲངས་བཅོ་ལྔ་ལྷག་གི་རིང་། བོད་འབྲས་སྤུངས་དགོན་དང་། བོད་ཀྱི་རྒྱལ་ས་ལྷ་སའི་ཁུལ་གཙོས་བོད་ནང་གི་ས་གནས་མང་དག་ཅིག་གི་བོད་ཀྱི་དགོན་སྡེ་ཁག་ཏུ་དམག་ཤོག་རིང་ལུགས་ཀྱི་བསམ་བློ་དར་སྤེལ་དང་། རྒྱའི་སྤྱི་སྐད་ལ་སྦྱང་བརྩོན་བྱ་དགོས་པའི་གསབ་ཁྲིད་དང་འཛིན་གྲྭ་སོགས་འཚོགས་དང་འཚོག་མུས་ཡིན་འདུག   ཟླ་འདིའི་ཕྱི་ཚེས་ ༡༢ ཉིན་མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཁང་གིས་མཚོ་སྔོན་ཞིང་ཆེན་གྱི་ཆོས་ལུགས་ལས་རིགས་མི་སྣའི་དྲ་རྒྱའི་བྱ་སྤྱོད་ཚད་ལྡན་ཞིབ་སྲོལ་ཟེར་བ་ཞིག་དཔར་འགྲེམ་བྱས་ཏེ། ཆོས་ལུགས་མི་སྣའི་དྲ་རྒྱའི་བྱ་སྤྱོད་ཚད་ལྡན་དུ་བཏང་སྟེ། རྒྱལ་ཁབ་གཅིག་གྱུར་ལ་སྲུང་སྐྱོང་ཟེར་བ་དང་། ཆོས་ལུགས་ཞི་མཐུན།  སྤྱི་ཚོགས་འཆམ་མཐུན། མི་རིགས་མཐུན་སྒྲིལ་བཅས་ལ་སྔར་ལས་སྐུལ་དེད་བཏང་ཡོད་ལུགས་བཤད། རྒྱ་ནག་གཞུང་ཕྱོགས་ཀྱི་གནས་ཚུལ་ལྟར་ན། ཞིབ་སྲོལ་ཟེར་བ་དེའི་ནང་ལེའུ་དྲུག་དང་དོན་ཚན་ཉེར་ལྔ་ཡོད་ལ། དེའི་ནང་བྱེད་སྒོ་ཚད་ལྡན། གཏན་འགོག་གསལ་ཐོ། དོ་དམ་འགན་འཁྲི། རྒྱལ་གཅེས་ཆོས་གཅེས་དང་། སྒྲིག་སྲོལ་བརྟན་སྲུང་། བྱ་སྤྱོད་ཚུལ་ལྡན་སོགས་ཀྱི་གཞི་རྩའི་རྩ་དོན་ཟེར་བ་གསལ་བོར་བསྟན་ཡོད་ལུགས་དང་། ཆོས་ལུགས་ལས་རིགས་མི་སྣས་རང་ཉིད་ཀྱི་ཐོབ་ཐང་ལག་ཁྱེར་སྤྱད་ནས་དྲ་རྒྱའི་ཁ་བྱང་ཐོ་འགོད་བྱས་ཏེ་དངོས་མིང་ཐོ་འགོད་ཀྱི་ཞིབ་བཤེར་ལག་བསྟར་བྱ་དགོས་ཤིང་། སྲིད་གཞུང་གི་ཆོག་མཆན་མེད་པར་ཆོས་ལུགས་ཀྱི་བྱེད་སྒོའི་རིགས་ལ་ཞུགས་མི་ཆོག་པའི་ཁར། དེས་མཚོ་སྔོན་ཞིང་ཆེན་གྱི་དྲ་རྒྱའི་ཆོས་ལུགས་ཀྱི་ཁོར་ཡུག་དག་གཙང་ཟེར་བ་དང་། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་འཆམ་མཐུན་དགོས་ལུགས་སོགས་བསྒྲགས་ཡོད་པ་མ་ཟད། སྲིད་གཞུང་གིས་ཆོས་ལུགས་ལས་དོན་སྤེལ་བར་ཆོག་མཆན་ཐོབ་པ་དག་གིས་ཀྱང་།  ནར་མ་སོན་པའི་མི་ལ་ཆོས་ལུགས་སྤེལ་མི་ཆོགས་ལུགས་སོགས་བསྒྲགས་འདུག  དམར་ཤོག་རིང་ལུགས་ཀྱི་ཆབ་སྲིད་སློབ་གསོའི་གནས་ཚུལ།  ཟླ་འདིའི་ཟླ་མགོ་ཙམ་ནས་ལྷ་ས་གྲོང་ཁྱེར་མི་རིགས་ལས་དོན་རྒྱུན་ལས་ཁང་ཟེར་བས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཚད་ལྡན་ཁ་སྐད་དང་སྐད་ཡིག་སྐོར་གྱི་བཅའ་ཁྲིམས་ཟེར་བ་དང་། བོད་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་སྲོལ་ཡིག་ཟེར་བ། མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་གསར་འཛུགས་སྲོལ་ཡིག་ཟེར་བ་སོགས་དྲིལ་བསྒྲགས་ཤུགས་ཆེན་བྱེད་བཞིན་ཡོད་ལ། ཟླ་འདིའི་ནང་ལྷ་ས་གྲོང་ཁྱེར་མལ་གྲོ་གུང་དཀར་རྫོང་རྩ་ཞོལ་ཀློང་གྲོལ་གྲོང་ཚོའི་ལྷན་ཁང་གིས། གྲོང་སྡོད་ལས་དོན་རུ་ཁག་ཟེར་བ་དང་། རྫོང་རིག་རྩལ་ལྷན་ཚོགས་དང་རིག་གནས་ཡུལ་སྐོར་ལས་ཁུངས་སོགས་ལ་མཉམ་འབྲེལ་བྱས་ཏེ། ཕྱི་ལོ་ ༢༠༢༦ ལོའི་དམར་ཤོག་གི་ཁ་ལ་ཉན་པ་དང་། དམར་ཤོག་གི་དྲིན་ཚོར་བ། དམར་ཤོག་གི་རྗེས་སུ་འབྲང་བ་ཞེས་པའི་བརྗོད་གཞིའི་ཐོག་ནས་ཆབ་སྲིད་བྱེད་སྒོ་སྤེལ་པ་ཡོད་པ་མ་ཟད། བོད་དུ་དམངས་གཙོའི་བཅོས་སྒྱུར་ཟེར་བ་བྱས་ནས་ལོ་ངོ་ ༦༧ རིང་གི་འཕེལ་རྒྱས་ཀྱི་གྲུབ་འབྲས་སོགས་བཤད་ནས་དྲིལ་བསྒྲགས་ཤུགས་ཆེན་བྱས། ཟླ་འདིའི་ཕྱི་ཚེས་ ༡༢ ཉིན་བོད་རང་སྐྱོང་ལྗོངས་དམར་ཤོག་གི་གྲོང་ཁྱེར་ལས་དོན་ཚོགས་འདུ་བསྡུས་ཏེ། བོད་ཀྱི་ཁྱད་ཆོས་ལྡན་པའི་དེང་རབས་ཅན་གྱི་མི་དམངས་གྲོང་ཁྱེར་ཧུར་ཐག་བསྐྲུན་དགོས་ལུགས་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏང་རྒྱུ་དེ་གྲོང་ཁྱེར་ལས་དོན་གྱི་བརྒྱུད་རིམ་ཧྲིལ་པོར་ཁྱབ་རྒྱུ་མཐའ་འཁྱོངས་བྱས་ཏེ། མི་རིགས་ཁག་གིས་མཉམ་སྤྱོད་བྱེད་པའི་ཀྲུང་ཧྭའི་རིག་གནས་ཀྱི་མཚོན་རྟགས་ཟེར་བ་དང་། ཀྲུང་ཧྭ་མི་རིགས་ཀྱི་གཟུགས་བརྙན་འཛུགས་པ་དང་མངོན་གསལ་དོད་དུ་གཏང་དགོས་སོགས་ཀྱི་ཐད་གླེང་སློང་ཤུགས་ཆེན་བྱས་འདུག་ལ། ལྷ་སའི་ཀླུ་སྒུག་སྡེ་ཁུལ་དུ་གསར་བརྗེ་ཡི་ཁྲག་རྒྱུན་རྒྱུན་འཛིན་བྱེད། དུས་རབས་ཀྱི་ལེའུ་གསར་མངོན་པར་བསྟོད། ལོ་རྒྱུས་ཤོད་པ་དང་། འགྱུར་ལྡོག་གླེང་བ། དམར་ཤོག་དྲིལ་བསྟོད་ཟེར་བའི་གཏམ་བཤད་འགྲན་བསྡུར་བྱས། གཞན། ཟླ་འདིའི་ཟླ་མགོར་བོད་ལྷོ་བྲག་རྫོང་ཁོངས་སུ། སྐུ་ལྷ་མཁའ་རིའི་ཡུལ་ལུང་དུ་སྦྱི་སྐད་སྦྱད་ནས་མཐུན་སྒྲིལ་གླེང་ཞེས་མིང་ཐོག་ནས། ལྷོ་བྲག་རྫོང་གི་ཞིང་འབྲོག་མང་ཚོགས་ཀྱི་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཟེར་བ་དར་སྤེལ་གཏོང་ཐབས་བྱས་་ཡོད་ཅིང་། རོང་འབྲོག་མང་ཚོགས་ཀྱི་ཉིན་རེའི་འཚོ་བའི་ཁྲོད་རྒྱལ་ཁབ་ཀྱི་སྤྱི་སྐད་ཟེར་བ་བཀོལ་སྤྱོད་བྱ་དགོས་ལུགས་ཀྱི་དྲིལ་བསྒྲགས་བྱེད་མུས་ཡིན་འདུག  ཟླ་འདིའི་ཕྱི་ཚེས་ ༡༣ ཉིན་མཚོ་སྔོན་ཞིང་ཆེན་གྱི་དམར་ཤོག་ཚོགས་པའི་ཚོགས་གཙོ་གཞོན་པ་ལུའོ་ཏུང་ཁྲོན་ཟེར་བ་དེས་མཚོ་སྔོན་མི་རིགས་སློབ་ཆེན་དུ་རྟོག་ཞིབ་བྱས་ཏེ། ཁོས་མཚོ་སྔོན་མི་རིགས་སློབ་ཆེན་ནི་རང་ཞིང་གི་རིགས་སོ་སོའི་བྱང་ཚད་མཐོ་བའི་འཇོན་མི་གསོ་སྐྱོང་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་ཆགས་པར་སྐུལ་འདེད་གཏོང་བའི་རྟེན་གཞི་གལ་ཆེན་ཞིག་ཡིན་ཞིང་།     མི་རིགས་མཐུན་སྒྲིལ་ཡར་ཐོན་དང་ཐུན་མོང་དར་རྒྱས་འཕེལ་རྒྱས་མངོན་པར་བྱེད་པའི་སྒེའུ་ཁུང་གལ་ཆེན་ཞིག་ཀྱང་ཡིན་པས།   ཐོག་མཐའ་བར་གསུམ་དུ་ཏང་གི་ཕྱོགས་ཡོངས་འགོ་ཁྲིད་རྒྱུན་འཁྱོངས་བྱ་དགོས་ལུགས་དང་། རྒྱལ་གཅེས་རིང་ལུགས་དང་མི་རིགས་མཐུན་སྒྲིལ་ཡར་སྐུལ་སློབ་གསོ་གཏིང་ཟབ་ཏུ་གཏོང་དགོས་ལུགས་བཤད། གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ། The post ཉིན་གྲངས་ ༡༥ ནང་བོད་དུ་བྱུང་བའི་ཆོས་དང་ཆབ་སྲིད་ཀྱི་གནས་ཚུལ་ཁག་ཅིག appeared first on བོད་ཀྱི་དུས་བབ།.